1، 2.‏ (‏الف)‏سانوں خاص طور تے کدوں کسے نُوں معاف کرنا مشکل لگ سکدا اے؟ (‏ب)‏بھین تانیہ نے معاف کرن دی شاندار مثال کیویں قائم کیتی؟‏

 کیہہ توانوں کسے نُوں معاف کرنا مشکل لگدا اے؟ ساڈے وچوں زیادہ تر نُوں اِنج ای لگدا اے، خاص کر اوس ویلے جدوں کوئی بندہ اپنیاں گلاں یاں اپنے کماں توں ساڈا بوہت دل دُکھاندا اے۔ پر اَسی اپنے دل تے لگے زخم نُوں بھر سکنے آں تے دُوجیاں نُوں معاف کر سکنے آں۔ ایہدے بارے ذرا بھین تانیہ a دی مثال تے غور کرو۔ 2017 چ بھین تانیہ تے اوہدے گھر والے یہوواہ دے گواہواں دے نویں ہیڈ کوارٹر نُوں ویکھن گئے۔ جدوں اوہ اپنے گھر واپس جا رہے سن تے سڑک تے اِک ہور بندہ گڈی چلا رہیا سی تے اچانک اوہدی گڈی قابو توں باہر ہو گئی تے اوہناں دی گڈی نال ٹکرا گئی۔ ایس حادثے چ بھین تانیہ بے‌ہوش ہو گئی۔ جدوں اوہ ہوش چ آئی تے اوہنوں پتہ چلیا کہ اوہدے بچیاں نُوں بڑیاں بھیڑیاں سٹاں لگیاں نیں تے اوہدا شوہر برائن فوت ہو گیا اے۔ اوس وقت نُوں یاد کردے ہوئے بھین تانیہ کہندی اے:‏ ”‏مَیں بالکل ٹُٹ گئی تے مینوں سمجھ نئیں آ رہی سی کہ میرے نال ہو کیہہ گیا اے۔“‏ بعد چوں بھین تانیہ نُوں پتہ چلیا کہ جیس بندے دی گڈی توں اوہناں دا ایکسیڈنٹ ہویا سی، اوہ اپنے پورے ہوش چ گڈی چلا رہیا سی۔ ایہہ جانن توں بعد بھین نے یہوواہ کولوں دُعا کیتی کہ اوہ اوہنوں تسلی تے سکون دَوے۔‏

² اوس ڈرائیور نُوں گرفتار کر لیا گیا۔ جے عدالت اوہنوں مُجرم ٹھہراندی تے اوہنوں جیل ہو سکدی سی۔ پر عدالت چوں اِک بندے نے بھین تانیہ نُوں دَسیا کہ اوہ جیہڑا بیان دَوے گی، اوہدی بِنا تے جج اپنا فیصلہ سُنائے گا۔ بھین تانیہ نے کہیا:‏ ”‏مینوں اِنج لگیا جیویں کسے نے میرے زخماں نُوں تازہ کر دِتا ہوئے تے ایہناں تے ڈھیر سارا نمک پا دِتا ہوئے۔ اوہ واقعہ فیر توں میریاں اَکھاں دے سامنے آگیا۔“‏ کجھ ہفتیاں بعد بھین تانیہ عدالت چ اپنا بیان دین گئی تے اوتھے اوہ بندہ وی موجود سی جدی وجہ توں اوہدا خاندان مصیبت چوں لنگھ رہیا سی۔ بھین تانیہ نے کیہہ کہیا؟ اوہنے جج نُوں کہیا کہ اوہ اوس بندے تے رحم کرے۔‏ b بھین تانیہ  دی ایہہ گل سُن کے جج دِیاں اَکھاں چ اتھرو آ گئے۔ اوہنے کہیا:‏ ”‏مَیں 25 سالاں توں جج دے طور تے کم کر رہیا واں پر مَیں کدی ایہہ نئیں ویکھیا کہ جیس بندے دے خلاف جُرم ہویا اے، اوہ مُجرم لئی رحم دی درخاست کر رہیا اے۔ مَیں محبت تے معاف کرن دی اینی ودھیا مثال پہلاں کدی نئیں ویکھی۔“‏

