LUZIA WIA LOM WÄAJEN ÄA LINKJET BEEN. Bie kjlien haud see Poliomyelitis, eene sea leicht äwaschlonende Krankheit, waut de Muskelnarfen aunjript. Aus see 16 wia, säd de Fru, fa dee Luzia schaufen deed: “Daut du lom best, es eene Strof von Gott, wäajen du nich no diene Mame horchst un domm to dee wieescht.” Joaren lota feeld Luzia sikj noch emma doljeschloagen doaräwa.

AUS DAMARIS ENWORT, DAUT SEE KJRÄFT EM VESTAUNT HAUD, säd äa Voda to ar: “Waut hast du jedonen, daut die dit traft? Du motst haben waut sea schlajchtet jedonen un nu stroft Gott die.” Damaris feeld sikj sea jeschloagen derch dise Wieed.

Aul dusende Joaren haben Menschen jejleeft, daut Krankheiten eene Strof von Gott sent. Daut Buak Manners and Customs of Bible Lands sajcht, daut väle en Jesus siene Tiet dochten, daut “Krankheiten von eenem siene ooda von daut Frintschoft siene Sinden häakjeemen, un eene Strof von Gott wieren.” En daut Buak Medieval Medicine and the Plague sajcht daut, daut hundade Joaren no Jesus siene Tiet “eenje dochten, daut Gott de Menschen met Krankheiten fa äare Sinden stroft.” En de 1300ja Joaren storwen en Europa millionende aun eene Krankheit, waut schwoate Pest jenant woat. Deed Gott schlajchte Menschen met dise Krankheit strofen? Ooda kjeem dise Krankheit bloos von eene Sort Baktierieen, soo aus Forscha rutjefungen haben? Wäajen soont wundren eenje, aus Gott werkjlich Krankheiten brukt, om wäm fa siene Sinden to strofen. *

DENKJ MOL ÄWA NO: Wan de Krankheiten un daut Lieden eene Strof von Gott wieren, wuarom wudd Jesus de Menschen dan jeheelt haben? Wudd hee doamet nich jäajen daut jegonen sennen, waut Gott sikj äwajetalt haud, om de Menschen to strofen? (Matäus 4:23-24). Jesus wudd niemols jäajen Gott schaufen. Hee säd je: “Ekj doo emma daut, waut am jefelt”. Hee säd uk, daut hee aules deit, waut sien Voda am “oppjedroacht haft” (Johanes 8:29; 14:31).

De Schreft sajcht gaunz kloa: Jehova Gott “haundelt emma rajcht” (5. Mose 32:4). Een Biespel: Gott wudd kjeenmol veuasoaken, daut een Zhett veojjlekjt, wua hundade Menschen omkomen, bloos om eenen von dee to strofen. Daut stemt met daut, waut Abraham, een trua Deena von Gott, aul wist: Gott wudd niemols “de oschuldje met dee, dee sikj veschulcht haben, toop ombrinjen”. Hee säd: “Soont wudd bie die doch nich väakomen!” (1. Mose 18:23, 25). De Schreft sajcht uk, daut “Gott nuscht schlajcht deit” un daut hee nich orrajcht deit (Hiob 34:10-12).

Daut schwoare, waut wie derchmoaken, es nich wäajen Gott ons fa eene Sind stroft. Jesus selfst muak dise Sach gaunz kloa, aus hee un siene Jinja eenen Maun sagen, waut blint jebuaren wia. “Siene Jinja fruagen am: Liera, wäa haft jesindicht, dis Maun ooda siene Elren, daut hee blint jebuaren es? Jesus säd: Dee Maun es nich doavon blint, daut hee ooda siene Elren jesindicht haben, oba doawäajen, daut Gott siene Woakjen aun am verendach komen sullen” (Johanes 9:1-3).

Wäajen daut, woo de mieeschte Menschen to jane Tiet dochten, wieren Jesus siene Jinja secha vewundat, aus hee an säd, daut nich de Maun uk nich siene Elren jesindicht hauden, un doaderch  soowaut äwa am kjeem. Jesus heeld disen blinjen Maun nich mau bloos, oba hee muak doaderch uk gaunz dietlich, daut et nich soo wia, daut daut Lieden eene Strof von Gott wia (Johanes 9:6-7). Daut kaun vondoag dän Dach een groota Troost sennen fa dee, waut aun eene schlemme Krankheit lieden, to weeten, daut Gott an daut nich veuasoakt.

De Schreft sajcht ons

• “Gott kaun nich toom beesen vesocht woaren, un hee vesieekjt uk kjeenem” (JAKOBUS 1:13). Soon schlajchtet aus Krankheiten, Weedoag un Doot, wua de Menschen aul hundade Joaren aun lieden, woat daut boolt nich mea jäwen.

• Väl Menschen kjeemen no Jesus Christus un hee “muak aul äare kranke jesunt” (MATÄUS 8:16). Doaderch wees hee, waut Gott sien Kjennichrikj oppe gaunze Ieed volbrinjen woat.

• “Gott woat an aule Tronen von de Uagen weschen. Doa woat kjeen Doot ooda Trua ooda Hielen ooda Weedoag mea sennen, wiels waut verhäa wia, es veschwungen” (OPENBOARUNK 21:3-5).

De Menschen haben aul hundade Joaren doaräwa nojedocht, wuarom wie soo väl Lieden un schwoaret derchmoaken motten. Un wan Gott daut lieden nich veuasoakt, wäa deit daut dan? Dise Auntwuaten finjst du en dän näakjsten Artikjel.