مرقس دی اِنجیل 12:1-44
12 فیر یسوع لوکاں نُوں مثالاں دے کے تلیم دین لگ پیا تے کہیا: ”اِک آدمی نے انگوراں دا باغ لا کے اوہدے آلے دَوالے واڑھ لائی۔ تے انگور پھین لئی اِک جگہ کھودی نالے اوہنے اِک بُرج وی کھڑا کیتا۔ فیر اوہ باغ ٹھیکےداراں نُوں دے کے آپ کسے ہور ملک چلا گیا۔
2 جدوں انگوراں دا موسم آیا تے اوہنے باغ دی پیداوار چوں اپنا حصہ لین لئی اپنے اِک غلام نُوں ٹھیکےداراں کول گھلیا۔
3 پر ٹھیکےداراں نے اوہنوں پھڑ کے کُٹیا تے خالی ہتھ واپس بھیج دِتا۔
4 فیر مالک نے اِک ہور غلام نُوں ٹھیکےداراں کول بھیجیا۔ پر اوہناں نے اوہدی بےعزتی کیتی تے اوہدا سِر پاڑ دِتا۔
5 فیر مالک نے اِک ہور غلام نُوں بھیجیا تے ٹھیکےداراں نے اوہنوں جانوں مار سُٹیا۔ اوہنے ہور وی کئیاں نُوں بھیجیا جنہاں وچوں کجھ نُوں اوہناں نے کُٹیا تے کجھ نُوں جانوں مار سُٹیا۔
6 اخیر اوہنے ایہہ سوچ کے اپنے پیارے پُتر نُوں گھلیا کہ ”اوہ میرے پُتر دا تے لحاظ کرن گے۔“
7 پر ٹھیکےداراں نے اِک دُوجے نُوں کہیا: ”ایہی جے وارث۔ آؤ اَسی ایہنوں قتل کر کے باغ تے قبضہ کر لئیے۔“
8 ایس لئی اوہناں نے اوہنوں پھڑ کے مار دِتا تے اوہنوں باغ چوں باہر سُٹ دِتا۔
9 ہُن باغ دا مالک کیہہ کرے گا؟ اوہ آ کے ٹھیکےداراں نُوں مار دَوے گا تے باغ دُوجے ٹھیکےداراں نُوں دے دَوے گا۔
10 کیہہ تُسی پاک کلام چ نئیں پڑھیا کہ ”جیہڑے پتھر نُوں مستریاں نے ردّ کیتا اوہی کونے دا سب توں خاص پتھر* بن گیا۔
11 ایہہ یہوواہ* وَلّوں آیا اے تے ساڈیاں نظراں وچ بڑا ای عالیشان اے“؟“
12 یسوع دی مثال سُن کے وڈے کاہن تے شریعت دے عالم سمجھ گئے کہ اوہ اوہناں بارے ای گل کر رہیا اے۔ ایس لئی اوہ اوہنوں پھڑنا چاہندے سن پر لوکاں توں ڈردے سن۔ ایس لئی اوہ یسوع نُوں چھڈ کے چلے گئے۔
13 فیر اوہناں نے کجھ فریسیاں تے ہیرودیس دے حمایتیاں نُوں یسوع کول بھیجیا تاکہ اوہنوں اوہدیاں ای گلاں وچ پھسا سکن۔
14 اوہناں نے آ کے یسوع نُوں کہیا: ”اُستاد، سانوں پتہ اے کہ تُوں ہمیشاں سچ بولنا ایں۔ تُوں کسے انسان نُوں خوش کرن دی کوشش وی نئیں کردا کیونکہ تینوں کسے دے مرتبے نال کوئی فرق نئیں پیندا سگوں تُوں خدا دی راہ دی صحی صحی تلیم دینا ایں۔ سانوں دَس کہ کیہہ بادشاہ نُوں ٹیکس دینا چاہی دا اے یاں نئیں؟
15 اَسی ٹیکس دَئیے یاں نہ دَئیے ؟“ یسوع جان دا سی کہ اوہ کِنّے مکار نیں۔ ایس لئی اوہنے اوہناں نُوں کہیا: ”تُسی مینوں کیوں اَزما رہے او؟ مینوں اِک دینار لیا کے وکھاؤ۔“