3.‏ بھین تانیہ نے معاف کرن دا فیصلہ کیوں کیتا؟‏

³ کیہڑی چیز نے معاف کرن چ بھین تانیہ دی مدد کیتی؟ اوہنے ایس گل تے سوچ وچار کیتا کہ یہوواہ وی تے معاف کردا اے۔ (‏میکاہ 7:‏18‏)‏ جدوں اَسی اپنے دل چ ایس گل لئی قدر ودھانے آں کہ یہوواہ نے سانوں کیویں معاف کیتا اے تے اَسی وی دُوجیاں نُوں معاف کر پانے آں۔‏

4.‏ یہوواہ ساڈے کولوں کیہہ چاہندا اے؟ (‏اِفسیوں 4:‏32‏)‏

⁴ یہوواہ چاہندا اے کہ اَسی اوہدے وانگوں دُوجیاں نُوں دِلوں معاف کرئیے۔ ‏(‏اِفسیوں 4:‏32 نُوں پڑھو۔)‏ اوہ ساڈے کولوں ایہہ توقع کردا اے کہ اَسی اوہناں لوکاں نُوں معاف کرن لئی تیار رہیے جیہڑے سانوں تکلیف پونچاندے نیں۔ (‏زبور 86:‏5؛‏ لُوقا 17:‏4‏)‏ ایس مضمون چ اَسی تِن مشوریاں تے غور کراں گے جیہڑے دُوجیاں نُوں معاف کرن چ ساڈی مدد کرن گے۔‏

اپنے جذباتاں نُوں نظر انداز نہ کرو

5.‏ اَمثال 12:‏18 دے مطابق جدوں کوئی سانوں تکلیف پونچاندا اے تے سانوں کیہو جیہا لگدا اے؟‏

⁵ شاید سانوں اوس ویلے بڑا دُکھ ہوئے جدوں کوئی بندہ اپنیاں گلاں یاں کماں توں سانوں تکلیف پونچاندا اے، خاص کر اوہدوں جدوں اوہ بندہ ساڈا قریبی دوست یاں ساڈے گھر دا کوئی جی ہووے۔ (‏زبور 55:‏12-‏14‏)‏ کدی کدار ایہہ درد ایناں شدید ہوندا اے کہ سانوں اِنج لگ سکدا اے جیویں کسے نے ساڈے سینے چ چھرا کھوب دِتا اے۔ ‏(‏اَمثال 12:‏18 نُوں پڑھو۔)‏ شاید اَسی اپنے درد نُوں دبان یاں ایہنوں نظر انداز کرن دی کوشش کرئیے۔ پر ایہہ اِنج ای ہوئے گا جیویں اَسی اوس چھرے نُوں اپنے سینے چ ای رہن دِتا اے۔ اِنج تے ساڈا زخم کدی وی نئیں بھرے گا۔ اَسی ایہہ توقع نئیں کر سکدے کہ اپنے جذباتاں نُوں نظر انداز کرن نال اَسی اپنے آپ ٹھیک ہو جاواں گے۔‏

6.‏ جدوں کوئی ساڈا دل دُکھاندا اے تے شاید اَسی کیہہ کرئیے؟‏

⁶ جدوں کوئی ساڈا دل دُکھاندا اے تے شاید سانوں بڑا غصہ آئے۔ بائبل چ دَسیا گیا اے کہ سانوں غصہ آ سکدا اے۔ پر ایہدے چ ایس گل توں وی خبر دار کیتا گیا اے کہ سانوں غصے نُوں اپنے اُتے حاوی نئیں ہون دینا چاہی دا۔ (‏زبور 4:‏4؛‏ اِفسیوں 4:‏26‏)‏ پر کیوں؟ کیونکہ ساڈے جذباتاں دا ساڈے کماں تے اثر ہوندا اے تے غصہ کرن دے بھیڑے نتیجے نکلدے نیں۔ (‏یعقوب 1:‏20‏)‏ یاد رکھو کہ سانوں غصہ آ سکدا اے پر ایہنوں دِلوں کڈھنا یاں نہ کڈھنا ساڈا فیصلہ ہوندا اے۔‏

