مرقس دی اِنجیل 11:1-33
11 جدوں اوہ یروشلم دے نیڑے بیتفگے تے بیتعنیاہ پونچے جیہڑے زیتون دے پہاڑ تے نیں تے یسوع نے اپنے دو شاگرداں نُوں بھیجیا
2 تے کہیا: ”اوہ پِنڈ جیہڑا تُسی سامنے ویکھ رہے او، اوتھے جاؤ۔ وڑھدیاں سار ای توانوں اوتھے اِک جوان کھوتا نظر آئے گا جدے تے حالے تک کوئی وی سوار نئیں ہویا۔ اوہنوں کھول کے میرے کول لے آؤ۔
3 جے کوئی توانوں پچھے کہ ”کیہہ کر رہے او؟“ تے اوہنوں کہنا کہ ”مالک نُوں ایہدی ضرورت اے۔ اوہ ایہنوں چھیتی واپس کر دَوے گا۔““
4 فیر اوہ چلے گئے۔ اوہناں نے گلی چ اِک دروازے کول جوان کھوتے نُوں بنھیا ویکھیا تے اوہناں نے اوہنوں کھول لیا۔
5 پر اوتھے کھلوتے کجھ لوکاں نے اوہناں نُوں کہیا: ”تُسی ایہنوں کیوں کھول رہے او؟“
6 اوہناں نے لوکاں نُوں اوہی کہیا جو یسوع نے اوہناں نُوں دَسیا سی تے لوکاں نے اوہناں نُوں لجان دِتا۔
7 اوہ جوان کھوتے نُوں یسوع کول لیائے تے اوہناں نے اپنیاں چادراں کھوتے اُتے پا دِتیاں تے یسوع اوہدے تے بہہ گیا۔
8 نالے بِھیڑ وچوں بوہت سارے لوکاں نے اپنیاں چادراں راہ چ وچھا دِتیاں جد کہ کجھ لوکاں نے سڑک دے کنارے لگے درختاں دِیاں ٹاہنیاں وچھائیاں۔
9 جیہڑے لوک اوہدے اَگے پچھے چل رہے سن، اوہ اُچی اُچی کہہ رہے سن: ”ساڈی دُعا اے، اوہنوں نجات دے! مبارک اے اوہ جیہڑا یہوواہ* دے ناں تے آندا اے۔
10 مبارک اے ساڈے باپ داؤد دی آن والی بادشاہی! اَے اسمان تے رہن والے خدا، ساڈی دُعا اے کہ اوہنوں نجات دے!“
11 یسوع یروشلم چ آ کے ہیکل چ گیا تے اوتھے آلے دَوالے سب کجھ ویکھیا۔ پر شام ہو گئی سی ایس لئی اوہ اپنے 12 شاگرداں نال بیتعنیاہ چلا گیا۔
12 اگلے دن بیتعنیاہ توں نکلدے ویلے یسوع نُوں بُھکھ لگی۔
13 اوہنوں دُوروں اِنجیر دا اِک درخت نظر آیا جدے تے پتے سن۔ اوہ ایہہ ویکھن لئی درخت دے کول گیا کہ کیہہ اوہدے تے کوئی پھل وی لگیا اے یاں نئیں۔ پر جدوں اوہ اوہدے کول گیا تے اوہنے ویکھیا کہ اوہدے تے بس پتے ای نیں کیونکہ اِنجیراں دا موسم نئیں سی۔
14 ایس لئی اوہنے درخت نُوں کہیا: ”ہُن توں تیرے کولوں کسے نُوں پھل نہ ملے۔“ اوہدی ایہہ گل شاگرداں نے وی سُنی۔
15 فیر جدوں اوہ یروشلم پونچے تے یسوع ہیکل چ گیا۔ اوہنے چیزاں ویچن تے خریدن والے لوکاں نُوں اوتھوں باہر کڈھ دِتا۔ تے پیسے بدلن والیاں دے میز تے کبوتر ویچن والیاں دِیاں چونکیاں اُلٹ دِتیاں۔
16 نالے اوہناں لوکاں نُوں روک دِتا جیہڑے چیزاں چُک کے ہیکل چوں لنگھدے سن۔
17 اوہنے لوکاں نُوں تلیم دیندے ہوئیاں کہیا: ”کیہہ پاک کلام چ ایہہ نئیں لکھیا: ”میرے گھر نُوں ساریاں قوماں لئی دُعا دا گھر کہیا جائے گا“؟ پر تُسی ایہنوں ڈاکوؤاں دا اڈا بنا دِتا اے۔“
