Diosqa Bibliata qhelqacherqa tukuy noqanchejpaj. Payta rejsinapajtaj Bibliata estudiananchej tiyan (Juan 17:3; 2 Timoteo 3:16). Jehová Diosqa Bibliapi willawanchej imatachus runaspaj ruwananta, kay jallpʼata uj paraisoman tukuchinanta ima (Génesis 3:15; Apocalipsis 21:3, 4).

Bibliaqa sumajtapuni runasta yanapan, chayrayku ni mayqen libropis Bibliaman rijchʼakunchu. Bibliaqa Jehová Dios jina kanapaj yanapawanchej, pay jina munakuyniyoj, jatun sonqoyoj, khuyakuyniyoj kanapaj. Chantapis willawanchej qhepaman uj sumaj kausay kananta, chayta yachaytaj yanapawanchej ima llakiytapis aguantanapaj. Chantapis Bibliaqa sutʼiman orqhon kay mundomanta runaspa ruwasqasninkoqa mana Diospa munayninman jinachu kasqanta (Salmo 119:105; Hebreos 4:12; 1 Juan 2:15-17).

Bibliataqa qhelqarqanku hebreo parlaypi, arameo parlaypi, griego parlaypi ima. Bibliaqa tukuynin chayri wakin librosnillan 3.000 kuraj parlaykunapiña kashan. Kunankamaqa ni mayqen librotapis ajinata traducikunchu ashkha runasman chayananpaj. Chaytaj mana tʼukunapajchu, kikin Bibliallataj niwanchej: “Diospa Gobiernonmanta sumaj willaykunapis jallpʼantinpi willakonqa tukuy naciones yachanankupaj, chaypachamá tukukoyqa jamonqa”, nispa (Mateo 24:14).

Bibliaj willasqan manchay sumaj kasqanrayku mayta kallpachakorqayku sumajta traducinaykupaj, imaynachus Biblia ñaupajta karqa chay kikin kananpaj. Chantapis kallpachakorqayku kay Biblia sutʼisitu kananpaj, leeyta atinapaj jinallataj kananpaj. Kay Bibliaj yanapasninpi willashan imaynatachus kay Biblia traducikusqanta, ima waj yanapaschus kay Bibliapi kasqanta ima. Chay yanapasqa kanku: “¿Imaynatá Bibliata traducikun?”, “¿Imayna ruwasqataj kay Biblia?”, chantá “¿Imaynatá Biblia kunankama kashallanpuni?”.

Jehová Diosta munakojkuna, paytataj yupaychajkunaqa munanku Diospa Palabran imaynachus ñaupajta qhelqakorqa chay kikin kananta, chʼuwitataj kananta (1 Timoteo 2:4). Munayku Diospa Palabran Biblia ashkha parlaykunapi tijrachisqa kananta, chayrayku kay Bibliata quechuaman traducerqayku. Munasqa runa masi, Diosmanta mañapuyku kay Biblia payta tarinaykipaj yanapasunanta (Hechos 17:27).