لُوقا دی اِنجیل 13:1-35
-
توبہ کرو یاں فیر ہلاک ہووو (1-5)
-
اِنجیر دے درخت دی مثال جیہڑا پھل نئیں دیندا (6-9)
-
سبت دے دن اِک کُبڑی عورت نُوں شفا (10-17)
-
رائی دے دانے تے خمیر دی مثال (18-21)
-
تنگ دروازے چوں لنگھن لئی زور لانا ضروری اے (22-30)
-
چالباز ہیرودیس (31-33)
-
یسوع یروشلم لئی روندا اے (34، 35)
13 اوس ویلے اوتھے کجھ لوکاں نے یسوع نُوں دَسیا کہ جدوں کجھ گلیلی ہیکل چ قربانیاں چڑھا رہے سن تے پیلاطُس نے اوہناں دا قتل کرا دِتا سی۔
2 یسوع نے اوہناں نُوں کہیا: ”تواڈے خیال چ کیہہ اوہ گلیلی باقی سارے گلیلیاں نالوں بوہتے گُناہگار سن کہ اوہناں نُوں مار دِتا گیا؟
3 بالکل نئیں۔ مَیں توانوں کہنا واں کہ جے تُسی توبہ نئیں کرو گے تے تواڈا وی ایہی حشر ہوئے گا۔
4 نالے جیہڑے 18 لوکاں تے سِلُوام دا بُرج ڈِگیا تے اوہ مارے گئے، کیہہ اوہ یروشلم دے باقی سارے لوکاں نالوں بوہتے گُناہگار سن؟
5 بالکل نئیں۔ مَیں توانوں کہنا واں کہ جے تُسی توبہ نئیں کرو گے تے تواڈا وی ایہی حشر ہوئے گا۔“
6 فیر یسوع نے ایہہ مثال دِتی: ”اِک بندے نے اپنے انگوراں دے باغ چ اِنجیر دا درخت لایا۔ جدوں اوہ پھل توڑن گیا تے درخت تے کوئی پھل نئیں سی۔
7 اوہنے مالی نُوں کہیا: ”مَیں تِن سالاں توں ایس امید نال آنا واں کہ ایس درخت توں پھل ملے گا۔ پر ایہدے تے کدی پھل نئیں لگیا۔ ایس لئی ایہنوں وڈھ دے۔ ایہنے اینویں ای جگہ گھیری ہوئی اے۔“
8 مالی نے کہیا: ”مالک، ایہنوں اِک ہور سال رہن دے۔ مَیں ایہدے آلے دَوالے گوڈی کراں گا تے کھاد پانواں گا۔
9 جے ایہنوں پھل لگیا تے ٹھیک اے پر جے نہ لگیا تے ایہنوں وڈھ دوِیں۔““
10 فیر اِک وار یسوع سبت دے دن اِک عبادتگاہ چ تلیم دے رہیا سی
11 تے ویکھو! اوتھے اِک عورت سی جنہوں 18 سالاں توں اِک باغی فرشتہ چِمبڑیا ہویا سی جدی وجہ توں اوہدا کُب نکلیا ہویا سی تے اوہ سِدھی کھلو نئیں سکدی سی۔
12 یسوع نے اوس عورت نُوں ویکھ کے کہیا: ”بیبی، تینوں ایس بیماری توں چھٹکارا مِل گیا اے۔“
13 فیر اوہنے اوس عورت تے ہتھ رکھے تے اوہ فوراً سِدھی کھلو گئی تے خدا دی وڈیائی کرن لگ پئی۔
14 پر ایہہ ویکھ کے عبادتگاہ دا نگران غصے چ آ گیا کیونکہ یسوع نے اوس عورت نُوں سبت دے دن شفا دِتی سی۔ ایس لئی اوہنے لوکاں نُوں کہیا: ”ہفتے دے چھ دِناں چ کم کرنا جائز اے، اوہدوں شفا پان لئی آیا کرو۔ سبت دے دن نہ آیا کرو۔“
15 پر مالک یسوع نے جواب دِتا: ”پاکھنڈیو، کیہہ تُسی سارے سبت دے دن اپنے بیل یاں گدھے نُوں کُھرلی توں کھول کے پانی پیان نئیں لجاندے؟
16 تے فیر کیہہ سبت دے دن ایس عورت نُوں اپنی بیماری توں چھٹکارا نئیں ملنا چاہی دا جیہڑی ابراہام دی دھی اے تے جنہوں شیطان نے 18 سالاں توں اپنے قابو چ کیتا ہویا اے؟“
17 یسوع دِیاں ایہہ گلاں سُن کے اوہدے دُشمن بڑے شرمندہ ہوئے۔ پر باقی سارے لوک اوہدے شاندار کماں نُوں ویکھ کے بڑے خوش ہوئے۔
18 فیر یسوع نے کہیا: ”خدا دی بادشاہی کدے ورگی اے؟ مَیں ایہنوں کیہڑی مثال نال سمجھاواں؟
