IREN MEHN KASUKUHL 03
Ke Kak Likih Paipel?
Paipel kin kasalehda inou oh kaweid tohto. Mweinele ke men ese dahme e kin padahngki, ahpw ele ke pil kin pweiek. Ia duwe, ke pahn kak likih inou kan oh kaweid kan sang nan pwuhken mahs wet? Ke kak uhdahn kamehlele dahme Paipel mahsaniheki duwen pereperenki mour ni ahnsou wet oh ni ahnsou kohkohdo? Aramas tohto kin kamehlele met. Menlau pein kasawih met.
1. Koasoi kan me mi nan Paipel uhdahn mehlel?
Paipel mahsanih me e wia pwuhk ehu me audaudki “mahsen kan me . . . mehlel.” (Eklesiasdes 12:10) E kin koasoia soahng kan me uhdahn wiawi me kin pidada aramas akan me momour mahso. (Wadek Luk 1:3; 3:1, 2.) Soupoad tohto oh irail akan me kin rapahki kepwehn mahs akan kadehdedahr mehlelpen ekei rahn akan, aramas akan, wasa kan oh mwekid kan me kileldi nan Paipel.
2. Dahme kahrehda kitail kak ndahki me Paipel kak kadoadoahk rahnwet?
Paipel kin kalapw mahsanih soahng kan me sohte aramas emen ese ni ahnsou me e ntingdi. Karasepe, e kin koasoia soahng kan me pid palien sains. Aramas tohto sohte kamehlele pali laud en dahme Paipel mahsaniheki duwen ire pwukat ni ahnsou me e ntingdi. Ahpw palien sains en rahnpwukat kadehdedahr me dahme Paipel kin mahsanih kin pwung. Paipel kin likilik ahnsou koaros, ahnsou wet oh “kohkohlahte.”—Melkahka 111:8.
3. Dahme kahrehda kitail kak likih dahme Paipel mahsaniheki duwen ahnsou kohkohdo?
Paipel kin audaudki kokohp kan a me kohpada “dahme pahn wiawi mwuhr.” (Aiseia 46:10) Ni pwung e kohpadahr soahng tohto mwohn ar wiawi. E pil kawehwehda dahme kin wiawi nan sampah rahnwet ni oaritik tohto. Nan iren mehn kasukuhl wet kita pahn koasoiapene ekei kokohp en Paipel kan. Uwen pwungen kokohp pwukat kin kapwuriamwei!
KALAUDEHLA OMW ESE MET
Tehk duwen palien sains en rahnpwukat eh pwungiong dahme Paipel mahsanih, oh onopki ekei kokohp kapwuriamwei kan nan Paipel.
4. Palien sains kin pwungiong dahme Paipel mahsanih
Mahso, kereniong aramas koaros kamehlele me sampah kin mihmi pohn mehkot. Kilang KISIN KASDO.
Tehk dahme kileldi nan pwuhken Sohp sounpar 3,500 samwalahr ako. Wadek Sohp 26:7, oh mwuri koasoiapene peidek wet:
-
Ia duwe, ke sou pwuriamweiki me sangete mahs Paipel kin mahsanih me sampah kin “langalang nan wehwe”?
Saikinte me wehwehki duwen koasoandien mwekimwekid en pihl lao lel sounpar 200 samwalahro. Ahpw, tehk dahme Paipel kasalehda sounpar kid kei samwalahro. Wadek Sohp 36:27, 28, oh mwuri koasoiapene peidek pwukat:
-
Dahme ke pwuriamweiki duwen kawehwe mengei wet, duwen koasoandien mwekimwekid en pihl?
-
Ia duwe, iren Paipel kan me ke ahpwtehn wadek kakehlahda omw likih Paipel?
5. Paipel kohpada mwekid kesempwal kan
Wadek Aiseia 44:27–45:2, oh mwuri koasoiapene peidek wet:
-
Soangen oaritik dah kan me Paipel kohpada sounpar 200 mwohn Papilon eh lohdi?
Poadopoad kadehdehda me Nanmwarki Sairus en Persia oh nah karis en sounpeio kalowehdi kahnimw en Papilon nan pahr 539 Mwohn Krais. Re kakusala pillapo me kin pere kahnimwo. Mwurin ar pedolong nan kahnimwo ni ewen kehl ko me ritpeseng, re kalowehdi kahnimwo ni ar sohte mahwen. Rahnwet, sounpar 2,500 douwer powe, Papilon wiewiahte mohn kahnimw ehu. Tehk dahme Paipel kohpada.
Wadek Aiseia 13:19, 20, oh mwuri koasoiapene peidek wet:
-
Ia duwen dahme wiawihong Papilon eh kadehdehda pweidahn kokohp wet?
Mohn kahnimw en Papilon nan Iraq rahnwet
6. Paipel kohpada soahng kan me kitail kin kilang rahnwet
Paipel kin mahsaniheki atail ahnsou “imwin rahn akan.” (2 Timoty 3:1) Tehk dahme Paipel kohpada duwen erein imwin rahn akan.
Wadek Madiu 24:6, 7, oh mwuri koasoiapene peidek wet:
-
Soangen mwekid dah kan me Paipel mahsanih me pahn pwarada ni imwin rahn akan?
Wadek 2 Timoty 3:1-5, oh mwuri koasoiapene peidek pwukat:
-
Dahme Paipel kawehwehda duwen en aramas akan wiewia ni imwin rahn akan?
-
Mehnia rehn soangen wiewia pwukat me ke kin kilang?
EKEI ARAMAS KIN NDA: “Paipel kin audaudki soai kan oh koasoien mahs kan.”
-
Ia omw madamadau, dahme uhdahn kamehlelehiong uhk me kitail kak likih Paipel?
DAHME KE SUKUHLKIER
Poadopoad, palien sains oh kokohp kan kasalehda me ke kak likih Paipel.
Kousapahl
-
Koasoi kan me mi nan Paipel uhdahn mehlel?
-
Ia ekei ire kan me Paipel kasalehda me pwungiong palien sains?
-
Ke kamehlele me Paipel kak kohpada dahme pahn wiawi ni ahnsou kohkohdo? Dahme kahrehda?
PIL TEHK
Mie soahng kan nan Paipel me sohte pahrekiong palien sains?
Ia ire mehlel kan duwen “imwin rahn akan”?
“6 Kokohp En Paipel Me Ke Kilang Pweidahr” (Kahn Iroir, June 1, 2011)
Sukuhlki ia duwen kokohp en Paipel kan duwen Wehin Krihs ar pweida.
Kilang ia duwen kokohp en Paipel kan eh wekidala en emen ohl eh madamadau duwen Paipel.
a Kokohp kan iei rohng kan sang rehn Koht oh ekei kokohp kin kasalehda dahme pahn wiawi ni ahnsou kohkohdo.