7.‏ جدوں کوئی سانوں تکلیف پونچاندا اے تے سانوں ہور کیہہ محسوس ہو سکدا اے؟‏

⁷ جدوں کوئی سانوں تکلیف پونچاندا اے تے ساڈے اندر ہور وی کئی طرحاں دے جذبات پیدا ہوندے نیں۔ مثال لئی، بھین این نے کہیا:‏ ”‏جدوں مَیں چھوٹی ساں تے میرے ابو نے میری امی نُوں چھڈ کے میری آیا نال شادی کر لئی۔ مَیں بوہت کلّا محسوس کرن لگ پئی تے جدوں ابو دے اوس عورت توں بچے ہوئے تے مینوں اِنج لگیا جیویں اوہناں نے میری جگہ لے لئی اے۔ بچپن توں ای مینوں ایہہ محسوس ہوندا سی کہ کسے نُوں میری ضرورت نئیں اے۔“‏ ذرا بھین جارجٹ دی مثال تے غور کرو جدے شوہر نے اوہدے نال بے‌وفائی کیتی سی۔ بھین نے دَسیا:‏ ”‏مَیں تے میرا شوہر بچپن دے دوست ساں۔ اَسی مِل کے پہل‌کار دے طور تے خدمت کیتی سی۔ پر اوہنے میرے دل نُوں چیر کے رکھ دِتا۔“‏ بھین نعومی نے کہیا:‏ ”‏مَیں کدی سوچیا وی نئیں سی کہ میرا شوہر میرا ایناں زیادہ دل دُکھائے گا۔ جدوں اوہنے مینوں دَسیا کہ اوہ چھپ کے گندیاں تصویراں تے فلماں ویکھدا رہیا اے تے مینوں اِنج لگیا جیویں مَیں تے دھوکھے چ رہی آں۔“‏

8.‏ (‏الف)‏سانوں کیہڑیاں گلاں دی وجہ توں دُوجیاں نُوں معاف کرنا چاہی دا اے؟ (‏ب)‏دُوجیاں نُوں معاف کرن توں سانوں کیہڑے فائدے ہوندے نیں؟ (‏ایس بکس نُوں ویکھو:‏ ‏”‏ جے سانوں کوئی تکلیف پونچاندا اے تے اَسی کیہہ کر سکنے آں؟‏‏“‏‏)‏

⁸ دُوجے جو کجھ وی کردے یاں کہندے نیں، اوہ ساڈے ہتھ چ نئیں اے۔ پر بدلے چ اَسی کیہو جیہا رویہ ظاہر کراں گے، ایہہ ساڈے ہتھ چ وے۔ تے دُوجیاں نُوں معاف کر دینا ای اکثر سب توں چنگا ہوندا اے۔ پر کیوں؟ کیونکہ اَسی یہوواہ نُوں پیار کرنے آں تے اوہ چاہندا اے کہ اَسی دُوجیاں نُوں معاف کرئیے۔ جے اَسی ناراض رہواں گے تے معاف نئیں کراں گے تے ہو سکدا اے کہ اَسی بے‌وقوفی چ کوئی ایہو جیہا کم کر بیٹھئے  جدی وجہ توں سانوں نقصان ہوئے۔ (‏اَمثال 14:‏17،‏ 29، 30‏)‏ ایس بارے ذرا بھین کرسٹین دی مثال تے غور کرو۔ اوہ کہندی اے:‏ ”‏جدوں میرے دل چ کسے لئی ناراضگی ہوندی اے تے مَیں گھٹ ای مسکرانی آں، ایہو جہے کھانے کھانی آں جیہڑے صحت لئی چنگے نئیں ہوندے تے صحی طرحاں سوں وی نئیں پاندی۔ میرے لئی اپنے جذباتاں تے قابو پانا وی مشکل ہوندا اے۔ ایہدی وجہ توں میری شادی‌شُدہ زندگی تے دُوجیاں نال میرے تعلقات تے بھیڑا اثر پیندا اے۔“‏

9.‏ سانوں اپنے دل چوں غصہ کیوں کڈھ دینا چاہی دا اے؟‏

⁹ جے اگلا بندہ ساڈے کولوں معافی نئیں وی منگدا تے فیر وی اَسی اپنی تکلیف نُوں گھٹا سکنے آں۔ پر کیویں؟ ذرا فیر توں بھین جارجٹ دی مثال تے غور کرو۔ اوہ کہندی اے:‏ ”‏میری تے میرے شوہر دی طلاق ہو گئی۔ سچ اے کہ مینوں اپنے دل چوں اوہدے لئی ناراضگی تے غصے نُوں کڈھن چ وقت لگیا۔ پر اِنج کرن نال مینوں بوہت سکون مِلیا۔“‏ جدوں اَسی اپنے دل چوں غصہ کڈھ دینے آں تے اَسی اپنے دل چ ایہدے زہر نُوں پھیلن توں روک رہے ہُنے آں۔ اِنج کرن نال اَسی اپنا ای بھلا کر رہے ہُنے آں کیونکہ اِنج اَسی پرانیاں گلاں نُوں چھڈ کے اَگے ودھن تے فیر توں خوش رہن دے قابل ہنے آں۔ (‏اَمثال 11:‏17‏)‏ پر جے اپنے جذباتاں نُوں سمجھن دے بعد وی تواڈا دل معاف کرن لئی تیار نئیں اے تے تُسی کیہہ کر سکدے او؟‏