19 ایہہ اِک رائی دے دانے ورگی اے جنہوں اِک بندے نے اپنے باغ چ بویا تے اوہ ودھ کے اِک درخت بن گیا تے اسمان چ اُڈن والے پرندیاں نے آ کے اوہدیاں ٹاہنیاں تے آلنے بنا لئے۔“
20 اوہنے فیر کہیا: ”خدا دی بادشاہی بارے سمجھان لئی مَیں کیہڑی مثال دَواں؟
21 ایہہ خمیر وانگوں اے جنہوں اِک عورت نے تِن پیمانے* آٹے چ گُنھیا تے سارا آٹا خمیرا ہو گیا۔“
22 فیر یسوع نے یروشلم وَل اپنا سفر جاری رکھیا تے راہ چ اوہ جیہڑے وی شہر تے پِنڈ چوں لنگھیا، اوہنے اوتھے لوکاں نُوں تلیم دِتی۔
23 فیر اِک بندے نے اوہنوں پچھیا: ”مالک، کیہہ ایہہ سچ اے کہ صرف تھوڑے ای لوک نجات پان گے؟“ اوہنے لوکاں نُوں کہیا:
24 ”تنگ دروازے توں اندر جان دی جیتوڑ کوشش کرو کیونکہ مَیں توانوں کہنا واں کہ بوہت سارے لوک اندر جان دی کوشش کرن گے، پر جا نئیں سکن گے۔
25 جدوں گھر دا مالک اُٹھ کے دروازے نُوں تالا مار دَوے گا تے تُسی باہر کھلو کے دروازہ کھڑکاؤ گے تے کہوو گے: ”مالک، ساڈے لئی دروازہ کھول۔“ پر اوہ توانوں کہوے گا: ”مَیں نئیں جان دا کہ تُسی کتھوں آئے او۔“
26 فیر تُسی کہوو گے: ”اَسی تیرے نال بہہ کے کھادا پیتا سی تے تُوں ساڈے شہر دے چونکاں چ سانوں تلیم دِتی سی۔“
27 پر اوہ توانوں کہوے گا: ”اَے بھیڑے کم کرن والیو، میریاں نظراں توں دُور ہو جاؤ، مَیں نئیں جان دا کہ تُسی کتھوں آئے او۔“
28 جدوں تُسی ویکھو گے کہ ابراہام، اِضحاق، یعقوب تے سارے نبی خدا دی بادشاہی چ نیں، پر توانوں باہر سُٹ دِتا گیا اے تے تُسی اپنی ماڑی حالت دی وجہ توں رووو گے تے کچیچیاں وَٹو گے۔
29 ایہدے علاوہ بوہت سارے لوک مشرق تے مغرب وَلّوں تے شمال تے جنوب وَلّوں آن گے تے خدا دی بادشاہی چ میز تے بہہ کے کھانا کھان گے
30 تے ویکھو! جیہڑے آخر نیں، اوہ پہلے ہو جان گے تے جیہڑے پہلے نیں، اوہ آخر ہو جان گے۔“
31 اوس ویلے کجھ فریسیاں نے آ کے اوہنوں کہیا: ”ایتھوں چلا جا کیونکہ ہیرودیس* تینوں مروانا چاہندا اے۔“
32 یسوع نے اوہناں نُوں کہیا: ”جاکے اوس چالباز* نُوں کہہ دیو کہ ”مَیں اَج تے کل لوکاں چوں باغی فرشتیاں نُوں کڈھاں گا تے بیماراں نُوں ٹھیک کراں گا تے پرسوں اپنا کم ختم کراں گا۔“
33 فیر وی بھانویں جو مرضی ہو جائے مَیں اَج تے کل تے پرسوں اپنا کم کردا رہواں گا۔ نالے مَیں اپنا سفر جاری رکھاں گا کیونکہ اِنج ہو ای نئیں سکدا کہ اِک نبی نُوں یروشلم توں باہر ماریا جائے۔
34 اَے یروشلم، اَے یروشلم، نبیاں دے قاتل، خدا نے جنہاں نُوں تیرے کول گھلیا تُوں اوہناں نُوں پتھر مار مار کے قتل کر دِتا۔ مَیں کئی واری چاہیا کہ مَیں تیرے بچیاں نُوں جمع کر لواں جیویں کُکڑی اپنے چُوچیاں نُوں اپنے پَراں تھلے جمع کردی اے۔ پر تُوں ایہہ نئیں چاہیا۔
35 ویکھ! خدا نے تیرے گھر نُوں چھڈ دِتا اے۔ مَیں توانوں کہنا واں، تُسی اوہدوں تک مینوں نئیں ویکھو گے جدوں تک تُسی ایہہ نئیں کہوو گے: ”مبارک اے اوہ جیہڑا یہوواہ دے ناں تے آندا اے۔““
