1. Dahme Siohwa ketin inoukihong me dipan kan me kin koluhla?

 MENDAHKI Siohwa iei Sounkapikpatail, atail Sounkopwung, oh Sounwiahda Kosonned, e pil ketin wia Samatail limpoak nanleng. (Mel. 100:3; Seims 4:12) Ni atail kin dipada mwohn silangi oh uhdahn koluhla, e sapwellimanki manaman oh pil ketin kupwurki mahkohng kitail. (Mel. 86:5) Ni eh ketin doadoahngki soukohp Aiseia, Siohwa ketin inoukihda: “Mehnda ma kumwail weitahtahkilahr dipamwail kan, ahpw I pahn kamwakeleikumwailda duwehla sinoh.”​—Ais. 1:18.

2. Ma kitail men ahneki popohl rehn meteikan, dahme kitail anahne wia?

² Pwehki kitail soh unsek, kitail koaros kin nda de wia soahng kan me kin kansensuwedihala meteikan. (Seims 3:2) Ahpw met sohte wehwehki me kitail sohte kak ahneki nanpwungmwahu keren rehrail. Kitail kak wia met ma kitail sukuhlki en kin kasalehda mahk. (Lep. Pad. 17:9; 19:11; Mad. 18:21, 22) Ma emen nda de wia mehkot tikitik me kamedekeikitailla, Siohwa ketin kupwurki kitail en mahkohng. (Kol. 3:13) Mie kahrepe mwahu me kitail en wia met. Met pwehki Siohwa kin ketin “mwadang” mahkohng kitail, de mahkohng kitail ni ahl laud ehu.​—Ais. 55:7.

3. Dahme kitail pahn koasoiapene nan iren onop wet?

³ Nan iren onop wet, kitail pahn koasoiapene ia duwen aramas soh unsek kan kak alasang Siohwa oh mahkohng meteikan. Soangen dihp dah kan me kitail anahne padahkihong elder kan? Dahme kahrehda Siohwa ketin kangoange kitail en mahkohng meteikan? Oh dahme kitail kak sukuhlkihsang ekei riatail Kristian kan me kin lokolongki laud sapwung me meteikan wiahiong irail?

4. (a) Ni emen sapwellimen Siohwa ladu eh wiahda dihp laud ehu, dahme e anahne wia? (b) Pwukoa dahieu me elder kan ahneki ni arail kin tuhwong me wiahda dihp laud ehu?

⁴ Kitail anahne padahkihong elder kan ni emen eh wiahda dihp laud ehu. Ekei soangen dihp laud pwukat iei me kileldi nan 1 Korint 6:9, 10. Dihp laud kan kin uhdahn kauwehla sapwellimen Koht kosonned. Ma Kristian men wiahda ehu soangen dihp pwukat, e anahne kapakap ong Siohwa Koht oh peki mahk, oh e anahne tuhkihong elder kan nan mwomwohdiso. (Mel. 32:5; Seims 5:14) Pwukoa dahieu me elder kan ahneki? Siohwa kelehpw me sapwellimanki manaman en mahkohng ni unsek dihp kan. E ketin mahkohng dipatail kan pwehki pweinen pweipwei sapahlo. * Ahpw Siohwa ketikihong elder kan pwukoa en doadoahngki Paipel pwehn kak esehda ma me wiahda dihpo kak mihmihte nan mwomwohdiso. (1 Kor. 5:12) Pwehn wia met, ehu rehn soahng kan me re kin wia iei en song diarada pasapengpen peidek pwukat: Aramaso pilahnedahr en wiahda dihpo? Aramaso kin song en ekihsang meteikan dihpo? E kin pwurupwurehng wia dihpo erein ahnsou reirei? Keieu kesempwal, e sansal me e koluhla mehlel? Mie mehn kadehde me Siohwa ketin mahkohng ih?​—Wiewia 3:19.

