IRE KAN mwoweo kasalehda soahng suwed kan me kin lelohng aramas me kak kahrehda mour en nohn mwomwen apwal. Ni omw kin dadaur pahn pein omw kahpwal kan, ele ke kin medewe ma mour mie katepe de ma mie emen me kin nsenohkin uhk. Ken kamehlele me Koht kin ketin nsenohki omw kahpwal kan. Ke kesempwal reh.

Sounnting en Melkahka 86 koasoia me e kin likih Koht: “I patohwan likweriong komwi ni ahnsou apwal, pwehki omwi kin ketin sapeng ei kapakap akan.” (Melkahka 86:7) Ahpw ele ke pahn medewe, ‘Ia duwen Koht eh pahn ketin sapeng ie “ni ahnsou apwal”?’

Mendahki Koht ele sohte pahn mwadangete kamwahwihala omw kahpwal akan, sapwellime Mahsen, Paipel, kin kamehlelehiong uhk me e kak ketikihong uhk popohl oh meleilei pwehn seweseiuk ken ese dahme ke pahn wia: “Kumwail dehr kin pwunodki mehkot, ahpw ni mehkoaros, kumwail en peki rehn Koht sawas ni kapakap oh kapakap ni ngidingid iangahki kalahngan; oh sapwellimen Koht popohl me inenen siksang madamadau en aramas koaros pahn pere amwail mohngiong oh amwail madamadau kan.” (Pilipai 4:6, 7, nting tikitik kan me mi pah) Menlau tehk ia duwen iren Paipel pwukat ar kamehlelehiong kitail me Koht uhdahn ketin nsenohkin kitail.

“Sohte emen [kisin menpihr] me Koht kin ketin pohnsehsehla.  . . Kumwail kesempwal sang kisin menpihr tohto.”​—Luk 12:6, 7, nting tikitik kan me mi pah.

MEDEMEDEWE: Kisin menpihr tikitik kan me duwehte sparrow kan ele sohte mwomwen kesempwal ong pali tohtohn aramas, ahpw Koht kin ketin nsenohkin irail. Koht kin ketin tetehk kisin menpihr tikitik koaros; irail koaros wia soahng momour kesempwal kei. Aramas akan uhdahn kesempwal rehn Koht sang kisin menpihr tikitik kan. Aramas akan wia sapwellimen Koht kepikipik keieu kapwuriamwei pohn sampah. Irail wiawihda rasehng Koht oh kak kakairada oh kasalehda irair kaselel kan me Koht ketin sapwellimanki.​—Senesis 1:26, 27.

“Maing Kaun, komw ketin kasawih ie, eri, komw ketin mwahngih ie. . . . Komw ketin mwahngih ei lamalam akan koaros . . . Komw ketin song ie, pwe komwi en mwahngih ei lamalam akan.”​—Melkahka 139:1, 2, 23.

MEDEMEDEWE: Koht kin ketin uhdahn mwahngihiuk. E ketin mwahngih omw pepehm loal kan oh pwunod rir kan. Ni meteikan ar ele sohte wehwehki omw kahpwal oh kapwunod kan, Koht kin ketin nsenohkin uhk oh ketin kupwurki seweseiuk. Pwehki met, omw mour mie katepe.

“Maing KAUN, komw ketin karonge ei kapakap, oh ketin karonge ei likwer en pek sawas! . . . Komw ketin karonge ie, oh ketin sapeng ei likwer ni ahnsou mwadang. . . . E pahn ketin karonge sapwellime aramas me lekdeklahr akan oh karonge ar kapakap.”​—Melkahka 102:1, 2, 17.

MEDEMEDEWE: E mwomwen me sangete ni aramas ar tepida ahneki lokolok, Siohwa kin ketin kilkilelehdi pilen mas koaros me kin keredihsang ni mesen aramas akan ni ar kin sengisengki ar lokolok kan. (Melkahka 56:8) Met iangahki pilen mesomw kan. Koht kin ketin tamataman omw apwal akan koaros oh pilen mesomw kan pwehki ke kesempwal reh.

“Kumwail dehr perki mehkot, pwe ngehi me amwail Koht. I pahn kin kakehlakei kumwail oh sewesei kumwail . . . Ngehi, KAUN-O, amwail Koht; ngehi me . . . mahmahsanihong kumwail, ‘Kumwail dehr masak, pwe I pahn sewesei kumwail.’”​—Aiseia 41:10, 13.

MEDEMEDEWE: Koht ketin onopadahr en ketin seweseiuk. Ma ke pwupwudi, e pahn ketin kasihnenihiukada.

“Koht uhdahn ketin poakohng sampah ihme e ketikihdohki sapwellime Iehros, pwe mehmen me kin kasalehda eh pwoson ih en dehr mwomwla ahpw en ahneki mour soutuk.”​—Sohn 3:16.

MEDEMEDEWE: Ke uhdahn kesempwal rehn Koht me kahrehda e ketin kupwurki ketikihda sapwellime Ohlo Sises, nin duwen meirong ehu pwehki kowe. Meirong wet kihong uhk koapworopwor en momourki mour katapan oh nsenamwahu ehu kohkohlahte. *