Väle jleewen, daut eena woat een bätret Läwen haben, wan eena huach utjelieet es un väl Jelt haft. Dee jleewen biejlikj, daut see woaren bätre Menschen sennen, wan see sikj bie de Uniwersitäten utlieren loten. Dee jleewen, daut woat an bie de Oabeit togood komen, enne Famielje un sest em Läwen. Soone Menschen denkjen uk, daut wan eena utjelieet es, kjricht eena eene bätre Oabeit un diera betolt, un daut eena schaftich es, wan eena een deel Jelt haft.

Zhang Chen, een Maun von China, sajcht: “Ekj docht, daut ekj mie must bie de Uniwersität utlieren loten, om nich mea oam to sennen. Un daut mie eene dia betolde Oabeit fäld, daut ekj kunn tofräd sennen un een scheenet Läwen haben.”

Väle wellen sea jieren bie eene aunjeseene Uniwersität studieren, besonda em Utlaunt, om sikj daut noch sechra to moaken, daut see woaren een scheenet Läwen haben. Un daut deeden emma mea, bat de COVID-19-Krankheit kjeem un daut schwanda muak no aundre Lenda to reisen. Een Berecht vonne 2012 sajcht, daut von aul dee, waut em Utlaunt bie Uniwersitäten studieren, mea aus de Halft von Asien komen (Organisation for Economic Co-operation and Development).

Foaken nämen Elren väl opp sikj, om äare Kjinja em Utlaunt no Uniwersitäten to schekjen. Een Maun von Taiwan vetalt: “Miene Elren hauden nich väl, oba dee schekjten doawäajen ons vea no de Stäts, om ons doa utlieren to loten.” Siene Famielje must sikj, soo aus uk väl aundre, deep en Schult enducken, om fa soo väl Schooljelt un aundret opptokomen.

Sikj utlieren kaun fa eenjet goot sennen. Oba daut kjemt nich emma soo ut, aus dee, waut studieren, sikj denkjen. Biejlikj haben väle sikj joarenlank sea aunjestrenjt fa de Schoolen un doaropp Jelt jeliet, un kjrieejen lota oba nich dee Oabeit, waut see wullen. En eene Post von Singapur (Business Times) sajcht daut: “Emma mea Menschen, waut sikj bie de Uniwersität utlieren loten, finjen lota kjeene Oabeit”. Jianjie, een Maun en Taiwan, leet sikj sea utlieren un sajcht: “Väle motten irjenteene Oabeit aunnämen, wiels see dee Oabeit nich finjen, fa dee see sikj haben utlieren loten.”

Mau rajcht soone, waut krakjt dee Oabeit finjen, fa dee see sikj haben utlieren loten, motten lota enwoaren, daut äa Läwen nich soo jeworden es, aus see sikj jejleeft haben. Daut es, waut Niran von Tailaunt beläwd. Hee wia en Enjlaunt no eene Uniwersität jegonen un funk dan en sien Launt krakjt dee Oabeit, fa dee hee sikj haud utlieren loten. Hee vetalt: “Ekj kunn derch de School eene Oabeit finjen, waut dia betolt wort, soo aus ekj mie daut äwajetalt haud. Oba daut bedied, daut ekj dolla un uk lenja schaufen must. Irjentwanea must de Kompanie dan de mieeschte Oabeida aufsajen – un mie uk! Ekj wort en, daut et kjeene Oabeit jeft, waut eenem daut Läwen secha moakt.”

Soogoa de rikje Menschen haben Trubbel en de Famielje, woaren krank un sorjen sikj äwa daut Jelt. Een Maun von Jaupaun, waut Katsutoshi heet, sajcht: “Ekj haud sea väl em tieteljen, oba ekj wort mootloos, wäajen aundre proowden mea to haben aus ekj un mie ut Aufgonst schlajcht behaundelden.” Eene Fru von Vietnam sajcht: “Ekj see, woo väl Menschen doano sträwen, eene Oabeit to finjen, wua see väl Jelt vedeenen, om een scheenet un sechret Läwen to haben. Oba waut dee beläwen es krakjt daut Jäajendeel! Dee moaken sikj Sorjen, haben Trubbel met de Jesuntheit un komen met de Narfen rauf.”

Soo aus Franklin sent väle enjeworden, daut daut tietelje nich daut wichtichste em Läwen es, oba daut daut om mea jeit, aus sikj bloos huach utlieren to loten un väl Jelt to kjrieen. Doawäajen jleewen eenje uk, daut eena uk saul een gooda Menschen sennen un aundre halpen. Oba kaun eena sikj opp dise Wajch een bätret Läwen vesechren? De näakjsta Artikjel haft de Auntwuat.