5. Kamwahu dah kan me kin kohsang doadoahk me elder kan kin wia?

⁵ Ni elder kan ar kin tuhwong me wiahda dihp laudo, arail mehn akadei iei en wiahda pilipilohte me wiawidahr nanleng. (Mad. 18:18) Ia duwen koasoandi wet eh wia kamwahu ong mwomwohdiso? E kin pere mwomwohdiso sang ni eh tehk mwahu me me dipan kan me sohte koluhla en dehr mihmi nan mwomwohdiso oh kahrehda keper ong sapwellimen Siohwa ladu kan. (1 Kor. 5:6, 7, 11-13; Taitus 3:10, 11) E pil kak sewese me wiahda dihpo en koluhla oh ale mahk sang rehn Siohwa. (Luk 5:32) Elder kan kin kapakapki me koluhlao oh peki rehn Siohwa en ketin sewese ih en kamwahwihala eh nanpwungmwahu reh.​—Seims 5:15.

6. Siohwa pahn kak ketin mahkohng emen me piskenla? Menlau kawehwehda.

⁶ Ia duwen ma emen sohte koluhla ni ahnsou me elder kan tuhwong ih? Nan soangen irairo, e pahn piskensang nan mwomwohdiso. Ma e kauwehla kosonned en sahpwo, elder kan sohte pahn pere ih sang imwilahn eh wiewia suwedo. Siohwa ketin mweidohng koperment kan en kadeikada oh pil kaloke mehmen me kin kauwehla kosonned, mehnda ma e koluhla de soh. (Rom 13:4) Ahpw, ma aramaso mwuhr esehda me dahme e wiao sapwung oh wekidala eh madamadau oh wiewia kan, Siohwa kin ketin kupwurki mahkohng ih. (Luk 15:17-24) E pil kak ketin mahkohng mehnda ma dihpo uhdahn laud.​—2 Kron. 33:9, 12, 13; 1 Tim. 1:15.

7. Ia wehwehn atail kak mahkohng emen me wiahiong kitail sapwung?

⁷ Kitail kin kalahnganki me kitail sohte pwukoahki pilada ma Siohwa pahn ketin mahkohng emen. Ahpw, miehte mehkot me kitail anahne pilada. Dahieu mwo? Nan ekei irair, ele emen wiahiong kitail sapwung laud, ahpw mwuhr, e peki mahk. Ahpw ekei pak, ele aramaso sohte men peki mahk. Mendahki met, kitail kak pilada en mahkohng aramaso oh song en dehr lingeringer pah. Ni mehlel, ele kitail anahne ahnsou oh nanti laud en wia met, ahpw mehlel ma kitail uhdahn medekla laud. Kahn Iroir (lokaiahn wai) en September 15, 1994, koasoia: “Ni ahnsou me ke mahkohng me wiahiong uhk sapwung, met sohte wehwehki me ke kin  pwungki sapwungo. Ahpw ong Kristian men, en kasalehda mahk kin wehwehki en likih Siohwa pwehn ketin apwalihala kahpwalo. Siohwa iei Sounkopwung pwung men en nanleng oh sampah, oh e pahn ketin kasalehda pwung pahrek ni ahnsou me konehng.” Dahme kahrehda Siohwa ketin kangoange kitail en mahkohng meteikan oh likih ih en ketin kadeikada irairo ni pwung pahrek?

