Koht ketin inoukihong soukohp Eipraam me emen sang kadaudoke kan pahn wahdo kapai kan ong “wehi koaros.” (Senesis 22:18) Ihs me pahn wia kadaudok menet?

Kereniong sounpar 2,000 samwalahro, Koht ketikihong Sises me wia kadaudok en Eipraam, kehl en wiahda manaman kapwuriamwei kan. Manaman pwukat kasalehda me inowo me wiawihong Eipraam pahn kohieng wehi koaros pwehki Sises.​—Kalesia 3:14.

Sapwellimen Sises manaman akan kin sewese kasalehda me ih me Koht ketin pilada pwehn kapaiahda aramas akan, oh manaman pwukat pil kasalehda ia duwen Koht eh ketin doadoahngki ih pwehn kapaiahda aramas akan kohkohlahte. Tehk ia duwen sapwellimen Sises manaman akan eh kasansalehda ekei sapwellime irair kaselel kan.

Nsenoh Laud​—Sises ketin kamwahwihala me soumwahu.

Ehu pak, ohl tokutok men peki rehn Sises en ketin kamwahwihala ih. Sises ketin doahke oh sapengki: “I men!” Ohl tokutoko ahpw mwadangete mwahula.​—Mark 1:40-42.

Sapan​—Sises ketin kamwengehda me duhpeklahr.

Sises sohte kupwurki aramas akan en duhpekla. Tohtohsang pak ehu, e ketin ni manaman kamwengehda aramas kid kei sang ni eh ketin katohtowehla lopwon en pilawa malaulau kei oh pil kisin mwomw kei. (Madiu 14:17-21; 15:32-38) Mwurin arail mwengehier, koaros medla oh uhdahn tohto luhwen mwenge ko.

Poakehla​—Sises ketin kaiasada me melahr.

Sises “ketin poakehla,” oh ketin kaiasada nein liohdi men iehroso, ihte me kak apwalih liohdio.​—Luk 7:12-15.