متی دی اِنجیل 2:1-23
2 بادشاہ ہیرودیس* دے زمانے چ یسوع یہودیہ دے شہر بیتلحم چ پیدا ہویا۔ ایہدے بعد مشرق وَلّوں کجھ نجومی یروشلیم آئے۔
2 تے اوہناں نے پچھیا: ”اوہ بچہ کتھے وے جیہڑا یہودیاں دا بادشاہ اے؟ اَسی مشرق چ اوہدا تارا ویکھ کے اوہنوں سجدہ کرن آئے آں۔“
3 ایہہ سُن کے بادشاہ ہیرودیس تے یروشلیم دے سارے لوک گھبرا گئے۔
4 بادشاہ نے وڈے کاہناں تے شریعت دے عالماں نُوں کٹھا کر کے پچھیا: ”مسیح* نے کتھے پیدا ہونا سی؟“
5 اوہناں نے جواب دِتا: ”یہودیہ دے بیتلحم چ کیونکہ نبی نے ایہہ لکھیا سی:
6 ”اَے یہوداہ دے علاقے بیتلحم، تُوں یہوداہ دے بادشاہواں دی نظر چ کوئی چھوٹاموٹا شہر نئیں ایں کیونکہ تیرے وچوں اِک حاکم نکلے گا جیہڑا میری قوم اِسرائیل دی پیشوائی کرے گا۔““
7 فیر ہیرودیس نے چپ چپیتے نجومیاں نُوں بلایا تے اوہناں کولوں پچھگچھ کر کے پتہ لایا کہ اوہناں نُوں تارا کدوں نظر آیا سی۔
8 ایہدے بعد اوہنے اوہناں نُوں ایہہ کہہ کے بیتلحم بھیجیا: ”جاؤ! بچے نُوں چنگی طرحاں لبھو تے جدوں اوہ توانوں مِل جائے تے فیر واپس آ کے مینوں دَسو تاکہ مَیں وی جا کے اوہنوں سجدہ کراں۔“
9 بادشاہ دی گل سُن کے اوہ چلے گئے تے ویکھو! جیہڑا تارا اوہناں نے مشرق چ ویکھیا سی، اوہی اوہناں دے اَگے اَگے چلن لگ پیا تے اوس جگہ جا کے رُک گیا جِتھے اوہ بچہ سی۔
10 تارے نُوں رُکدیاں ویکھ کے اوہ بوہت ای زیادہ خوش ہوئے۔
11 جدوں اوہناں نے گھر دے اندر جا کے بچے نُوں اوہدی ماں مریم نال ویکھیا تے اوہناں نے گوڈے ٹیک کے بچے نُوں سجدہ کیتا۔ نالے اوہناں نے اپنا سامان کھول کے اوہنوں قیمتی تحفے دِتے یعنی سونا، لُبان تے مُر۔
12 فیر خدا نے نجومیاں نُوں خواب چ خبردار کیتا کہ اوہ ہیرودیس دے کول واپس نہ جان۔ ایس لئی اوہ دُوجی راہ توں اپنے ملک واپس چلے گئے۔
13 اوہناں دے جان دے بعد، ویکھو! یہوواہ* دا فرشتہ یوسف دے خواب چ آیا تے اوہنوں کہیا: ”اُٹھ، بچے تے اوہدی ماں نُوں لے کے مصر بھج جا تے اوہدوں تک اوتھے رہ جدوں تک مَیں تینوں واپس آن لئی نہ کہواں کیونکہ ہیرودیس ایس بچے نُوں لبھے گا تاکہ ایہنوں مار دَوے۔“
14 ایس لئی یوسف اُٹھیا تے بچے تے اوہدی ماں نُوں لے کے راتوںرات مصر چلا گیا۔
15 اوہ ہیرودیس دے مرن تک اوتھے ای رہیا۔ ایس طرحاں یہوواہ* دی اوہ گل پوری ہوئی جیہڑی اوہنے اپنے نبی دے ذریعے کہی سی کہ ” مَیں اپنے پُتر نُوں مصر توں سدّیا۔“
16 جدوں ہیرودیس نے ویکھیا کہ نجومیاں نے اوہنوں دھوکھا دِتا اے تے اوہ غصے چ بھڑک اُٹھیا تے اوہنے اپنے بندیاں نُوں بھیج کے بیتلحم تے اوہدے آلے دوالے دے سارے علاقیاں چ اوہناں سارے مُنڈیاں نُوں مروا دِتا جنہاں دی عمر دو سال یاں ایس توں گھٹ سی۔ اوہنے ایس عمر دا اندازہ اوہناں گلاں توں لایا جیہڑیاں نجومیاں نے اوہنوں دَسیاں سن۔
17 اوہدوں یرمیاہ نبی دی کہی ہوئی ایہہ گل پوری ہوئی کہ
18 ”رامہ چوں رون پِٹن تے وین پان دی آواز آ رہی اے۔ راخل اپنے بچیاں لئی رو رہی اے تے اوہ کسے وی طرحاں دی تسلی نئیں چاہندی کیونکہ اوہدے بچے نئیں رہے۔“
19 جدوں ہیرودیس مر گیا تے ویکھو! یہوواہ* دا فرشتہ مصر چ یوسف دے خواب چ آیا
20 تے اوہنوں کہیا: ”اُٹھ، بچے تے اوہدی ماں نُوں لے کے ملک اِسرائیل چلا جا کیونکہ جیہڑے بچے دی جان دے پچھے پئے ہوئے سن اوہ مر گئے نیں۔“
21 ایس لئی اوہ اُٹھیا تے بچے تے اوہدی ماں نُوں لے کے اِسرائیل آ گیا۔
22 پر جدوں اوہنے سُنیا کہ ارخلاؤس اپنے پیو ہیرودیس دے بعد یہودیہ دا حکمران بن گیا اے تے اوہ اوتھے جان توں ڈریا۔ نالے خدا نے وی اوہنوں خواب چ اوتھے جان توں منع کیتا۔ایس لئی اوہ گلیل دے علاقے چ چلا گیا۔
23 تے اوہ اِک شہر چ آ کے رہن لگ پیا جدا ناں ناصرت سی تاکہ نبیاں دی کہی ہوئی ایہہ گل پوری ہوئے کہ ”اوہنوں* ناصری* کہیا جائے گا۔“
فٹ نوٹ
^ ”لفظاں دی وضاحت“ نُوں ویکھو۔
^ یاں، ”مسح کیتا ہویا۔“
^ ”لفظاں دی وضاحت“ نُوں ویکھو۔
^ ”لفظاں دی وضاحت“ نُوں ویکھو۔
^ ”لفظاں دی وضاحت“ نُوں ویکھو۔
^ یعنی مسیح نُوں۔
^ ایہہ لفظ شاید اوس عبرانی لفظ توں نکلیا اے جدا مطلب اے ”ٹاہنی۔“
