KE KAK wadek nting en Ipru nan Paipel? Mwein soh. Ele mwein saik pak ehu ke kilang Paipel en Ipru. Ahpw, ke pahn uhdahn kalahnganki pein noumw Paipel ni omw pahn esehla duwen emen me samanih Paipel Elias Hutter nan pahr 1500 samwa oh Paipel riau ni lokaiahn Ipru me e wiahda.

Elias Hutter ipwidi nan pahr 1553 nan Görlitz, kisin kousoan tikitik ehu me karanih Sehmen me mi nanpwungen Poland oh Czech Republic. Hutter sukuhlki lokaiahn palimese kan nan sukuhl laud ehu me adaneki Lutheran University nan Jena. Ni ahnsou me e kereniong sounpar 24, e idihdida nin duwen sounpadahk en lokaiahn Ipru nan Leipzig. Nin duwen emen me wiahda wekidekla kan nan palien kasukuhl, mwuhr e wiahda sukuhl ehu nan Nuremberg wasa me tohnsukuhl kan kak esehla lokaiahn Ipru, Krihk, Latin, oh Sehmen erein sounparte pahieu. Met sohte kin kak wiawi ni sukuhl teikan de sukuhl laud kan (university).

Nan pahr 1587, Hutter wiahda pwuhken Paipel en Ipru ehu me tohto kin kahdaneki Kadehde Mering. Oaralap en pwuhk wet Derekh ha-Kodesh, kohsang nan Aiseia 35:8 oh e wehwehki “Ahl Sarawien Komour.” Kaselel en mwomwen mesen nting ko kahrehda mie me nda me “soahng koaros kasalehda uwen lingan en pwuhk wet.” Ahpw dahme keieu kahrehda pwuhk wet kesempwal iei sang ni tohnsukuhl ko ar kak doadoahngki mwahu pwehn sukuhlki lokaiahn Ipru.

Pwehn wehwehki dahme kahrehda Paipel en lokaiahn Ipru kan me Hutter wiahda uhdahn wia sawas laud, tehk kahpwal riau me tohnsukuhl men kin lelohng ni eh kin song en wadek Paipel ni lokaiahn Ipru. Keieu, e mi ni mesen nting kan me e sohte ahn, oh keriau, ni ahnsou me lepin nting kan kin kapatapatohng mwohn oh mwurin lepin lokaia ieu e kin apwal en kasawihada uhdahn lepin lokaiao. Karasepe, tehk duwen lepin lokaiahn Ipru wet נפשׁ (me ntingdi ne’phesh), me wehwehki “mour.” Nan Esekiel 18:4, lepin nting kan ה (ha), me wehwehki “o” kapatapatohng, eri uhd wiahla lepin lokaia הנפשׁ (han·ne’phesh), de “mouro.” Ong irail me sehse kasawihada met, הנפשׁ (han·ne’phesh) mwomwen uhdahn weksang lepin lokaiao נפשׁ (ne’phesh).

Pwehn sewese nah tohnsukuhl kan, Hutter doadoahngki wiepen nting ieu me kaselel, me kin doadoahngki mwomwen mesen nting me nting toantoal mosul oh me sohte mosul. E wiahda ehuehu uhdahn lepin lokaia kesempwal kan en mi ni nting toantoal  mosul. Ong lepin nting kan me kapatapatohng, e kin doadoahngki mwomwen mesen nting kan me sohte mosul. Wiepe mengei wet kamangaiong tohnsukuhl kan ren kak kasawihada uhdahn lepin lokaia kesempwal kan ni lokaiahn Ipru, met kin sewese irail en sukuhlki lokaiahn Ipru. New World Translation of the Holy Scriptures​—With References doadoahngkihte soangen wiepeo nan footnote kan. a Uhdahn lepin lokaiao kin ntingdi ni mesen nting me kitail ahn oh kin mi ni nting toantoal mosul, oh lepin nting kan me kapatapatohng kin mi ni nting me sohte mosul. Karasepe kan powe kasalehda mwomwen mesen nting kan me Hutter doadoahngki nan nah Paipel en Ipru me pid Esekiel 18:4 oh me Reference Bible doadoahngki nan footnote ong ireute.

Hutter pil wiahda pwuhk ehu me kihpene “Kadehde Kapw” ni lokaia 12. Pwuhk wet wiawihda nan Nuremberg nan pahr 1599 oh e kin kalapw adaneki Nuremberg Polyglot. Hutter men en mie kawehwehn Palien Paipel ni Lokaiahn Krihk ong ni lokaiahn Ipru. Ahpw e nda me e sohte pahn kak diarada Palien Paipel ni lokaiahn Krihk me kawehwehdi ni lokaiahn Ipru mehnda ma e pil “men doadoahngkihla mwohni laud pwehn pwainda” met. b Eri e pilada en pein kawehwehdi Kadehde Kapw sang ni lokaiahn Krihk ong ni lokaiahn Ipru. E pwilikihdi doadoahk laud teikan koaros pwehn kak kanekehla kawehwe wet pwon nan sounparte ehu!

Ia uwen mwahu en ahn Hutter kawehwehdi Palien Paipel ni Lokaiahn Krihk ong ni lokaiahn Ipru? Nan pahr 1800 samwa, emen me kin samanih lokaiahn Ipru Franz Delitzsch ntingihdi: “Eh kawehwehn lokaiahn Ipru kasalehda me e uhdahn wehwehki lokaiahn Ipru laudsang Kristian teikan oh mwahu en doadoahngki pwuhk wet, oh pwehki pak tohto e kin doadoahngki lepin lokaia me keieu pwung.”

Hutter sohte kepwehpwehkihla eh doadoahk en kawehwe; e sansal me pwuhk pwukat me e wiahda sohte kalapw netila. Ahpw, eh doadoahk mie mehkot kesempwal oh kamwahupe me poatopoat. Karasepe, nan pahr 1661 William Robertson pwurehng kamwahwihala oh pwurehng wiahda en Hutter eh kawehwe Kadehde Kapw en lokaiahn Ipru oh nan pahr 1798 Richard Caddick pil pwurehng kamwahwihala oh pwurehng wiahda. Ni ahnsou me e kawehwe sang ni lokaiahn Krihk en mahso, e konehng Hutter eh kawehwehdi lengileng kan Kyʹri·os (Kaun) oh The·osʹ (Koht) ong “Siohwa” (יהוה, JHVH) wasa me nting kan nan ireo kin kapwurehiong mahsen kan sang Palien Paipel ni Lokaiahn Ipru de wasa kan me e medewe me kin koasoia duwen Siohwa. Met mehkot me kitail men tehk pwehki tohto kawehwehn Kadehde Kapw sohte kin doadoahngki mwaren Koht, ahpw en Hutter kawehwe kihda mehn kadehde en pwurehng kapwurehiong mwaren Koht nan Palien Paipel ni Lokaiahn Krihk.

Mwurin met ni omw pahn kilangada mwaren Koht, Siohwa, nan Palien Paipel ni Lokaiahn Krihk de kilangada footnote nan Reference Bible, tamanda en Elias Hutter doadoahk oh Paipel en lokaiahn Ipru lingan kan me e wiahda.