Paipel mahsanih: “Kasalehiong ie emen kaun suweden, I ahpw pahn kasalehiong uhk aramas paisuwed.”​—Lepin Padahk 29:2.

Poadopoad kasalehda me mie kaunen wehi kan me kin kaunda ni lemei oh kahrehiong tohn eh wehi lokolok tohto. Mehlel, kaidehn kaun koaros suwed. Mwein ekei uhdahn men sewese tohn arail wehi kan. Ahpw ni arail alehdi manaman en kaunda, re kalapw diarada me dahme re nannantihong kapwaiada kin ohkihla akamai oh siaipene en ihs me ahneki manaman laud. De mwein re kin doadoahngki arail manaman ni ahl sapwung ong pein kamwahuparail, ahpw met kahrehda lokolok ong aramas akan. Henry Kissinger, me mahs wia Sekteri en Wehin Amerika koasoia: “Poadopoad iei koasoiepen aramas ar nannanti ahpw sohte pweida, duwen akadei kan me sohte kin pweida.”

Paipel pil kasalehda: “Sohte aramas emen me kaunda pein eh mour.” (Seremaia 10:23) Aramas soh unsek kan sohte ahneki erpit oh loalokong me anahn pwehn apwalih pein arail koasoandi de wiewia koaros en pweida. Ma aramas akan sohte kak pein kaweid arail kahk kan, ia duwen ar kak kaweid ehu wehi? Ia duwe, ke wehwehkier ia kahrepen kaun akan ar sohte ahneki koahiek en kihsang lokolok kan? Ni mehlel, koperment sakanakan de kaunda suwed kin kalapw kahrehda aramas akan en lokolok.

Sises mahsanih: “Pwe ihme aramas koaros pahn esehki me kumwail nei tohnpadahk, ma kumwail pahn limpoakpene.”​—Sohn 13:35.

Kaunen pelien lamalam koaros kin padahngki duwen limpoak oh miniminpene. Ahpw dahme kin uhdahn wiawi iei me irail sohte kin padahkihong tohn arail pelien lamalam kan ren ahneki soangen limpoak laud me kak kihsang lipilipilki aramas. Re sohte kin sewese kakairada limpoak, ahpw re kalapw kahrehda saminimin, liaktohrohr oh peipene nanpwungen aramas akan oh wehi kan. Ni kaimwisekpen nah pwuhko, Hans Küng me sukuhlki duwen Koht oh pelien lamalam ntingihedi: “Soahng kan me keieu suwed oh lemei me palien koperment wiahda iei soahng kan me pelien lamalam kin utung oh kamanahla.”​—Christianity and the World Religions.

 Patehng met, kaunen pelien lamalam kan sohte kin ekihla arail mweidada de pohnsehsehla tiahk en kamwahl oh ohl mwahuki ohl de lih mwahuki lih. Met kahrehda doupeseng en soumwahu kan, kaiohla, liseianda, oh ohlahn nanpwungen pwopwoud oh peneinei kan me imwikihla medek oh nsensuwed laud.

“Aramas kin lelohng nan songosong sang ni pein eh ineng suwed eh kin kainangiong pein ih oh kahrehiong nan dihp. Eri, eh kin kanaitikihada eh ineng suwed.”​—Seims 1:14, 15.

Pwehki atail sohsohki soh unsek, kitail koaros kin wiahda sapwung kan oh kitail anahne pelianda ineng en “kapwaiadahte mehkot me paliwaratail de pein atail lamalam pahn kin nsenki.” (Episos 2:3) E keieu apwal en pelianda ineng suwed ehu ma ahnsowo mengei en kapwaiada. Ma kitail dukula pahn ineng suwed, imwilahn met kak kauwehla kitail.

Sounnting me ede P. D. Mehta ntingihedi: “Pali laud en lokolok kan kin kohsang pein atail ineng kan, atail ineng laud en raparapahki soahng kansenamwahu kan oh me kitail keieu perenki, atail noahrok oh mehn akadei.” Soangen ineng koaros duwehte kang sakau, doadoahngki wini en kasahliel, pilein mwohni, wia nsenen pwopwoud oh pil soahng teikan kauwelahr aramas lapalap de me waun tohto oh kahredahr kahpwal ong arail peneinei, kompoakparail kan oh meteikan. Pwehki soh unsek en aramas, kitail pwungki ni Paipel eh mahsanih: “Pwe kitail eseier me audepen lahng oh sampah koaros kin weiweirek, rasehng medek en neitik, lao lel ahnsou wet.”​—Rom 8:22.

Paipel kasalehda me Sehdan iei “koht suwed en sampah wet” oh me ngehn suwed kehlail kan de ngehn saut akan kin iangih.​—2 Korint 4:4; Kaudiahl 12:9.

Duwehte Sehdan, ngehn suwed akan kin kakaun oh pitipitih aramas akan. Wahnpoaron Pohl ese met ni eh koasoia duwen tohnleng suwed kan. E koasoia: “Pwe kaidehk aramas ekei me kitail mahweniong, pwe ong manaman en ngehn suwed kan en pahnlahng oh ong kaun akan oh me lapalap akan me ahneki manaman, oh pil ong koht akan me kaunda dih rotorot wet.”​—Episos 6:12.

Mehnda ngehn suwed akan kin perenki lidere aramas akan, dahme keieu kesempwal ong irail iei en kahrehiong aramas akan ren sohpeisang Koht Wasa Lapalahpie, Siohwa. (Melkahka 83:18) Wiewia kan duwehte kasawih isuh kan, akmanaman, wunahni, kosetipw iei soahng kan me ngehn suwed kan kin doadoahngki pwehn pitih aramas oh kahrehiong irail en mihla pahn arail manaman. Ihme kahrehda Siohwa ketin kaweidki kitail duwen keper pwukat oh ketin kupwurki pere koaros me kin pelianda Sehdan oh ngehn suwed akan.​—Seims 4:7.

Sounpar riekid samwa samwalahro, Paipel kohpada: “Tamataman mepwukat. Uhdahn pahn mie ahnsou apwal ekei ni imwin rahn akan.”

Paipel kasalehda dahme kahrehda ahnsou kan kin uhdahn apwal ni eh doula mahsanih: “Aramas pahn roporop ong pein irail, mehwo, aksuwei oh pohnmwahso; . . . irail pahn sempoak, soh mahk, karaun likamw oh pehmara, lemei, oh re pahn kailongki me mwahu; re pahn pangala iangarail kan, re pahn loaumwohmw oh kalahwasa, oh re pahn inengieng pein arail peren laudsang kupwur en Koht.” Ni mehlel, kahrepe keieu laud en lokolok koaros me kitail kilang rahnpwukat iei me kitail mihmi ni “imwin rahn akan.”​—2 Timoty 3:1-4.

Sang ire mehlel pwukat me kitail koasoiapene, e sou sansal me aramas sohte kak kauhdi lokolok mendahki arail men kamwahwihala soahng suwed kan? Ia wasa kitail kak ale sawas? Kitail anahne peki sawas rehn Sounkapikpatail, me ketin inoukihda en ketin “kauwehla doadoahk en Tepilo” oh ienge kan. (1 Sohn 3:8) Oaralap en mwuhr pahn koasoia dahme Koht pahn ketin wia pwehn ketikihsang soahng koaros me kin kahrehda lokolok.