¿Tatasniyki saqesunkuchu redes sociales nisqapi chateanaykita, chaypi kaj imastawan qhawanaykita? Ajina kajtin, kay yachaqana kinsa imaspi yanapasonqa mana llakiyman chayanaykipaj.

Kaypi kay imasta yachakusunchej:

•  Redes socialesta qhawarisqalla kaspa tiemponchejta usuchisunman

•  Redes socialesta qhawarisqalla kaspa mana allintachu puñukusunman

•  Redes socialesta qhawarisqalla kaspa llakikuyta qallarisunman

•  Wakin jóvenes jinata ninku

 Redes socialespi kayqa autota manejay jina, mana allinta manejayta yachankichu chayqa, maymanpis chinkaykullawaj, chʼallpakuwajtaj.

 Joanna nin: “Wakin kutisqa uj ratitulla redes socialesta qhawarqosaj nispa yaykuni, mana reparakuspallataj ashkha horasta chaypi kani. Redes socialeswanqa musphallasunman, tiempotapis usuchillasunman”, nispa.

 ¿Yacharqankichu? Kay redes sociales nisqaqa ruwasqa kashan runas chayllapi kayta munanankupaj jina. Redes socialesta ruwajkunaqa uj red social may rejsisqa kananpaj jina ruwanku, ashkhas chayman yaykunankupaj. Imajtinchus paykunaqa yachanku empresarioswan negociosniyoj kajkunawan propagandasninkuta chayman churanankupaj ashkhata paganankuta.

 Kayta tapurikuy: “Redes socialesman yaykuspa, ¿ashkha tiempotachu chaypi kani mana reparakuspalla? Chaypi tiempoyta usuchinaymantaqa, ¿allin imasta ruwaymanchu?”, nispa.

 Kayta ruwawaj: Ñaupajmantaña yuyaychakuy mashkha tiempotachus redes socialespi kanaykita, chay nisqaykitataj juntʼay.

 Tina nin: “Celularniyta programarqani uj tiempota qhawasqaytawan wakin aplicacionesta wisqʼarpananpaj. Qallariypeqa mayta kallpachakorqani mana watejmanta chay aplicacionesta kicharinaypaj. Ajinapi niña redes socialeswan chʼisiyarqanichu”, nispa.

 Biblia niwanchej: “Tiempoykichejta ama usuchiychejchu” (Efesios 5:16).

 Ashkha especialistas ninku jovencitosqa 8 horasllatapis puñunanku kasqanta, jinapis ashkhas pisi horasllata puñushanku. Chaytaj ajina imajtinchus puñushanankumantaqa redes socialespi kashanku.

 María nin: “Niraj puñukapushaspa celularniyta qhawaykurinipuni. Jinapis imastachus redes socialesman churamusqankuta qhawaspa horasta kani. Kunanqa manaña chayta ruwanaypaj kallpachakushani”, nispa.

 ¿Yacharqankichu? Pisillata puñojtinchejqa mayta phutikusunman, depresión onqoypis japʼiwasunman. Jean Twenge sutiyoj psicóloga nisqanman jinaqa, uj runaqa llakikullanmantaj pisillata puñusqanrayku. Chantapis nillantaj: ‘Sichus uj runa pisillatapuni puñunman chayqa, tiemponman niña yuyayninpichu kanman’, nispa. a

 Kayta tapurikuy: “¿Sapa tuta mashkha horastataj puñuni? Puñukapunay kashajtin, ¿redes socialestarajchu qhawashani?”, nispa.

 Kayta ruwawaj: Chʼisisnenqa celularniykita, tabletaykita cuartoykimanta orqhoy. Allin kanman puñunaykipaj iskay horas faltashajtin ni ima pantallatapis qhawanayki. Rijchʼarinaykipaj alarmata necesitanki chayqa, ama celularniykipi chayri tabletaykipi chayta churaychu, allin kanman chayta waj aparatopi churanayki.

 Jeremy nin: “Wakin chʼisisqa tutakama celularniyta qhawaspa kani, jinapis kallpachakushani manaña chayta ruwanaypaj. Allin yuyayniyoj runa kanaypajqa, imatapis allinta ruwanaypaj kallpachakunay tiyan. Kunanqa tempranito puñukapuyman yachaykukushani, qʼayantin mana mala ganalla kashanaypaj”, nispa.

 Biblia niwanchej: ‘Imaschus aswan allin imas kasqanta reparay’ (Filipenses 1:10).

 Uj pacha ashkha jovencitosta tapukorqa. Paykunamanta casi khuskanpuni nerqanku llakisqalla kasqankuta. Chaytaj ichá ajina redes socialesllapi kasqankurayku. Leonard Sax doctorqa jinata nin: “Astawanqa llakikuyta yachanku redes sociales qhawarisqalla kajkuna, chayta qhawaspa wajkunawan kikinchakusqankurayku”, nispa. b

 Phoebe nin: “Jovenesqa wajkunawan kikinchakuyta yachanchejpuni, kay redes socialestaj astawan chayta ruwanapaj tanqawanchej. Chaypeqa horasta wajkunaj fotosninkuta qhawasunman, paykunawantaj kikinchakusunman, chayri amigosninchej kusirikushasqankuta rikusunman, noqanchejtaj chayta pierdeshasqanchejta yuyasunman”, nispa.

 ¿Yacharqankichu? Redes sociales amigosninchejwan parlarinapaj yanapawajtinchejpis, uyapurapuni paykunawan parlariy aswan sumaj. Nicholas Kardarasqa tecnologiaman cebasqa kajkunamanta sumajta yachan. Pay nin: “Runasqa wajkunawan karikuytapuni necesitanchej. Redes socialestaj mana chaypaj anchata yanapawanchejchu”, nispa. Chantapis nillantaj: “Redes socialesqa mana yanapawanchejchu wajkunata aswan sumajta rejsinapaj”, nispa. c

 Kayta tapurikuy: “Amigosniy imastachus ruwasqankuta rikuspa, ¿sapayakunichu? Redes socialespi amigosniyta may kusisqa kashasqankuta rikuspa, ¿yuyanichu ni jaykʼaj paykuna jina kusisqa kanayta? Imatapis redes socialesman churajtiy, ¿chaymanta pisillata chayri ni imata nimojtinku desanimakunichu?”, nispa.

 Kayta ruwawaj: Allin kanman uj mashkha diasta, uj semanata chayri uj killata redes socialesman mana yaykunayki. Astawanpis kallpachakuy amigosniykiwan astawan uyapura chayri telefononejta parlarikunaykipaj. Uj tiempota manaña redes socialesman yaykojtiykeqa, ichapis llakiyniyki pisiyanqa, aswan kusisqataj kanki.

 Briana nin: “Redes socialesman yaykoj kani chaypachasqa, imastachus wajkuna ruwashasqankuta mayta yachayta munaj kani. Ashkha redes socialesmanta llojsipojtiytaj, llasa qʼepitapis wijchʼupuyman jina karqa. Ajinamanta tiempoyoj karqani aswan sumaj imasta ruwanaypaj”, nispa.

 Biblia niwanchej: “Sapa ujpis imastachus ruwasqanta allinta qhawaykurichun. Ajinamanta paypa ruwasqanmanta kusikonqa mana wajkunawan kikinchakuspalla” (Gálatas 6:4).