8. Ia duwen atail kin mahkohng meteikan eh kin kasalehda atail kalahnganki sapwellimen Siohwa mahk kalahngan?

⁸ En mahkohng meteikan kin kasalehda atail kalahnganki sapwellimen Siohwa mahk kalahngan. Nan ehu karasaras, Sises ketin kapahrekihong Siohwa soumas men me irisasang pweipwand laud ehu me emen nah ladu ko sohte kak pwainla. Ahpw laduo sohte kasalehda mahk kalahngan ong emen ladu me pweipwandkihong uwen mwohni tikitik ehu. (Mad. 18:23-35) Dahme Sises ketin padahkihong kitail? Ma kitail kin uhdahn kalahnganki Siohwa eh kin ketin kasalehiong kitail mahk kalahngan, met pahn kamwakid kitail en mahkohng meteikan. (Mel. 103:9) Sounpar kan samwalahro, Kahn Iroir kasalehda duwen met ni ahl wet: “Sohte lipilipil ia uwen tohtohn atail kin mahkohng aramas teikan, kitail sohte pahn kak mahkohng meteikan ni uwen laud me Koht ketin mahkohng emenemen kitail sang ni sapwellimen Krais meirong.”

9. Ihs me Siohwa kin ketin kasalehiong mahk kalahngan? (Madiu 6:14, 15)

⁹ Ma kitail mahkohng meteikan, Siohwa pahn ketin mahkohng kitail. Siohwa kin ketin kasalehda mahk kalahngan ong irail kan me kin mahk kalahngan. (Mad. 5:7; Seims 2:13) Sises ketin kasalehda ni sansal duwen met ni eh ketin padahkihong sapwellime tohnpadahk ko ia duwen arail pahn kin kapakap. (Wadek Madiu 6:14, 15.) Kitail sukuhlki mehn kasukuhl ehu me duwehte met sang dahme Siohwa ketin mahsanihong sapwellime laduo Sohp. Ohl lelepek menet uhdahn medengkihla lokaia kamedek kan me ohl silimen ko me adaneki Elipas, Pildad, oh Sopar wiahiong ih. Siohwa ketin mahsanihong Sohp en kapakapkin irail. Mwurin Sohp eh wia met, Siohwa ketin kapaiahda ih.​—Sohp 42:8-10.

10. Dahme kahrehda en kadakadaur lingeringer kak kauwehla pein kitail? (Episos 4:31, 32)

¹⁰ Kitail kin kauwehla pein kitail ni atail kin kadakadaur lingeringer. Siohwa ketin kupwurki kitail en ahneki popohl sang ni atail kihsang lingeringer me kin rasehng wisik toutou ehu. (Wadek Episos 4:31, 32.) E ketin kangoange kitail en “dehr pwunod de lingeringer.” (Mel. 37:8) Ma kitail idawehn kaweid wet, met pahn sewese kitail. Ni atail kin kadakadaur lingeringer pahn emen me kansensuwedihkitailla, kitail kak kauwehla atail roson en war oh madamadau. (Lep. Pad. 14:30) Atail kin lingeringerte pahn emen sohte pahn kamedekihala aramaso, duwehte ma kitail pahn nim pwoisin, kaidehn aramaso me pahn lelohng keper. Ahpw, ni atail kin mahkohng meteikan, e kin wia kamwahu ong pein kitail. (Lep. Pad. 11:17) Kitail kin ahneki popohl oh kak doulahte papah Siohwa.

11. Dahme Paipel mahsanihki duwen en dupuk emen? (Rom 12:19-21)

¹¹ Siohwa me pahn ketin ikih. Siohwa sohte ketikihong kitail manaman en ikih emen me wiahiong kitail sapwung. (Wadek Rom 12:19-21.) Pwehki atail madamadau sohte unsek, kitail sohte kak kadeikada ire kan ni ahl pwung, duwehte me Koht kak ketin wia. (Ipru 4:13) Oh ekei pak, atail pepehm kan kak kaweid  kitail ni ahl sapwung oh kahrehiong kitail en apwalki ese dahme pwung me kitail en wia. Siohwa ketin kaweid Seims en ntingihedi: “Lingeringer en aramas sohte kin wahdo sapwellimen Koht pwung.” (Seims 1:20) Kitail kak kamehlele me Siohwa pahn ketin wia dahme pwung oh ketin tehk mwahu me pwung pahrek pahn pweida ehu rahn.

