اِک بندے نے جیکولین دی عزت لُٹن لئی اچانک اوہدے تے حملہ کیتا۔‏ جیکولین نے دسیا:‏ ”‏اوہدا مقابلہ کرن لئی میرے کولوں جو کجھ ہو سکیا،‏ مَیں کیتا۔‏ مَیں چیکاں ماریاں پر میرے گلے چوں آواز نہ نکلی۔‏ مَیں اوہنوں دھکے،‏ ٹھڈے،‏ مکے تے کھرونڈے مارے۔‏ پر جدوں اوہنے مینوں چاقو ماریا تے میری ہمت جواب دے گئی۔‏“‏

جے تُسی جیکولین دی تھاں ہوندے تے کیہہ کر دے؟‏

بھانویں تُسی کِنّے وی دلیر تے چوکنے او،‏ جدوں تُسی رات نُوں باہر نکل دے او تے تواڈے نال کجھ وی بُرا بھلا ہو سکدا اے۔‏ خدا دے کلام چ لکھیا اے کہ فیر مَیں ویکھیا کہ نہ تے تیز نسن والے نُوں جت حاصل ہوندی اے تے نہ ای عزت عقل‌منداں نُوں ملدی اے سگوں اوہناں ساریاں لئی وقت تے حادثہ اے۔‏—‏واعظ 9:‏11‏۔‏

جیکولین وانگوں کجھ منڈُے کُڑیاں تے حملہ کرن والا کوئی اجنبی ہوندا اے۔‏ پر کئیاں نُوں اوہناں دے جانن والے یاں رشتےدار اپنا نشانہ بناؤندے نیں۔‏ مثال لئی نتاشا صرف دس سالاں دی سی جدوں اوہدے اِک گوانڈی نے اوہدی عزت لٹی۔‏ اوہ کہندی اے:‏ ”‏شروع چ مَیں ڈردیاں تے شرم دے ماریاں کسے نُوں کجھ نہ دسیا۔‏“‏

جیکولین حالے وی شرم دے مارے ڈُب ڈُُب جاندی اے۔‏ اوہ کہندی اے:‏ ”‏اوس رات میرے نال جو کجھ ہویا،‏ اوہ میرے ذہن چوں نکل دا ای نئیں۔‏ مَیں سوچنی آں،‏ کاش مَیں اوس ویلے بچن لئی ہور زور لایا ہوندا۔‏ پر چاقو دے وار نے تے مینوں بالکل بےبس کر دِتا سی۔‏ ایہدے بعد مَیں ہور کجھ نہ کر سکی پر مینوں چاہیدا سی کہ مَیں اوہدا ہور مقابلہ کر دی۔‏“‏

نتاشا وی حالے تک شرمندگی دی دلدل چوں نکل نئیں پائی۔‏ اوہ کہندی اے:‏ ”‏میرے ماں پیو نے سختی نال کہیا سی کہ جدوں وی باہر کھیڈن جاؤ تے دونویں بھیناں کٹھیاں رہنا۔‏ پر مَیں اوہناں دی گل نہ منی۔‏ ایس لئی مینوں لگدا اے کہ مَیں آپ اپنے گوانڈی نُوں اپنی عزت دے ہتھ پاؤن دا موقع دِتا۔‏ مینوں اپنے آپ اُتے ایناں مان نئیں سی کرنا چاہیدا۔‏ میری غلطی دی وجہ توں میرے گھر والیاں نُوں بڑا دُکھ تے شرمندگی سہنی پئی۔‏ ایس گل دا مینوں بوہت افسوس اے۔‏“‏