16 اوہناں نے یسوع نُوں اِک دینار لیا کے دِتا۔ یسوع نے اوہناں نُوں کہیا: ”ایہدے تے کِدی تصویر تے کِدا ناں چھپیا ہویا اے؟“ اوہناں نے جواب دِتا: ”بادشاہ* دا۔“
17 فیر یسوع نے کہیا: ”جیہڑیاں چیزاں بادشاہ دِیاں نیں، اوہ بادشاہ نُوں دَوو تے جیہڑیاں چیزاں خدا دِیاں نیں، اوہ خدا نُوں دَوو۔“ اوہدی گل سُن کے اوہ حیران رہ گئے۔
18 ہُن صدوقی جیہڑے من دے سن کہ مُردے زندہ نئیں ہون گے، یسوع کول آئے تے اوہنوں پچھیا:
19 ”اُستاد، موسیٰ نے کہیا سی کہ جے کوئی آدمی بےاولاد مر جائے تے اوہدا بھرا اپنی بھابھی نال ویاہ کر کے اپنے بھرا لئی اولاد پیدا کرے۔
20 ساڈے ایتھے سَت بھرا سن۔ پہلے نے ویاہ کیتا تے اوہ بےاولاد مر گیا۔
21 فیر دُوجے بھرا نے اوسے عورت نال ویاہ کیتا پر اوہ وی بےاولاد مر گیا۔ فیر تیجے نال وی ایسے طرحاں ہویا۔
22 تے اِنج سَتے ای بھرا بےاولاد مر گئے تے اخیر چ اوہ عورت وی مر گئی۔
23 جدوں مُردیاں نُوں زندہ کیتا جائے گا تے اوہ کِدی بیوی ہوئے گی؟ کیونکہ سَتاں بھراواں نے اوہدے نال ویاہ کیتا سی۔“
24 یسوع نے اوہناں نُوں کہیا: ”تُسی غلط او کیونکہ تُسی نہ تے پاک کلام نُوں جان دے او تے نہ ای خدا دی طاقت نُوں
25 کیونکہ جدوں مُردیاں نُوں زندہ کیتا جائے گا تے اوہدوں نہ تے آدمی ویاہ کرن گے تے نہ ای عورتاں ویاہیاں جان گیاں سگوں اوہ اسمان دے فرشتیاں وانگوں ہون گے۔
26 پر جتھوں تک مُردیاں دے زندہ ہون دی گل اے کیہہ تُسی موسیٰ دی کتاب چ بَلدی ہوئی جھاڑی دا واقعہ نئیں پڑھیا؟ خدا نے موسیٰ نُوں کہیا سی: ”مَیں ابراہام دا خدا، اِضحاق دا خدا تے یعقوب دا خدا واں۔“
27 اوہ مُردیاں دا نئیں سگوں زندہ لوکاں دا خدا اے۔ تواڈی سوچ بوہت ای غلط اے۔“
28 اوتھے شریعت دا اِک عالم وی آیا ہویا سی تے اوہنے اوہناں نُوں بحث کردے سُنیا سی۔ اوہنے ویکھیا کہ یسوع نے صدوقیاں نُوں بڑا ودھیا جواب دِتا اے۔ ایس لئی اوہنے یسوع نُوں پچھیا: ”اُستاد، سب توں وڈا* حکم کیہڑا اے؟“
29 یسوع نے جواب دِتا: ”سب توں وڈا حکم ایہہ وے: ”اَے اِسرائیلیو سُنو، یہوواہ* ساڈا خدا اے۔ صرف اِک ای یہوواہ اے
30 تے تُوں یہوواہ اپنے خدا نال اپنے سارے دل، اپنی ساری جان، اپنی ساری عقل تے اپنی ساری طاقت نال پیار کر۔“
31 دُوجا حکم ایہہ وے: ”تُوں اپنے گوانڈھی نال اُنج ای پیار کر جیویں تُوں اپنے آپ نال کرنا ایں۔“ ایہناں توں وڈا حکم ہور کوئی نئیں اے۔“
32 شریعت دے عالم نے کہیا: ”اُستاد، تُوں بالکل سچ کہیا اے کہ ”صرف اوہی خدا اے تے اوہدے سوا ہور کوئی خدا نئیں۔“