18 جدوں وڈے کاہناں تے شریعت دے عالماں نے ایہہ سُنیا تے اوہ یسوع نُوں مارن دِیاں سازشاں کرن لگ پئے۔ پر اوہ اوہدے توں ڈردے سن کیونکہ سارے لوک اوہدی تلیم سُن کے بڑے خوش تے حیران سن۔
19 جدوں شام ہوئی تے یسوع اپنے شاگرداں نال شہروں باہر چلا گیا۔
20 اگلے دن سویرے سویرے جدوں اوہ اوسے اِنجیر دے درخت کولوں لنگھ رہے سن تے اوہناں نے ویکھیا کہ اوہ جڑوں سُک گیا اے۔
21 پطرس نُوں یسوع دی گل یاد آئی تے اوہنے کہیا: ”اُستاد،* ویکھ! اِنجیر دے جیہڑے درخت تے تُوں لعنت کیتی سی، اوہ سُک گیا اے۔“
22 یسوع نے اوہناں نُوں کہیا: ”خدا تے ایمان رکھو۔
23 مَیں توانوں سچ کہنا واں، جیہڑا اپنے دل چ شک نئیں کردا سگوں ایمان رکھدا اے کہ اوہدی کہی گل ضرور پوری ہوئے گی تے اوہدے لئی اُنج ای ہوئے گا۔ ہاں، جے اوہ ایس پہاڑ نُوں وی کہوے گا کہ ”ایتھوں اُکھڑ کے سمندر چ چلا جا“ تے ایہہ چلا جائے گا۔
24 ایس لئی مَیں توانوں کہنا واں، جدوں وی تُسی کسے چیز لئی دُعا کردے او تے ایمان رکھو تے سمجھو کہ اوہ توانوں مِل گئی اے۔ فیر اوہ چیز توانوں مِل جائے گی۔
25 نالے جدوں تُسی دُعا کرن لئی کھڑے ہووو تے تواڈے دل چ کسے لئی جیہڑا وی گلہ شکوہ اے، اوہنوں معاف کر دَوو تاکہ تواڈا اسمانی باپ وی تواڈیاں غلطیاں معاف کرے۔“
26 *—
27 اوہ دُبارہ یروشلم گئے۔ جدوں یسوع ہیکل چ ٹُر پھر رہیا سی تے وڈے کاہن، شریعت دے عالم تے بزرگ اوہدے کول آئے
28 تے اوہنوں پچھیا: ”تینوں ایہہ سارے کم کرن دا اِختیار کتھوں ملیا اے؟ کنہے دِتا اے تینوں ایہہ اِختیار؟“
29 یسوع نے اوہناں نُوں کہیا: ”مَیں وی توانوں اِک سوال پچھنا واں۔ جے تُسی جواب دَوو گے تے فیر مَیں وی توانوں دَساں گا کہ مینوں ایہہ سارے کم کرن دا اِختیار کنہے دِتا اے۔
30 مینوں دَسو کہ یوحنا نُوں بپتسمہ دین دا اِختیار کنہے دِتا سی؟ خدا* نے یاں انساناں نے؟“
31 اوہ سوچن لگ پئے تے اِک دُوجے نُوں کہن لگ پئے: ”جے اَسی کہیا: ”خدا نے“ تے اوہ سانوں کہوے گا: ”تے فیر تُسی اوہدا یقین کیوں نئیں کیتا؟“
32 پر جے اَسی کہیا: ”انساناں نے“ تے پتہ نئیں ساڈا کیہہ حشر ہوئے گا؟“ اصل چ اوہ لوکاں توں ڈردے سن کیونکہ لوک یوحنا نُوں نبی من دے سن۔
33 ایس لئی اوہناں نے یسوع نُوں کہیا: ”سانوں نئیں پتہ۔“ یسوع نے اوہناں نُوں کہیا: ”فیر مَیں وی توانوں نئیں دَسدا کہ مینوں ایہہ سارے کم کرن دا اِختیار کنہے دِتا اے۔“
فٹ نوٹ
^ ”لفظاں دی وضاحت“ نُوں ویکھو۔
^ یونانی چ: ”ربّی۔“
^ متی 17:21 دے فٹنوٹ نُوں ویکھو۔
^ یونانی چ: ”اسمان توں۔“