اپنے دل چوں غصہ تے ناراضگی کڈھ دَوو

10.‏ سانوں اپنے دل چوں غصے تے ناراضگی نُوں کڈھن لئی اپنے آپ نُوں وقت کیوں دینا چاہی دا اے؟ (‏تصویراں نُوں وی ویکھو۔)‏

¹⁰ تُسی اپنے دل تے لگے زخم نُوں کیویں بھر سکدے او؟ اِنج کرن دا اِک طریقہ ایہہ وے کہ ایس زخم نُوں بھرن لئی وقت دَوو۔ جدوں کسے بندے نُوں کوئی بڑی بھیڑی سٹ لگدی اے تے اوہدے زخم نُوں بھرن چ وقت لگدا اے۔ ایسے طرحاں ساڈے دل تے لگے زخماں نُوں وی بھرن چ وقت لگدا اے۔ ایہدے بعد ای اَسی کسے نُوں دِلوں معاف کرن لئی تیار ہو سکاں گے۔—‏واعظ 3:‏3؛‏ 1-‏پطرس 1:‏22‏۔‏

11.‏ دُعا کرن نال سانوں دُوجیاں نُوں معاف کرن چ مدد کیویں مِلدی اے؟‏

¹¹ دُعا چ یہوواہ نُوں کہوو کہ اوہ دُوجیاں نُوں معاف کرن چ تواڈی مدد کرے۔‏ c بھین این جدا پہلاں وی ذکر ہویا اے،اوہنے کہیا:‏ ”‏مَیں یہوواہ کولوں دُعا کیتی کہ میرے تے میرے گھر والیاں کولوں جیہڑیاں غلطیاں ہوئیاں نیں، اوہ اوہناں نُوں معاف کر دَوے۔ فیر مَیں اپنے ابو تے سوتیلی ماں  نُوں خط لکھیا تے اوہناں نُوں دَسیا کہ مَیں اوہناں نُوں معاف کر دِتا اے۔“‏ بھین من دی اے کہ اِنج کرنا اوہدے لئی اسان نئیں سی۔ پر اوہنے کہیا:‏ ”‏مَیں یہوواہ وانگوں معاف کرن دی کوشش کیتی۔ مینوں امید اے کہ ایس وجہ توں میرے ابو تے میری سوتیلی ماں یہوواہ بارے سکھن دی کوشش کرن گے۔“‏

12.‏ سانوں اپنے دل دی بجائے یہوواہ تے بھروسا کیوں کرنا چاہی دا اے؟ (‏اَمثال 3:‏6،5‏)‏

¹² یہوواہ تے بھروسا رکھو نہ کہ اپنے دل تے۔ ‏(‏اَمثال 3:‏5، 6 نُوں پڑھو۔)‏ یہوواہ نُوں ہمیشاں پتہ ہوندا اے کہ ساڈے لئی کیہہ بہتر اے۔ (‏یسعیاہ 55:‏8، 9‏)‏ اوہ سانوں کدی وی کوئی ایہو جیہا کم کرن لئی نئیں کہندا جدے توں سانوں نقصان پونچے۔ ایس لئی جدوں اوہ سانوں کہندا اے کہ اَسی دُوجیاں نُوں معاف کرئیے تے اَسی ایس گل دا پکا یقین رکھ سکنے آں کہ اِنج کرن نال سانوں فائدہ ای ہوئے گا۔ (‏زبور 40:‏4؛‏ یسعیاہ 48:‏17، 18‏)‏ پر جے اَسی سوچاں گے کہ جو اَسی محسوس کرنے آں، اوہی صحی اے تے فیر اَسی کدی وی دُوجیاں نُوں معاف نئیں کر سکاں گے۔ (‏اَمثال 14:‏12؛‏ یرمیاہ 17:‏9‏)‏ بھین نعومی جدا پہلاں وی ذکر ہویا اے، اوہنے کہیا:‏ ”‏میرے شوہر نے گندیاں تصویراں تے ویڈیوز ویکھ کے میرا بوہت دل دُکھایا سی۔ ایس لئی شروع شروع چ مینوں لگیا کہ اوہنوں معاف نہ کرنا بالکل صحی اے۔ مینوں ڈر سی کہ جے مَیں اوہنوں معاف کر دِتا تے اوہ فیر توں میرا دل دُکھائے گا تے اوہنوں کدی وی ایس گل دا احساس نئیں ہوئے گا کہ اوہنے مینوں کِنّی تکلیف پونچائی اے۔ مَیں اپنے آپ نُوں ایہہ کہہ کے تسلی دینی ساں کہ یہوواہ تے میرے جذباتاں نُوں سمجھدا اے تے اوہنوں پتہ اے کہ مَیں اپنے شوہر نُوں کیوں نئیں معاف کر رہی۔ پر ہولی ہولی مَیں سمجھ گئی کہ بھانویں یہوواہ میرے جذباتاں نُوں سمجھدا اے پر ایہدا ایہہ مطلب نئیں کہ اوہدی نظر چ ایہہ صحی نیں۔ سچ اے کہ یہوواہ چنگی طرحاں جان دا اے کہ مَیں کیہو جیہا محسوس کرنی آں تے میرے دل تے لگے زخم نُوں بھرن چ وقت لگے گا پر اوہ ایہہ وی چاہندا اے کہ مَیں اپنے شوہر نُوں معاف کر دَواں۔“‏ d

