Kompoakepah keren kan kin kalapw koasoakoasoipene ni ahnsou me re kak, sohte lipilipil ni arail tuhpene de ma re doadoahngki delepwohn, e-mail, video de kisinlikou. Eri, pwe kitail en karanihala Koht, kitail anahne kaukaule patohong ih. Eri, ia duwen met eh kak wiawi?

Kitail kak patohong Siohwa sang ni atail kin kapakap. Ahpw, kapakap ong Koht sohte duwehte omw kin koasoakoasoiong emen me uwe iuk. Kitail anahne pohnese me ni atail kin kapakap, kitail kin patohwan koasoakoasoiong Sounkapikpatail, Wasa Lapalahpie. Met pahn kamwakid kitail en kapakap oh kasalehda atail lemmwiki oh wauneki ih. Pwe Koht en ketin karonge atail kapakap, kitail anahne peikiong dahme e kin ketin kupwurki. Iet akan soahng siluh.

Keieu, kitail anahne kapakap ong Siohwa Koht kelehpw, kaidehn ong Sises, de emen me ekei kin nda “aramas sarawi,” de pil dikedik ehu. (Eksodus 20:4, 5) Paipel kasalehda ni sansal: “Ni soahng koaros kumwail en kehsehkin Koht amwail pekipek kan sang ni amwail kin kapakap oh pekipek karakarahk iangahki kapingkalahngan.” (Pilipai 4:6, NW) Keriau, kapakap kan anahne wiawi ni mwaren sapwellimeo, Sises Krais. Pein Sises ketin kasalehda met ni eh mahsanih: “Sohte me kak kolahng Semei ma soh ngehi.” (Sohn 14:6) Kesiluh, atail kapakap anahne pahrekiong kupwuren Koht. Paipel mahsanih: “Pein ih pahn karonge atail pekipek kan, ma kitail pahn peki mehkot nin duwen kupwure.” *​—1 Sohn 5:14.

Ni mehlel, nanpwungmwahu keren sohte pahn werei ma emente rehmwa me kin koasoakoasoi. Duwehte kompoakepah kan ar kin perenki koasoakoasoipene, kitail anahne mweidohng Koht en ketin mahsaniong kitail oh kitail anahne rong ih. Ke ese ia duwen Koht eh kin ketin mahsaniong kitail?

Rahnwet, Siohwa Koht kin ketin mahmahsen ong kitail ni eh ketin doadoahngki sapwellime Mahsen, Pwuhk Sarawi. (2 Timoty 3:16, 17) Dahme kahrehda kitail kak ndahki met? Pwehn karasahda: Medewehla ma ke alehdi kisinlikou ehu sang kompoakepahmw keren men. Ni omw wadewadek kisinlikowo, e kin mwomwen me e koasoakoasoiong uhk mehnda ma e sohte mi rehmw. Ni mwohmwohte, ni omw wadewadek Paipel, ke kin mweidohng Siohwa en ketin mahsaniong uhk. Ihme kahrehda, Gina, me mi nan oaralap en mwoweo, koasoia, “I medewe me ma I men Koht en ketin wiahkin ie kompoakepah, I anahne kasawih sapwellime ‘kisinlikowo’ ong kitail, me iei Paipel.” E pil nda, “Wadewadek Paipel rahn koaros kin kahrehda ien karanihala Koht.” Ke kin mweidohng Siohwa en ketin mahmahseniong uhk rahn koaros sang ni omw wadewadek sapwellime Mahsen, Paipel? Omw wia met pahn sewese iuk ken karanihala Koht.