Wan du no Help sieekjst, woo du kaust met Trua foadich woaren, woascht du veleicht veschiedne Iedeeen hieren, oba dee halpen nich aula jlikjen väl. Daut es veleicht wäajen jieda eena veschieden truat, soo aus wie ea aul säden. Waut eenen Mensch halpt, halpt dän aundren veleicht nich.

Oba daut jeft doawäajen eenjet, waut väle aul jeholpen haft. Daut sent Sachen, waut Jelieede tooroden, un waut uk en de Schreft to finjen sent. Un daut haft aul fa dusende Joaren Menschen jeholpen.

• Eenje Jelieede sajen, daut die dit daut dolste halpen kaun. Oba eenjemol west du doawäajen veleicht auleen sennen. Veleicht oajascht du die mau rajcht äwa dee, waut die proowen to halpen un daut es uk gaunz normal.

• Denkj nich soo, daut du emma motst met aundre toop sennen. Oba hool die uk nich gaunz oppoat, wiels die woat daut woomäajlich noch doaraun fälen, daut dee die unjastetten. Saj dee daut leeftolich, waut die fält un waut nich.

• Proow ruttofinjen, wanea die daut doaraun fält, met aundre toop to sennen, un wanea du west auleen sennen.

WAUT DE SCHREFT SAJCHT: “Twee sennen, es bäta aus auleen sennen . . . Wan eena hanfelt, dan halpt de tweeda däm opp” (Liera 4:9-10).

• Jesunt äten woat dän Kjarpa halpen, doa bäta met omtogonen, wan du truascht. Proow, veschiedne Sorten Jreens un Frucht to äten un nich sea schmurzkjet.

• Drinkj väl Wota un aundret, waut jesunt es.

• Wan du nich Hunga hast, dan doo nich väl opp eemol äten un dan oba foakna. Du kaust uk eenen Dokta no Rot froagen. a

• Bosich gonen ooda aundret Ekserseis kaun die halpen, die bäta to feelen. Daut kaun die halpen, doa kloara äwa notodenkjen, waut doa passieet es, ooda doa uk mol een Stootje von to vejäten.

WAUT DE SCHREFT SAJCHT: “Noch haft kjeena sien ieejnet Fleesch veschmäten. Een Mensch vesorcht un näat sienen Kjarpa” (Efeesa 5:29).

• Jenuach schlopen es emma wichtich, oba besonda fa dee, waut truaren. Wäajens wan doa wäa truat, woat dee sea meed.

• Pauss uk opp, woo väl Koffe un stoakjet du drinkjst, wiels daut kaun die beides Schlop wajchnämen.

WAUT DE SCHREFT SAJCHT: “Daut es bäta, wan eena eene Hauntvoll haft, un sikj utreiwen kaun, aus wan eena twee Henj voll haft, un sikj kjwält, un vesieekjt dän Wint to jriepen” (Liera 4:6).

• Jieda eena truat veschieden un doawäajen motst du die daut unjastonen, waut fa die daut baste schauft.

• Väle halpt daut, aundre doavon to vetalen, woo an daut jeit. Oba aundre wellen doa verheipts nich von räden. Mau rajcht Jelieede haben veschiedne Meenungen doaräwa, aus daut toom gooden es, aundre doavon to vetalen, ooda nich. Soo, wan die daut fält, met wäm doaräwa to räden, dan doo bloos. Veleicht es die daut leichta, wan du bloos soo bie sacht doa to eenen gooden Frint von vetalst.

• Eenje Menschen halpt daut to roaren, wan see truaren. Aundre wada truaren onen daut see roaren.

WAUT DE SCHREFT SAJCHT: “Bloos du weetst woo schwoa die waut es” (Spricha 14:10).

• Eenje drinkjen stoakjet ooda brucken Droggs toom proowen, von äa Trua to vejäten. Oba soont woat die bloos schoden. Wiels wan du daut deist, dan woascht du die veleicht bloos fa een Stootje bäta feelen, oba lota woat aules noch schlemma woaren. Doo leewa waut, waut die werkjlich halpt un nich noch dolla raufbrinjt.

WAUT DE SCHREFT SAJCHT: “Well wie ons nu von aules reinjen waut Kjarpa un Jeist besudelt” (2. Korinta 7:1).

• Een deel Menschen sent enjeworden, daut an daut jeholpen haft, wan see waut doonen, daut see doa nich soo väl äwa nodenkjen, waut doa passieet es.

• Die kaun daut uk halpen, met Frind toop sennen ooda waut nieet lieren ooda waut fa Scheengonen doonen.

