Estados Unidospi Centros para el Control y la Prevención de Enfermedades nisqamanta kajkuna, 15 watayojkunata, 19 watayojkunatawan tapurisqanku, sexo oral nisqata ruwasqankutachus manachus. a Paykunamanta casi khuskanpunitaj “arí” nisqanku. Sexo oral: el nuevo beso de buenas noches nisqa librota qhelqaj, Sharlene Azam nin: “Jovenesqa sexo oralta ruwayta allillanpaj qhawanku, mana yuyankuchu khuchichakuy juchapuni kasqanta”, nispa.

•  ¿Imatá qan yuyanki?

•  ¿Ajinapunichu kanman?

•  ¿Imatá Biblia nin?

 Kay tapuykunaman “arí” chayri “mana” nispa kutichiy.

1.   Uj sipas, ¿qharej jispʼananta chʼonqasqanrayku onqoj rikhurinmanchu?

   1.   Arí

   2.   Mana

2.   ¿Jispʼanasninkuta chʼonqanakusqankurayku onqonkumanchu?

   1.   Arí

   2.   Mana

3.   ¿Jispʼanasninkuta chʼonqanakusqanku khuchichakuy juchapunichu?

   1.   Arí

   2.   Mana

 Kutichisqaykita kaykunawan kikinchay.

1.   Uj sipas, ¿qharej jispʼananta chʼonqasqanrayku onqoj rikhurinmanchu?

    Kutichiynin: Mana. Chayrayku ashkhas yuyanku jispʼanasninkuta chʼonqanakoyqa allillan kasqanta. Chayta yuyaspaqa pantashanku.

2.   ¿Jispʼanasninkuta chʼonqanakusqankurayku onqonkumanchu?

    Kutichiynin: Arí. Chay millay imasta ruwajkunaqa onqonkuman: Hepatitis A, hepatitis B nisqawan, gonorreawan, herpeswan, sidawan, sífilis nisqawan ima. Partesninkupipis sarnas rikhurinman.

3.   ¿Jispʼanasninkuta chʼonqanakusqanku khuchichakuy juchapunichu?

    Kutichiynin: Arí. Jispʼanasninkuta chʼonqanakusqanku, llojchinakusqanku, sikinkunejta khuchichakusqanku, chayman rijchʼakoj waj imasta ruwasqankupis khuchichakuy juchapuni.

 Imatachus chay millay ruwaykunamanta Biblia nisqanta qhawarina.

 Biblia nin: ‘Diosqa munan khuchichakuy juchamanta tʼaqakunaykichejta’, nispa (1 Tesalonicenses 4:3).

 ‘Khuchichakuy jucha’ nispaqa parlashan, mana casados kajkuna, qhari warmi jina puñuykunankupaj tukuy millay imasta ruwasqankumanta, nisunman jispʼanasninkuta chʼonqanakusqankumanta, llojchinakusqankumanta, sikinkunejta khuchichakusqankumanta ima. Chay millay imasta ruwajkunaqa llakiypi rikukunku, Diospa ñaupaqenpipis mana allinpajchu qhawasqa kanku (1 Pedro 3:12).

 Biblia nin: “Pichus khuchichakuy juchapi purejrí cuerponpa contranpi juchallikun”, nispa (1 Corintios 6:18).

 Sexo oralta ruwajkunaqa, nisunman jispʼanasninkuta chʼonqanakojkunaqa onqonku, llakiypi rikukunku, Diospa ñaupaqenpipis niña allinpajchu qhawasqa kanku. Cómo hablar de sexo con los adolescentes para que te escuchen nisqa libro nin: “Mana casados kajkunaqa, qhariwarmi jina puñuykunankupaj millay imasta ruwasqankumanta arrepientekunku, novionku chayri novianku paymanta mana llakikusqanta yuyanku, ajinallapunitaj kanku piwanpis qhariwarmi jina puñuykuspa. Chayrayku jovenesman ninanchej tiyan chay millay imasta ruwayqa, khuchichakuy juchapuni kasqanta, chayta ruwaytaj mana allinchu kasqanta”.

 Biblia nin: “Noqa Jehová Diosniyki kani, noqa yachachiyki imachus qanpaj allin kasqanta”, nispa (Isaías 48:17).

 Jehová Diospa kamachiykunasnin, ¿allinniykipajchu? Chayrí, ¿allin imasmanta jarkʼashasusqantachu yuyanki? Autoykipi uj ñanta rishasqaykipi tʼukuriy. Ñanpeqa ashkha señales tiyan apurata rinapaj, sayanapaj ima. ¿Chay señales kasqan yanapasunkichu chayri perjudicasunkichu? ¿Imataj kanman chay señalesta mana kasojtiyki, wajkunapis mana kasojtinku?

 Chay señales jinallataj Diospa kamachiykunasninpis. Kamachiykunasninta mana kasusun chayqa, llakiyllapi rikukusun (Gálatas 6:7). Sexo inteligente (Sex Smart) nisqa libro nin: “Creenciasniykita qhesachanki, millayta kausanki, yachashaspa astawan sajra imasta ruwanki chayqa, astawan pisipaj qhawakunki”, nispa. Sichus Jehová Diospa kamachisqasninta kasukunki chayqa, kausayniyki may sumaj kanqa, nitaj sonqoykipis juchachasonqachu (1 Pedro 3:16).