Aramas rar kan nan sampah pwon kamehlele me Krismas iei kasarawihpen ipwidien Sises Krais. Ahpw, mie pak me ke medewe ma irail tepin Kristian kan, me uhdahn karanih Sises, kin kasarawih Krismas? Oh ke kin ese dahme Paipel mahsaniheki duwen kasarawi en ipwidi? En diarada pasapengpen peidek pwukat kak sewese kitail en esehda ma Krismas ong Kristian kan.

Keieu, Paipel sohte kasalehda kasarawihen ipwidi en Sises de pil kasarawihen ipwidi en sapwellimen Koht tohnkaudok lelepek kan. Paipel kasalehdahte aramas riemen me wia kasarawihpen ara ipwidi. Ira koaros kaidehn tohnkaudok en Siohwa, Koht en Paipel, oh nan kasarawihpen ara ipwidi ko mie mehkot suwed wiawi. (Senesis 40:20; Mark 6:21) Pwuhken Encyclopædia Britannica kasalehda me irail tepin Kristian kan kin uhwong “en me rotorot akan tiahk en kasarawih ipwidi.”

Paipel sohte mahsanih rahn me Sises ketin ipwidi. Pwuhken McClintock and Strong’s Cyclopedia koasoia: “Rahnen ipwidien Krais sohte kak dierekdahsang nan K[adehde] K[apw] de pil ni mehlel, sang pwuhk teikan.” Ni mehlel ma Sises kupwurki sapwellime tohnpadahk kan ren kasarawih rahnen eh ipwidi, e pahn uhdahn tehk mwahu me re pahn ese rahn me e ketin ipwidi.

Keriau, Paipel sohte kasalehda me Sises de pil emen sapwellime tohnpadahk kan kasarawih Krismas. Pwuhken New Catholic Encyclopedia kasalehda me koasoipen kasarawih Krismas tepin pwarada “nan Chronograph en Philocalus, pwuhken Rom ehu me audepe kan kohsang pahr 336.” E sansal me met wiawi mwurin Paipel eh wiawidahr oh sounpar epwiki kei mwurin Sises eh ketiket nin sampah. Ihme kahrehda, pwuhken McClintock and Strong koasoia me “kasarawi en Krismas kaidehn kosonned ehu sang rehn Koht oh pil e sohte tepida sang [K]adehde [K]apw.” a

Nin duwen Sounpadahk Lapalap, Sises ketikihda kaweid sansal kan ong dahme e ketin kupwurki sapwellime tohnpadahk kan ren wia, oh mepwukat ntingdi nan Paipel. Ahpw, kasarawi en Krismas sohte iang kisehn mepwukat. Duwehte sounpadahk men me sohte men nah tohnsukuhl kan ren wia soahng kan likin kaweid kan me kohieng irail, Sises pil sohte kupwurki sapwellime tohnpadahk kan ren wia soahng kan me “siksang me ntingdier” nan Paipel.​—1 Korint 4:6.

Ni pali teio, mie mehkot kesempwal ehu me tepin Kristian kan kin ahn wia, iei katamanpen pwoulahn Sises. Pein Sises ketin mahsanihong sapwellime tohnpadahk kan ren wia kataman wet oh e ketin kasalehiong irail ia mwomwen arail pahn wia met. Kaweid oaritik pwukat, me pil iangahki rahn me e ketin pwoula, ntingdi nan Paipel.​—Luk 22:19; 1 Korint 11:25.

Nin duwen me kitail tehkpeneier, Krismas wia kasarawi en ipwidi oh tepin Kristian ko sohte kin wia tiahk en rotorot wet. Patehng met, Paipel sohte mahsanih me Sises de pil meteikan kin kasarawih Krismas. Pwehki ire mehlel pwukat, Kristian rar kei nan sampah pwon koasoanehdier me Krismas kaidehn ong irail.