• Met de Tiet woat die daut aunfangen bäta to gonen un du woascht nich mea soo truarich sennen.

WAUT DE SCHREFT SAJCHT: “Doa es eene Tiet fa jieda Sach oppe Ieed. . . . Hielen haft siene Tiet, lachen haft siene Tiet, truaren haft siene Tiet, daunzen haft siene Tiet” (Liera 3:1, 4).

• Fang soo schwind aus mäajlich wada met dien normalet Läwen aun.

• Wan du die aun eenen Plon helst, wanea du schlapst, wanea du schaufst un wanea du aundre Sachen deist, dan woat sikj die daut wada dolla normal späaren.

• Die met goodet drock hoolen, kaun die halpen, daut die daut nich soo schlajcht jeit.

WAUT DE SCHREFT SAJCHT: “Hee woat daut schia nich moakjen, woo de Doag en daut Läwen vegonen, wäajen de woara Gott am beschafticht helt met de Freid von sien Hoat” (Liera 5:20, NW).

• Väle, waut fuaz groote Sachen em Läwen endren, wan doa wäa jestorwen es, woat daut lota leet.

• Daut wudd bäta sennen, weens een bät Tiet loten to vegonen, ea du wajchtrakjst ooda eene aundre Oabeit sieekjst ooda dän Aunjehieejen siene Sachen aufsteist.

WAUT DE SCHREFT SAJCHT: “Väasechtich plonen, brinjt eenem Vedeenst, soo secha aus aufbrutschen, Oamoot brinjt” (Spricha 21:5).

• Väle kjennen bäta met Trua omgonen, wan dee Sachen doonen, waut an halpt, dänjanjen kloa em Denkj to hoolen, waut doa jestorwen es.

• Veleicht woascht du enwoaren, daut die daut uk kaun treesten, Sachen ooda Bilda äwadäl to holen, waut die halpen, doaraun to denkjen, waut jie toop beläft haben.

• Doo die uk Sachen oppbewoaren, waut die halpen, aun daut scheene to denkjen, waut jie toop deeden. Un wan du die lota ieescht reedfeelst, dan besee die dee wada.

WAUT DE SCHREFT SAJCHT: “Denkj doch emol no, woo daut en vegone Tiet jewast es” (5. Mose 32:7).

• Veleicht wurscht du die mol kjennen Tiet nämen toom irjentwua hanreisen.

• Wan daut nich mäajlich es, fa lenja wua hantoreisen, dan kaust du veleicht fa een poa Doag irjentwaut doonen, soo aus enne Boaj gonen, no een Museum wanken ooda sestwua hanfoaren toom waut beseenen.

• Bloos mol een beskje waut aundre doonen, kaun aul sea halpen toom die bäta feelen.

WAUT DE SCHREFT SAJCHT: “Komt, well wie wua fa ons auleen gonen un ons een stootje utreiwen” (Markus 6:31).

• Hool em Denkj: Wan du aundre halpst, dan woat die daut selfst uk bäta gonen.

• Du kaust veleicht aunfangen, aundre to halpen, biejlikj soone, waut uk wäajen dänselwjen truaren aus du. Du kaust Frind ooda Frintschoft halpen, waut daut uk aun wäm fält, waut met an metfeelen kaun.

• Aundre biestonen un treesten kaun die halpen, wada schaftja to sennen un die wada waut wieet to feelen.

WAUT DE SCHREFT SAJCHT: “Jäwen es seelja [ooda moakt schaftja] aus nämen” (Aposteljeschicht 20:35).

• Wan een Mensch stoaft, dan woat eenem daut dietelja, waut em Läwen werkjlich wichtich es.

• Nemm dise Tiet woa toom doaräwa nodenkjen, waut du met dien Läwen deist.

• Wan doa waut fält to endren, dan doo daut.

WAUT DE SCHREFT SAJCHT: “Daut es bäta en een Hus nengonen, wua see truaren, aus en een Hus nengonen, wua een Fast jehoolen woat; wiels een jiedra kjemt no daut Enj, un dee waut läwen, sullen doaraun denkjen” (Liera 7:2).

 Eena wudd doawäajen nich sellen denkjen, daut eena nienich mea woat truarich sennen. Oba eenje, waut aul haben must wäm begrowen, sajen, daut an daut jetreest haft, daut to doonen, wua wie en disen Artikjel von jerät haben. Secha jeft daut uk noch aundret, waut eena doonen kaun, waut eenem daut wudd kjennen leichta moaken, wan eena truat. Wan du weens proofst, wesset von disen Rot notokomen, dan woat die daut secha leichta woaren.