جے تُسی وی جیکولین تے نتاشا وانگوں محسوس کر دے او تے یاد رکھو کہ جنہاں دی عزت لٹی جاندی اے ایہدے چ اوہناں دی اپنی کوئی مرضی یاں خوشی نئیں ہوندی۔‏ کجھ لوک ایس مسئلے نُوں عام جہی گل سمجھدے نیں۔‏ اوہ سوچدے نیں کہ منڈُیاں دا کُڑیاں نُوں چھیڑنا کوئی وڈی گل نئیں یاں جنہاں دی عزت لٹی جاندی اے،‏ اوہ خود ایہدے ذمےدار ہوندے نیں۔‏ پر کسے دی عزت تے ہتھ پاؤنا جانوراں والی حرکت اے۔‏ جے تُسی ایہو جہی گھٹیا حرکت دا نشانہ بنے او تے یقین رکھو کہ ایہدے چ تواڈا کوئی قصور نئیں۔‏

پر شاید تواڈے لئی ایس گل تے یقین کرنا مشکل ہوئے۔‏ کجھ لوک اپنے نال ہون والی زیادتی بارے کسے نُوں دسدے نئیں تے اندروں اندری‌کُڑھدے رہندے نیں۔‏ پر تواڈی چپ دا فائدہ کنہوں ہوئے گا؟‏ توانوں یاں زیادتی کرن والے نُوں؟‏ ایس لئی اپنی پریشانی بارے کسے نُوں دسو۔‏

خدا دے کلام چ دسیا گیا اے کہ جدوں خدا دے بندے ایوب نُوں بوہت ساریاں مشکلا‌ں دا سامنا ہویا تے اوہناں نے کہیا کہ مَیں کُھل کے اپنے دل دا غم دساں گا۔‏ (‏ایوب 10:‏1‏،‏ اُردو جیو ورشن)‏ تُسی وی اپنے دل دا بھار ہولا کر سکدے او۔‏ کسے بھروسےمند بندے نُوں دل دی گل دسن نال تواڈا دُکھ گھٹ ہو جاوے گا۔‏

جیکولین نُوں وی اِنج کرن نال بڑا فائدہ ہویا۔‏ اوہ کہندی اے:‏ ”‏مَیں اپنی اِک سہیلی نال گل کیتی تے اوہنے مینوں مشورہ دِتا کہ مَیں اپنی کلیسیا دے بزرگاں نال گل کراں۔‏ تے مینوں خوشی اے کہ مَیں بزرگاں نال گل کیتی۔‏ اوہناں نے کئی وار مینوں تسلی دِتی تے کہیا کہ جو کجھ وی ہویا اوہدے چ میری کوئی غلطی نئیں سی۔‏“‏

نتاشا نے وی اپنے نال ہون والی زیادتی بارے اپنے ماں پیو نُوں دسیا۔‏ اوہ کہندی اے:‏ ”‏اوہناں نے میرا بڑا ساتھ دِتا تے میری حوصلہ‌افزائی کیتی کہ مَیں اوہناں نال کُھل کے گل کراں۔‏ ایہدا فائدہ ایہہ ہویا کہ میرا غصہ تے دُکھ گھٹ ہو گیا۔‏“‏

نتاشا نُوں دُعا کر کے وی بڑی تسلی ملی۔‏ اوہ دسدی اے:‏ ”‏خدا نال گل کر کے مینوں بڑا حوصلہ ملیا کیونکہ مَیں خدا نال جیہڑ‌یاں گلاں کیتیاں اوہ شاید مَیں کسے انسان نال نہ کر پاؤندی۔‏ دُعا چ مَیں اپنے دل دا حال کُھل کے دسنی ساں۔‏ ایہدی وجہ توں مینوں بڑا سکون تے اطمینان ملیا۔‏“‏

وقت دے نال نال تواڈے دل اُتے لگے زخم وی بھر جان گے۔‏ (‏واعظ 3:‏3‏)‏ ہر ویلے اوس بھیڑے واقعے بارے سوچدے رہن دی بجائے خوش رہوو،‏ چنگی طرحاں کھاؤ پیو تے اپنی نیندر پُوری کرو۔‏ تے سب توں ودھ کے یہوواہ تے بھروسا کرو جیہڑ‌ا توانوں بڑی تسلی دے سکدا اے۔‏—‏2-‏کُرنتھیوں 1:‏3،‏ 4‏۔‏

