کُلسّیوں دے ناں خط 1:1-29
1 مَیں پولُس، خدا دی مرضی نال مسیح یسوع دا رسول آں تے ساڈے بھرا تیمُتھیُس نال مِل کے
2 ایہہ خط اوہناں مُقدس لوکاں تے وفادار بھراواں نُوں لکھ رہیا واں جیہڑے کُلسّے چ رہندے نیں تے مسیح نال اِک مُٹھ نیں:
میری دُعا اے کہ ساڈا باپ خدا توانوں عظیم رحمت تے سلامتی بخشے۔
3 اَسی تواڈے لئی دُعا کردے ہوئیاں ساڈے مالک یسوع مسیح دے باپ یعنی خدا دا ہمیشاں شکر کرنے آں
4 کیونکہ اَسی سُنیا اے کہ تُسی مسیح یسوع تے ایمان رکھدے او تے سارے مُقدس لوکاں نال پیار کردے او۔
5 ایس ایمان تے پیار دی بنیاد ایہہ امید اے کہ تواڈے لئی اسمان تے انعام رکھیا گیا اے۔ توانوں ایس امید بارے اوہدوں پتہ چلیا سی
6 جدوں توانوں سچائی دا پیغام یعنی خوشخبری سُنائی گئی سی۔ جیس طرحاں ایہہ خوشخبری پوری دُنیا چ پھیل رہی اے تے پھل پیدا کر رہی اے، اوسے طرحاں ایہہ تواڈے چ وی پھل پیدا کر رہی اے۔ ایہہ اوس دن توں ہو رہیا اے جدوں توں تُسی خدا دی عظیم رحمت دی سچائی بارے سُنیا اے تے اوہنوں صحی طرحاں سمجھیا اے۔
7 ایس عظیم رحمت بارے تُسی ساڈے پیارے ہمخدمت اِپَفراس کولوں سُنیا اے جیہڑا مسیح دے وفادار خادم دے طور تے ساڈی جگہ تواڈی مدد کر رہیا اے۔
8 اوہنے سانوں تواڈے پیار بارے وی دَسیا اے جیہڑا تُسی پاک روح دی مدد نال ظاہر کردے او۔
9 ایس لئی جدوں توں اَسی تواڈے ایمان تے پیار بارے سُنیا اے، اوہدوں توں اَسی لگاتار تواڈے بارے ایہہ دُعا کر رہے آں کہ تُسی اوہدی مرضی بارے صحی علم نال بھردے جاؤ تے سچی حکمت تے پاک روح دے ذریعے سمجھ حاصل کردے جاؤ۔
10 نالے دُعا اے کہ تواڈا چال چلن اوہو جیہا ہوئے جیہو جیہا یہوواہ دے خادماں دا ہونا چاہی دا اے تے تُسی اوہنوں پوری طرحاں خوش کر سکو تے ہر طرحاں دا چنگا کم کر کے پھل لیاندے رہوو تے خدا بارے صحی علم چ ودھدے جاؤ۔
11 ساڈی ایہہ وی دُعا اے کہ تُسی اوہدی عظیم طاقت دے ذریعے زور حاصل کردے جاؤ تے پوری طرحاں تگڑے ہوندے جاؤ تاکہ تُسی صبر تے خوشی نال سب کجھ برداشت کر سکو
12 تے باپ دا شکر کردے رہوو جنہے توانوں اوس وراثت چ شامل ہون دے لائق بنایا اے جیہڑی روشنی چ چلن والے* مُقدس لوکاں نُوں ملے گی۔
13 اوہ سانوں نھیرے دے قبضے* چوں چھڈا کے اپنے پیارے پُتر دی بادشاہی چ لے آیا۔
14 اوہنے فدیہ دے کے سانوں چھڈایا یعنی ساڈے گُناہواں نُوں معاف کیتا۔
15 خدا نُوں ویکھیا نئیں جا سکدا پر اوہدا پہلوٹھا پُتر ہوبہو اوہدے ورگا اے۔ اوہنوں ساریاں چیزاں توں پہلے بنایا گیا۔