33 تے ساریاں قربانیاں* نالوں زیادہ اہم ایہہ وے کہ اِک بندہ اپنے سارے دل، اپنی ساری سمجھ تے اپنی ساری طاقت نال اوہنوں پیار کرے تے اپنے گوانڈھی نال اُنج ای پیار کرے جیویں اوہ اپنے آپ نال کردا اے۔“
34 یسوع نے ویکھیا کہ اوہنے سمجھداری نال جواب دِتا اے، ایس لئی اوہنے اوہنوں کہیا: ”تُوں خدا دی بادشاہی توں بوہتا دُور نئیں ایں۔“ ایہدے بعد کسے ہور نے اوہنوں سوال پچھن دی جرأت نہ کیتی۔
35 پر یسوع ہیکل چ تلیم دیندا رہیا تے اوہنے لوکاں نُوں پچھیا: ”شریعت دے عالم ایہہ کیوں کہندے نیں کہ مسیح داؤد دا پُتر اے؟
36 جد کہ پاک روح دی رہنمائی چ داؤد نے کہیا کہ ”یہوواہ* نے میرے مالک نُوں کہیا: ”تُوں اوہدوں تک میرے سجے ہتھ بہہ جدوں تک مَیں تیرے دُشمناں نُوں تیرے پیراں ہیٹھاں نہ کر دَواں۔“
37 جے داؤد آپ اوہنوں مالک کہندا اے تے فیر اوہ اوہدا پُتر کیویں ہو سکدا اے؟“
بوہت سارے لوک بڑے شوق نال یسوع دِیاں گلاں سُن رہے سن۔
38 یسوع نے تلیم دیندے ہوئیاں ایہہ وی کہیا: ”شریعت دے عالماں توں خبردار رہوو جیہڑے لمے لمے چوغے پا کے پھرنا پسند کردے نیں تے چاہندے نیں کہ بازاراں چ لوک اوہناں نُوں سلام کرن۔
39 اوہ عبادتگاہ چ سب توں اَگے تے دعوتاں چ خاص تھانواں تے بیٹھنا پسند کردے نیں۔
40 اوہ بیوہ عورتاں دے گھر* ہڑپ لیندے نیں تے دِکھاوے لئی لمیاں لمیاں دُعاواں کردے نیں۔ ایس لئی اوہناں نُوں ہور وی سخت سزا ملے گی۔“
41 فیر یسوع ہیکل چ اوس جگہ بہہ گیا جِتھے ہدیے دے ڈبے رکھے ہوئے سن۔ اوہ اوہناں لوکاں نُوں ویکھن لگ پیا جیہڑے ڈبیاں چ پیسے پا رہے سن۔ کئی امیر لوک آ کے بوہت سارے سِکّے پا رہے سن۔
42 اوتھے اِک غریب بیوہ وی آئی تے اوہنے دو چھوٹے سِکّے* پائے جنہاں دی قیمت بوہت ای گھٹ سی۔
43 یسوع نے اپنے شاگرداں نُوں کول بلا کے کہیا: ”مَیں توانوں سچ کہنا واں، جِنّے وی لوک ہدیے دے ڈبیاں چ پیسے پا رہے نیں، اوہناں ساریاں نالوں بوہتے پیسے ایس غریب بیوہ نے پائے نیں
44 کیونکہ اوہناں ساریاں نے اپنے وادھو پیسیاں چوں کجھ پیسہ پایا۔ پر ایس غریب بیوہ کول اپنے گزارے لئی جو کجھ وی سی اوہنے اوہ سارے دا سارا پا دِتا۔“
فٹ نوٹ
^ یونانی چ: ”کونے دا سِرا۔“
^ ”لفظاں دی وضاحت“ نُوں ویکھو۔
^ یونانی چ: ”قیصر۔“
^ یونانی چ: ”سب توں پہلا۔“
^ ”لفظاں دی وضاحت“ نُوں ویکھو۔
^ یاں، ”بھسم ہو جان والیاں تے باقی قربانیاں۔“
^ ”لفظاں دی وضاحت“ نُوں ویکھو۔
^ یاں، ”جائیداد۔“
^ یونانی چ: ”دو لپتون۔“
