یوحنا دی اِنجیل 8‏:‏12‏-‏59

  • یسوع بارے باپ دی گواہی ‏(‏12-‏30‏)‏

    • یسوع، ”‏دُنیا دا چانن“‏ ‏(‏12‏)‏

  • ابراہام دی اولاد ‏(‏31-‏41‏)‏

    • ‏”‏سچائی توانوں آزاد کرے گی“‏ ‏(‏32‏)‏

  • اِبلیس دی اولاد ‏(‏42-‏47‏)‏

  • یسوع تے ابراہام ‏(‏48-‏59‏)‏

8  12  یسوع نے اِک وار فیر لوکاں نُوں کہیا:‏ ”‏مَیں دُنیا دا چانن آں۔ جیہڑا میرے پچھے پچھے آندا اے، اوہ کدی وی نھیرے چ نئیں چلے گا سگوں اوہدے کول زندگی دا چانن ہوئے گا۔“‏ 13  پر فریسیاں نے اوہنوں کہیا:‏ ”‏تُوں اپنے بارے گواہی آپ دینا ایں۔ ایس لئی تیری گواہی سچی نئیں اے۔“‏ 14  یسوع نے اوہناں نُوں جواب دِتا:‏ ”‏بے‌شک مَیں اپنے بارے گواہی آپ دے رہیا واں۔ پر میری گواہی سچی اے کیونکہ مینوں پتہ اے کہ مَیں کتھوں آیا واں تے کتھے جا رہیا واں۔ پر توانوں نئیں پتہ کہ مَیں کتھوں آیا واں تے کتھے جا رہیا واں۔ 15  تُسی انساناں دے معیاراں مطابق دُوجیاں نُوں قصوروار ٹھہراندے او۔ پر مَیں کسے نُوں قصوروار نئیں ٹھہراندا۔ 16  جے مَیں کسے نُوں قصوروار ٹھہرانا وی آں تے ایہہ بالکل صحی ہوندا اے کیونکہ مَیں کلّا نئیں سگوں میرا باپ میرے نال اے جنہے مینوں گھلیا اے۔ 17  نالے تواڈی اپنی شریعت چ وی لکھیا اے کہ ”‏دو بندیاں دی گواہی سچی ہوندی اے۔“‏ 18  اِک تے مَیں اپنے بارے گواہی دینا واں تے دُوجا میرا باپ میرے بارے گواہی دیندا اے، جنہے مینوں گھلیا اے۔“‏ 19  پر اوہناں نے اوہنوں پچھیا:‏ ”‏تیرا باپ کتھے وے؟“‏ یسوع نے جواب دِتا:‏ ”‏تُسی نہ تے مینوں جان دے او تے نہ ای میرے باپ نُوں۔ جے تُسی مینوں جان دے ہوندے تے توانوں میرے باپ دا وی پتہ ہوندا۔“‏ 20  یسوع نے ایہہ گلاں ہیکل چ اوس جگہ تلیم دیندے ہوئیاں کہیاں جِتھے ہدیے دے ڈبے رکھے جاندے سن۔ پر کسے نے وی اوہدے تے ہتھ نہ پایا کیونکہ حالے اوہدا ویلا نئیں آیا سی۔‏ 21  ایس لئی یسوع نے اوہناں نُوں فیر کہیا:‏ ”‏مَیں جا رہیا واں۔ تُسی مینوں لبھدے پھرو گے پر اپنے گُناہواں دی وجہ توں مر جاؤ گے۔ جِتھے مَیں جا رہیا واں تُسی اوتھے نئیں آ سکدے۔“‏ 22  یہودی کہن لگ پئے:‏ ”‏کِتے ایہہ اپنے آپ نُوں مارن تے نئیں لگا؟ کیونکہ ایہہ کہہ رہیا اے کہ ”‏جِتھے مَیں جا رہیا واں، تُسی اوتھے نئیں آ سکدے۔“‏“‏ 23  یسوع نے اوہناں نُوں کہیا:‏ ”‏تُسی زمین دے او، مَیں اسمان دا واں۔‏*‏ تُسی ایس دُنیا دے او، مَیں ایس دُنیا دا نئیں آں۔ 24  ایس لئی مَیں توانوں کہیا اے کہ ”‏تُسی اپنے گُناہواں دی وجہ توں مر جاؤ گے“‏ کیونکہ جے تُسی یقین نئیں کردے کہ مَیں اوہی آں جنہے آنا سی تے تُسی اپنے گُناہواں دی وجہ توں مر جاؤ گے۔“‏ 25  ایس لئی اوہ یسوع نُوں پچھن لگ پئے:‏ ”‏تُوں ہے کون؟“‏ یسوع نے کہیا:‏ ”‏تواڈے نال تے گل کرن دا کوئی فائدہ نئیں۔ 26  مَیں تواڈے بارے بوہت ساریاں گلاں کہنا چاہنا واں تے بوہت ساریاں گلاں دا فیصلہ کرنا حالے باقی اے۔ اصل چ جنہے مینوں گھلیا اے، اوہ سچا اے۔ تے جیہڑیاں گلاں مَیں اوہدے کولوں سُنیاں نیں، مَیں اوہی دُنیا نُوں دَس رہیا واں۔“‏ 27  پر اوہناں نُوں ایہہ سمجھ نہ آیا کہ اوہ اوہناں نال اسمانی باپ بارے گل کر رہیا اے۔ 28  ایس لئی یسوع نے کہیا:‏ ”‏جدوں تُسی انسان دے بیٹے*‏ نُوں سُولی تے چڑھا دَوو گے تے اوہدوں توانوں پتہ چلے گا کہ مَیں کون آں تے مَیں اپنی مرضی نال کجھ وی نئیں کردا سگوں میرے باپ نے جو مینوں سکھایا اے، اوہی مَیں دُوجیاں نُوں سکھانا واں۔ 29  جنہے مینوں گھلیا اے، اوہ میرے نال اے۔ اوہنے مینوں کلّا نئیں چھڈیا کیونکہ مَیں ہمیشاں اوہی کم کرنا واں جنہاں توں اوہ خوش ہوندا اے۔“‏ 30  یسوع دِیاں ایہہ گلاں سُن کے بوہت سارے لوک اوہدے تے ایمان لے آئے۔‏ 31  فیر یسوع نے اوہناں یہودیاں نُوں جیہڑے اوہدے تے ایمان لیائے سن، کہیا:‏ ”‏جے تُسی میریاں گلاں تے عمل کردے رہوو گے تے تُسی واقعی میرے شاگرد ہووو گے 32  تے تُسی سچائی نُوں جان جاؤ گے تے سچائی توانوں آزاد کرے گی۔“‏ 33  باقیاں نے اوہنوں جواب دِتا:‏ ”‏اَسی ابراہام دی اولاد آں۔ اَسی کدی کسے دی غلامی نئیں کیتی۔ تے فیر تُوں ایہہ کیوں کہہ رہیا ایں کہ ”‏تُسی آزاد ہو جاؤ گے“‏؟“‏ 34  یسوع نے اوہناں نُوں جواب دِتا:‏ ”‏مَیں توانوں سچ کہنا واں، جیہڑا وی انسان گُناہ کردا اے، اوہ گُناہ دا غلام ہوندا اے۔ 35  نالے غلام ہمیشاں مالک دے گھر نئیں رہندا پر پُتر ہمیشاں رہندا اے۔ 36  ایس لئی جے پُتر توانوں آزاد کردا اے تے تُسی سچ مچ آزاد ہووو گے۔ 37  مینوں پتہ اے کہ تُسی ابراہام دی اولاد او۔ پر تُسی مینوں جانوں مارنا چاہندے او کیونکہ میریاں گلاں دا تواڈے تے کوئی اثر نئیں ہو رہیا۔ 38  مَیں اوہی گلاں دَسنا واں جیہڑیاں مَیں اوس ویلے ویکھیاں سن جدوں مَیں اپنے باپ دے نال ساں۔ پر تُسی اوہ کم کردے او جیہڑے تواڈے پیو نے توانوں سکھائے نیں۔“‏ 39  اوہناں نے اوہنوں جواب دِتا:‏ ”‏ساڈا پیو ابراہام اے۔“‏ یسوع نے اوہناں نُوں کہیا:‏ ”‏جے تُسی ابراہام دی اولاد ہوندے تے اوہدے ورگے کم وی کردے۔ 40  پر تُسی تے مینوں جانوں مارنا چاہندے او حالانکہ مَیں توانوں اوہ سچائی دَس رہیا واں جیہڑی مَیں خدا کولوں سُنی اے۔ ابراہام تے کدی وی اِنج نہ کردا۔ 41  تُسی اپنے پیو ورگے کم کردے او۔“‏ اوہناں نے کہیا:‏ ”‏اَسی ناجائز اولاد نئیں آں۔ ساڈا باپ اِک ای اے یعنی خدا۔“‏ 42  یسوع نے اوہناں نُوں کہیا:‏ ”‏جے خدا تواڈا باپ ہوندا تے تُسی میرے نال پیار کردے کیونکہ خدا نے مینوں گھلیا اے۔ مَیں اپنی مرضی نال نئیں آیا سگوں اوہنے ای مینوں گھلیا اے۔ 43  پتہ اے توانوں میریاں گلاں کیوں نئیں سمجھ آندیاں؟ کیونکہ تُسی میریاں گلاں تے یقین کرنا ای نئیں چاہندے۔ 44  تواڈا پیو اِبلیس اے تے تُسی اپنے پیو دِیاں خواہشاں نُوں پورا کرنا چاہندے او۔ جدوں اوہ غلط راہ تے پے گیا تے اوہ خونی بن گیا*‏ تے سچائی تے قائم نئیں رہیا کیونکہ اوہدے چ سچائی ہے ای نئیں۔ اوہ اپنی فطرت دے مطابق جھوٹھ بولدا اے کیونکہ اوہ جھوٹھا اے سگوں جھوٹھ دا پیو اے۔ 45  پر مَیں توانوں سچیاں گلاں دَسنا واں فیر وی تُسی میرا یقین نئیں کردے۔ 46  تواڈے وچوں کون مینوں قصوروار ثابت کر سکدا اے؟ جے مَیں سچ بولنا واں تے فیر تُسی میریاں گلاں تے یقین کیوں نئیں کردے؟ 47  جیس بندے دا باپ خدا اے، اوہ خدا دِیاں گلاں سُن دا اے۔ پر تُسی اوہدیاں گلاں نئیں سُن دے کیونکہ خدا تواڈا باپ نئیں اے۔“‏ 48  یہودیاں نے یسوع نُوں کہیا:‏ ”‏اَسی ٹھیک ای کہنے آں کہ ”‏تُوں سامری ایں تے تینوں کوئی باغی فرشتہ چِمبڑیا ہویا اے۔“‏“‏ 49  یسوع نے کہیا:‏ ”‏مینوں کوئی باغی فرشتہ نئیں چِمبڑیا ہویا۔ مَیں اپنے باپ دی عزت کرنا واں۔ پر تُسی میری بے‌عزتی کردے او۔ 50  پر مَیں اپنی وڈیائی نئیں چاہندا سگوں خدا میری وڈیائی چاہندا اے تے اوہی انصاف کرن والا اے۔ 51  مَیں توانوں سچ کہنا واں، جیہڑا میریاں گلاں تے عمل کردا اے، اوہ موت نُوں کدی نئیں ویکھے گا۔“‏ 52  یہودیاں نے اوہنوں کہیا:‏ ”‏ہُن تے سانوں پکا یقین ہو گیا اے کہ تینوں کوئی باغی فرشتہ چِمبڑیا ہویا اے۔ ابراہام مر گیا نالے سارے نبی وی مر گئے۔ پر تُوں کہنا ایں کہ ”‏جیہڑا میریاں گلاں تے عمل کرے گا، اوہ کدی نئیں مرے گا۔“‏ 53  کیہہ تُوں ساڈے پیو ابراہام نالوں وی وڈا ایں؟ اوہ وی مر گیا نالے سارے نبی وی مر گئے۔ تُوں اپنے آپ نُوں سمجھنا کیہہ ایں؟“‏ 54  یسوع نے جواب دِتا:‏ ”‏جے مَیں آپ اپنی وڈیائی کراں تے میری وڈیائی کھوکھلی اے۔ میرا باپ میری وڈیائی کردا اے جنہوں تُسی اپنا خدا کہندے او۔ 55  تُسی اوہنوں نئیں جان دے۔ پر مَیں اوہنوں جاننا واں۔ جے مَیں کہواں کہ مَیں اوہنوں نئیں جان دا تے فیر مَیں وی تواڈے وانگوں جھوٹھا واں۔ پر مَیں اوہنوں جاننا واں تے اوہدیاں گلاں تے عمل کرنا واں۔ 56  تواڈا پیو ابراہام ایس گلوں بڑا خوش سی کہ اوہ میرا دن ویکھے گا تے اوہ میرا دن ویکھ کے بڑا خوش ہویا۔“‏ 57  یہودیاں نے اوہنوں کہیا:‏ ”‏تُوں تے حالے 50 سالاں دا وی نئیں ہویا فیر تُوں ابراہام نُوں کیویں ویکھ لیا؟“‏ 58  یسوع نے اوہناں نُوں کہیا:‏ ”‏مَیں توانوں سچ کہنا واں، ابراہام دے پیدا ہون توں پہلاں مَیں موجود ساں۔“‏ 59  ایہہ سُن کے اوہناں نے یسوع نُوں مارن لئی پتھر چُکے۔ پر اوہ لُک گیا تے ہیکل چوں باہر نکل گیا۔‏

فٹ نوٹ

^ یونانی چ‏:‏ ”‏تُسی ہیٹھاں دے او، مَیں اُتے دا واں۔“‏
^ ‏”‏لفظاں دی وضاحت“‏ نُوں ویکھو۔‏
^ یاں، ”‏شروع توں ای خونی اے۔“‏
پاک کلام—‏ترجمہ نوِیں دُنیا
یوحنا 8
پنجابی (شاہ مُکھی)
بائبل نُوں آن‌لائن پڑھو
https://cms-imgp.jw-cdn.org/img/p/1001061103/univ/art/1001061103_univ_sqr_xl.jpg
twn