12. Ia duwen atail kak kasalehda me kitail likih sapwellimen Siohwa pwung pahrek?

¹² Atail kin mahkohng meteikan kin kasalehda atail likih sapwellimen Siohwa pwung pahrek. Ni atail kin likih Siohwa en ketin kadeikada soahng koaros ni pahrek, kitail kin uhdahn kamehlele me e pahn ketikihsang soahng suwed koaros me dihp kin kahrehda. Nan sapwellime sampah kapwo me e ketin inoukihda, soahng kamedek kan me kitail kin tamataman “pahn manokonokla douluhl.” (Ais. 65:17) Ahpw ni emen eh uhdahn kansensuwedihkitailla, kitail kak sohla uhdahn nsensuwed pah? Medewehla ia duwen ekei ar kak wia met.

13-14. Dahme ke sukuhlkihsang Tony oh José duwen en kasalehda mahk?

¹³ Riatail Kristian tohto kin pilada en mahkohng meteikan mehnda ma irail uhdahn medengkihla dahme meteikan wiahiong irail. Soangen kapai dah kan me re ahneki pwehki arail wia met?

¹⁴ Mahso, mwohn eh esehla padahk mehlel, Tony * me kin mi Philippines, esehda me ohl emen me adaneki José kemehla emen rie pwutak laud ko. Ni ahnsowo, Tony wia aramas lemei men, oh e men ikih José. José poarpoardi oh selidi nan imweteng pwehki eh tiahk lemeio. Mwuhr, ni José eh pedoisang nan imweteng, Tony inoukihda me e pahn rapahkihda oh kemehla. E pwainda kesik ehu pwehn wia met. Ahpw, Tony tepida onopki Paipel rehn Sounkadehdehn Siohwa kan. E nda: “Ni ahnsou me I onohnop, I sukuhlki me I anahne wekidala mwomwei oh ei wiewia kan, pil iangahki ei lingeringer.” Kedekedeo, Tony papidaisla oh mwuhr wiahla elder men nan mwomwohdiso. Medewehla uwen eh pwuriamweila ni eh esehda me José pil papidaisla oh wiahla emen sapwellimen Siohwa ladu! Ni ara tuhpene, ira pwoalehdi emenemen, oh Tony ndaiong José me e mahkohng. Tony nda me eh kasalehda mahk wadohng ih peren laud oh e apwal  en kawehwehda soangen pepehmo. Ei, Siohwa ketin kapaiahda Tony pwehki eh men kasalehda mahk.

15-16. Dahme ke sukuhlkihsang dahme wiawihong Peter oh Sue duwen mahk?

¹⁵ Nan 1985, Peter oh Sue iang mihting nan Wasahn Kaudok ehu me pakudang ehu wiahkintehieu pospeseng. Ohl emen me kihdi pakudango nan Wasahn Kaudoko. Sue ohla laud me kahrehda e maskunla oh sohla kak rong wasa. E pil sohla kak ned mehkot. * Peter oh Sue kin kalapw medewe, ‘Soangen aramas dah me pahn wia soahng suwed wet?’ Sounpar tohto mwurin mwo, ohl me kihdi pakudango, me kaidehn Sounkadehdehn Siohwa men, poarpoardi oh selidi erein eh mour. Ni aramas ar kin idek rehn Peter oh Sue ma ira mahkohng ohlo, ira kin nda: “Siohwa ketin padahkihong kitail me en pousehlahte medewe duwen atail medek oh lingeringer kak kauwehla atail roson en war, pepehm, oh madamadau. Eri mwurinte pakudango eh wiawi, se peki rehn Siohwa en ketin sewesei kiht en mahkohng pwe sen kak ahneki mour me meleilei.”