چنگیاں گلاں بارے سوچو

13.‏ رومیوں 12:‏18-‏21 دے مطابق سانوں کیہہ کرن دی لوڑ اے؟‏

¹³ جے کسے نے ساڈا دل دُکھایا اے تے اوہنوں معاف کرن لئی صرف ایناں ای کافی نئیں کہ اَسی اوہدے نال اوس موضوع تے گل نہ کرئیے سگوں سانوں کجھ ہور وی کرن دی لوڑ اے۔ جے دل دُکھان والا بندہ ساڈا ہم‌ایمان اے تے ساڈا مقصد ایہہ ہونا چاہی دا اے کہ اَسی اوہدے نال صلح کرئیے۔ (‏متی 5:‏23، 24‏)‏ سانوں اپنے دل چ غصے دی بجائے رحم پیدا کرنا چاہی دا  اے تے اوس بندے توں ناراض ہون دی بجائے اوہنوں معاف کر دینا چاہی دا اے‏۔ (‏رومیوں 12:‏18-‏21 نُوں پڑھو؛‏ 1-‏پطرس 3:‏9‏)‏ کیہڑی چیز اِنج کرن چ ساڈی مدد کر سکدی اے؟‏

14.‏ سانوں کیہہ کرن دی کوشش کرنی چاہی دی اے تے کیوں؟‏

¹⁴ جیہڑے بندے نے ساڈا دل دُکھایا اے، سانوں اوہنوں اوسے نظر نال ویکھن دی کوشش کرنی چاہی دی اے جیس نظر نال یہوواہ اوہنوں ویکھدا اے۔ یہوواہ ہمیشاں انساناں دِیاں اچھائیاں تے غور کردا اے۔ (‏2-‏تواریخ 16:‏9؛‏ زبور 130:‏3‏)‏ سانوں اکثر لوکاں چ اوہی گلاں نظر آندیاں نیں جیہڑیاں اَسی ویکھنا چاہنے آں فیر بھانویں ایہہ چنگیاں ہون یاں بھیڑیاں۔ جے اَسی دُوجیاں دِیاں اچھائیاں تے غور کراں گے تے ساڈے لئی اوہناں نُوں معاف کرنا اسان ہوئے گا۔ مثال لئی، بھرا جیرڈ کہندا اے:‏ ”‏جدوں مَیں کسے بھین بھرا دِیاں اچھائیاں تے غور کرنا واں تے میرے لئی اوہدیاں غلطیاں نُوں معاف کرنا اسان ہو جاندا اے۔“‏

15.‏ جے تُسی کسے بندے نُوں معاف کر دِتا اے تے ایہہ چنگا کیوں ہوئے گا کہ تُسی اوہنوں ایہہ گل دَسو؟‏