جے تُسی اِک کُڑی او تے تواڈا بوائے فرینڈ توانوں سیکس کرن لئی مجبور کر دا اے تے اوہنوں ایہہ کہن چ کوئی بُرائی نئیں کہ ”‏ایہہ کم غلط اے“‏ یاں ”‏اپنا ہتھ پراں کر۔‏“‏ ایس گل توں نہ ڈرو کہ تواڈا بوائے فرینڈ توانوں چھڈ دوے گا۔‏ جے اوہ توانوں ایس گل توں چھڈ دے گا تے فیر اوہ تواڈے لائق ای نئیں۔‏ توانوں اِک ایسے ساتھی دی لوڑ اے جیہڑ‌ا تواڈی عزت تے تواڈے اصولاں دی قدر کرے۔‏

‏”‏سکول چ منڈُے مینوں ہتھ لاؤندے تے گندیاں گندیاں گلاں کہندے سن۔‏ اوہ کہندے سن کہ ”‏جے تُوں ساڈے نال سیکس کریں گی تے تینوں بڑا مزہ آئے گا۔‏“‏“‏—‏کوریٹا۔‏

تواڈے خیال چ اوہ منڈُے .‏ .‏ .‏

1. کوریٹا نُوں تنگ کر رہے سن؟‏

2. اوہدے نال فلرٹ کر رہے سن؟‏

3. اوہدے نال جنسی چھیڑچھاڑ کر رہے سن؟‏

‏”‏بس وچ اِک منڈُا میرے نال گندیاں گلاں کرن لگ پیا تے اوہنے مینوں جپھا مار لیا۔‏ مَیں اوہنوں پراں دھکا دِتا تے کہیا کہ میرے لاگے نہ آئیں۔‏ اوہنے مینوں اِنج ویکھیا جیویں مَیں کوئی پاگل ہنی آں۔‏“‏—‏کینڈس۔‏

تواڈے خیال چ ایہہ منڈُا .‏ .‏ .‏

1. کینڈس نُوں تنگ کر رہیا سی؟‏

2. اوہدے نال فلرٹ کر رہیا سی؟‏

3. اوہدے نال جنسی چھیڑچھاڑ کر رہیا سی؟‏

‏”‏پچھلے سال اِک منڈُا بار بار مینوں ایہہ کہندا سی کہ اوہ مینوں پسند کر دا اے تے میرے نال کِتے ڈیٹ تے جانا چاہندا اے پر مَیں اِنکا‌ر کر دی رہی۔‏ کدی کدی اوہ میری بانہہ تے اپنا ہتھ پھیر دا سی۔‏ مَیں اوہنوں بتھیرا منع کرنی ساں پر اوہ باز ای نئیں سی آؤندا۔‏ اِک دن مَیں تھلے جھک کے اپنے تسمے بنھ رہی ساں کہ اوہنے آ کے میری پٹھ تے ہتھ ماریا۔‏“‏—‏انیتا۔‏

تواڈے خیال چ ایہہ منڈُا .‏ .‏ .‏

1. انیتا نُوں تنگ کر رہیا سی؟‏

2. اوہدے نال فلرٹ کر رہیا سی؟‏

3. اوہدے نال جنسی چھیڑچھاڑ کر رہیا سی؟‏

ایہناں تِن حالتاں وچ صحی آپشن C اے۔‏

جنسی چھیڑچھاڑ کسے نُوں تنگ کرن یا کسے نال فلرٹ کرن توں کیویں فرق اے؟‏

جنسی چھیڑچھاڑ کرن والے دُوجیاں دی پرواہ نئیں کر دے۔‏ اوہناں نُوں بھانویں جناں مرضی منع کیتا جائے اوہ باز نئیں آؤندے۔‏

ایہہ بڑی سنجیدہ گل اے کیونکہ ایہہ جنسی زیادتی دا سبب بن سکدی اے۔‏