¹⁶ Ia duwe, e mengei ong ira en kasalehda mahk? Kaidehn ahnsou koaros. Ira pousehlahte koasoia: “Ekei pak, ni ahnsou me Sue kin weirengki eh ohla ko, se kin pwurehng lingeringerda. Ahpw se sohte kin medemedewehte met, kahrehda at lingeringero kin mwadang uhdi. Se kak koasoia ni mehlel me ma ohl me kihdi pakudango ehu rahn wiahla emen riat Kristian, se pahn kasamwo ih. Dahme wiawio padahkihong kiht me ni omw kin doadoahngki kaweid en Paipel kan, e kin kasaledekihiukala. Ni mehlel, kaweid en Paipel kan kin kasaledekitala ni ahl tohtohsang me se kak medewehda! Se pil kin nsenamwahula pwehki se ese me Siohwa pahn kereniong ketikihsang kahpwal ko koaros.”

17. Dahme ke sukuhlkihsang dahme wiawihong Myra duwen mahk?

¹⁷ Myra sukuhlki padahk mehlel ni ahnsou me e pwopwoudlahr oh naineki seri tikitik riemen. Eh pwoudo sohte pwungki padahk  mehlel. Mwuhr, eh pwoudo wiahda dipen kamwahl oh keseirailla. Myra koasoia: “Ni ahnsou me ei pwoudo kohkohsang ie oh nait seri riemeno, I ahneki soangen pepehm me me tohto kin ahneki mwurin emen me irail poakohng pitihiraildi, me iei pepehm en pwuriamweila, sohte kamehlele dahme wiawi, nsensuwed, koluhla, oh pepehm en pwukoahki dahme ei pwoudo wia, oh lingeringer.” Mendahki ara pwopwoudo imwiseklahr, Myra kin medengkihte eh pwoudo eh pitihedi. Myra doula koasoia: “I kin pousehlahte pwunupwunodki oh linglingeringerki erein sounpwong tohto, oh I esehda me soangen pepehm pwukat pil kin kauwe ei nanpwungmwahu rehn Siohwa oh rehn meteikan.” Met Myra koasoia me e solahr kin lingeringer oh e pil sohte men mehkot suwed en wiawihong eh pwoud en mahso. E koapworopworki me ehu rahn, eh pwoudo pahn karanihala Siohwa. Myra kakehr medemedewehte duwen ahnsou kohkohdo. E wia nohno kiripw men, oh e apwalihada nah seri riemeno en papah Siohwa. Rahnwet, Myra kin iangih nah seri ko oh arail peneinei papah Siohwa ni peren.

18. Dahme kitail kak kamehlele me Sounkopwung Lapalapo Siohwa pahn ketin wia?

¹⁸ Kitail kin ahneki meleilei laud ni atail ese me kitail sohte anahne pilada ia duwen emenemen pahn alehdi kadeik. Nin duwen Sounkopwung Lapalap, Siohwa pahn ketin wia doadoahk kesempwal wet. (Rom 14:10-12) Kitail kak uhdahn kamehlele me e pahn ahnsou koaros ketin wia kadeik ni ahl me pahrekiong sapwellime koasoandi unsek en dahme pwung oh sapwung. (Sen. 18:25; 1 Nan. 8:32) E sohte pahn ketin wia mehkot ni ahl sapwung!

19. Dahme sapwellimen Siohwa pwung pahrek pahn kapwaiada?

¹⁹ Kitail kin uhdahn kasikasik ahnsowo me Siohwa pahn ketikihsang douluhl soahng suwed kan me soh unsek oh dihp kin kahrehda. Ni ahnsowo, soangen ohla koaros me kin kamedekihala paliwaratail oh atail pepehm, pahn mwahula douluhl. (Mel. 72:12-14; Kaud. 21:3, 4) Kitail sohla douluhl pahn pwurehng tamanda. Ni atail awiawih ahnsou kaselelo eh pahn leledo, kitail kin uhdahn kalahngankihong Siohwa eh ketikihong kitail koahiek en kahlemengih ih oh kasalehda mahk.