¹⁵ جدوں اَسی کسے نُوں معاف کر دینے آں تے ایہدے بعد سانوں اِک ہور اہم کم وی کرنا چاہی دا اے۔ سانوں اوس بندے نُوں دَسنا چاہی دا اے کہ اَسی اوہنوں معاف کر دِتا اے۔ پر کیوں؟ ایس بارے ذرا بھین نعومی دی مثال  تے غور کرو۔ اوہ کہندی اے:‏ ”‏جدوں میرے شوہر نے مینوں پچھیا کہ کیہہ مَیں اوہنوں معاف کر دِتا اے تے میرے توں کجھ بولیا نئیں گیا۔ مینوں احساس ہویا کہ مَیں اوہنوں دِلوں معاف نئیں کیتا سی۔ پر فیر کجھ عرصے بعد مَیں اوہنوں دَسیا کہ مَیں اوہنوں معاف کر دِتا اے۔ ایہہ سُن کے مینوں اوہدیاں اَتھرواں نال بھریاں ہوئیاں اَکھاں چ بڑا سکون نظر آیا تے مینوں آپ وی بڑا اِطمینان مِلیا۔ ہُن مَیں فیر توں اوہدے تے بھروسا کرن لگ پئی آں تے اَسی فیر توں چنگے دوست بن گئے آں۔“‏

16.‏ تُسی دُوجیاں نُوں معاف کرن بارے کیہہ سکھیا اے؟‏

¹⁶ یہوواہ چاہندا اے کہ اَسی دُوجیاں نُوں معاف کرئیے۔ (‏کُلسّیوں 3:‏13‏)‏ ایہہ گل جانن دے باوجود سانوں دُوجیاں نُوں معاف کرنا مشکل لگدا اے۔ پر فیر وی اَسی اِنج کر سکنے آں۔ اوہ کیویں؟ اِنج کرن لئی ضروری اے کہ اَسی اپنے جذباتاں نُوں نظر انداز نہ کرئیے، اپنے دل چوں غصے تے ناراضگی نُوں کڈھ دَئیے تے چنگیاں گلاں بارے سوچئے۔—‏ایس بکس نُوں ویکھو:‏ ‏”‏ معاف کرن لئی تِن مشورے۔‏‏“‏

معاف کرن دے فائدیاں تے غور کرو

17.‏ دُوجیاں نُوں معاف کرن نال سانوں کیہڑے فائدے ہوندے نیں؟‏

¹⁷ غور کرو کہ سانوں دُوجیاں نُوں کیوں معاف کرنا چاہی دا اے۔ ایہدی پہلی وجہ ایہہ وے کہ دُوجیاں نُوں معاف کرن نال اَسی اپنے رحم‌دل باپ یہوواہ دی مثال تے عمل کرنے آں تے اوہنوں خوش کرنے آں۔ (‏لُوقا 6:‏36‏)‏ دُوجی وجہ ایہہ وے کہ اِنج کرن نال اَسی اوس معافی لئی قدر ظاہر کر رہے ہُنے آں جیہڑی سانوں یہوواہ وَلّوں مِلی اے۔ (‏متی 6:‏12‏)‏ تے تیجی وجہ ایہہ وے کہ دُوجیاں نُوں معاف کرن نال ساڈی صحت چنگی رہندی اے تے دُوجیاں نال ساڈی دوستی وی مضبوط رہندی اے۔‏

18، 19.‏ معاف کرن دے کیہڑے چنگے نتیجے نکلدے نیں؟‏

¹⁸ جدوں اَسی دُوجیاں نُوں معاف کر دینے آں تے سانوں ایہو جہیاں برکتاں مِلدیاں نیں جنہاں بارے اَسی سوچیا وی نئیں ہوندا۔ مثال لئی، جدوں بھین تانیہ نے اوس بندے نُوں معاف کر دِتا جدی وجہ توں اوہدی زندگی اِک دم بدل گئی سی تے اوہنوں نئیں پتہ سی کہ اَگے چل کے ایہدا کیہہ نتیجہ نکلے گا۔ اوہ بندہ مُقدمہ ختم ہون توں بعد خودکُشی کرنا چاہندا سی۔ پر جدوں بھین تانیہ نے اوہنوں معاف کر دِتا تے ایس گل دا اوہدے دل تے ایناں گُوڑھا اثر ہویا کہ اوہنے یہوواہ دے گواہواں کولوں بائبل کورس کرنا شروع کر دِتا۔‏

¹⁹ شاید سانوں لگے کہ کسے نُوں معاف کرنا سب توں مشکل کماں وچوں اِک اے۔ پر اِنج کرن نال سانوں بوہت ساریاں برکتاں مِلدیاں نیں۔ (‏متی 5:‏7‏)‏ آؤ اَسی پوری کوشش کرئیے تاکہ اَسی یہوواہ وانگوں دُوجیاں نُوں معاف کردے رہیے۔‏