16 اوہدے ای ذریعے اسمان تے زمین دِیاں ساریاں چیزاں بنائیاں گئیاں یعنی نظر آن والیاں چیزاں تے نظر نہ آن والیاں چیزاں، بھانویں اوہ تخت ہون یاں مرتبے یاں حکومتاں یاں اِختیار۔ ساریاں چیزاں اوہدے ذریعے تے اوہدے لئی بنائیاں گئیاں۔
17 نالے اوہ ساریاں چیزاں دے بنن توں پہلاں موجود سی تے ساریاں چیزاں اوہدے ای ذریعے بنائیاں گئیاں۔
18 اوہ جسم دا سِر یعنی کلیسیا دا سربراہ اے۔ اوہ ساریاں چیزاں دی شروعات اے۔ اوہ مُردیاں وچوں زندہ ہون والیاں چوں پہلوٹھا اے تاکہ اوہی ساریاں چیزاں چ پہلا ٹھہرے
19 کیونکہ خدا چاہندا سی کہ پُتر ہر لحاظ نال مکمل ہووے
20 تے اوہدے ذریعے خدا دی ساریاں* نال صلح ہو جائے، بھانویں اوہ زمین تے ہون یاں اسمان تے۔ ایہہ صلح یسوع دے خون دے ذریعے ہوئی جیہڑا سُولی* تے وَگیا۔
21 اِک زمانے چ تُسی خدا توں دُور سو تے اوہدے دُشمن سو کیونکہ تواڈا ذہن بھیڑے کماں وَل لگیا ہویا سی۔
22 پر ہُن خدا نے یسوع دی موت دے ذریعے تواڈے نال صلح کر لئی اے جنہے تواڈے لئی اپنا جسم قربان کیتا تاکہ تُسی خدا دے حضور پاک، بےداغ تے بے اِلزام ہووو۔
23 پر ایہدے لئی ضروری اے کہ تواڈا ایمان مضبوط رہوے، تُسی نِیہہ تے قائم رہوو تے ڈٹے رہوو۔ اوس امید نُوں کدی نہ چھڈو جیہڑی خوشخبری دے ذریعے توانوں ملی اے تے جدی مُنادی اسمان دے تھلے ہر جگہ تے ہو گئی اے۔ مَیں پولُس ایسے خوشخبری دی مُنادی کرن لئی خادم بنیا واں۔
24 مینوں تواڈی خاطر دُکھ سہہ کے خوشی ہوندی اے۔ مینوں پتہ اے کہ مینوں مسیح دے جسم یعنی کلیسیا دی خاطر حالے ہور وی دُکھ سہنے پین گے۔
25 مَیں کلیسیا دا خادم ایس لئی بنیا واں کیونکہ مینوں خدا وَلّوں ایہہ ذمےداری ملی اے کہ مَیں تواڈے فائدے لئی خدا دے کلام دی چنگی طرحاں مُنادی کراں
26 یعنی مَیں اوس مُقدس راز بارے دَساں جیہڑا پرانے زمانے دے لوکاں تے پچھلیاں پُشتاں توں چھپا کے رکھیا گیا سی۔ پر ہُن ایہہ راز اوہدے مُقدس لوکاں نُوں دَس دِتا گیا اے
27 کیونکہ خدا اوہناں نُوں وکھانا چاہندا سی کہ ایہہ مُقدس راز بوہت ای عظیم تے قیمتی اے تے ایہدے بارے غیریہودیاں نُوں وی دَسیا جا رہیا اے۔ راز ایہہ سی کہ مسیح تواڈے نال اِک مُٹھ اے جدی وجہ توں تُسی امید رکھ سکدے او کہ توانوں اوہدے نال شان ملے گی۔
28 اَسی اوہدی ای مُنادی کر رہے آں تے ساریاں نُوں نصیحت کر رہے آں تے پوری سمجھداری نال تلیم دے رہے آں تاکہ اَسی مسیح دے سارے شاگرداں دی پُختہ بنن چ مدد کر سکئے۔
29 ایس لئی مَیں سخت محنت کر رہیا واں تے اپنی پوری وا لا کے اوہدی طاقت دے ذریعے کم کر رہیا واں جیہڑی مینوں اندروں تگڑا کر دی اے۔
فٹ نوٹ
^ یاں، ”خدا دی رہنمائی چ چلن والے۔“
^ یونانی چ: ”اِختیار۔“
^ یونانی چ: ”ساریاں چیزاں۔“
^ ”لفظاں دی وضاحت“ نُوں ویکھو۔
