1 Crónicas 14:1-17
14 Tiromanta rey Hiramqa+ willajkunata Davidman kachamorqa. Kachamullarqataj albañilesta,* carpinterostawan, cedro maderasta aparisqata Davidpaj wasita ruwapunankupaj.*+
2 Davidqa sutʼita repararqa Jehová Dios paypa gobiernonta allinta sayachisqanta Israelta rey jina kamachinanpaj.+ Diosqa Israel nacionninrayku+ Davidpa gobiernonta jatunpaj qhawacherqa.
3 Davidqa Jerusalenpi waj warmiswan casarakullarqataj,+ ajinamanta qhari wawasnin, warmi wawasnin astawan yapakorqa.+
4 Jerusalenpi nacekorqanku chay qhari wawasninpa sutisninkoqa kaykuna karqanku:+ Samúa, Sobab, Natán,+ Salomón,+
5 Ibhar, Elisúa, Elpélet,
6 Noga, Néfeg, Jafía,
7 Elisamá, Beeliadá, Elifélet ima.
8 Filisteosqa Davidta tukuy Israelta kamachinanpaj+ churasqankuta yachaytawankama, tukuyninku Davidwan maqanakoj jamorqanku.+ Davidtaj chayta yachaytawan paykunawan maqanakoj rillarqataj.
9 Filisteosqa Refaím ura pampasman+ chayaspa chaypi tiyakojkunawan maqanakuyta qallarerqanku.
10 Davidtaj Diosta taporqa: “Diosníy, ¿filisteoswan maqanakoj risajchu? ¿Paykunata makiyman entregaykuwankichu?”, nispa. Jehová Diostaj kuticherqa: “Arí, rillay, paykunataqa makiykiman entregaykusaj”,+ nispa.
11 Chayrayku Davidqa Baal-Perazimman+ rerqa, chaypitaj filisteosta atiparqa. Chantá nerqa: “Cheqa Diosqa* makisniywan enemigosniyta atipaykun, imaynatachus perqata yaku urmachin ajinata”, nispa. Chayrayku chay lugartaqa Baal-Perazimta* suticharqanku.
12 Chaypi filisteosqa santosninkuta saqerparqanku. Chantá Davidqa chay santosta ruphachinankuta kamacherqa, soldadosnintaj ruphaykucherqanku.+
13 Aswan qhepatataj filisteosqa watejmanta chay ura pampaspi+ tiyakojkunawan maqanakorqanku.
14 Davidqa watejmanta Diosta tapukorqa, cheqa Diostaj nerqa: “Ama ñaupaqenkumanta paykunawan maqanakoj riychejchu, astawanqa paykunata muyuykuspa bacá nisqa sachʼas wasapi pakakamuychej. Chantá llojsimuspa paykunawan maqanakunkichej.+
15 Chay bacá nisqa sachʼas patapi soldadospa marchasqankuta jina uyarispaqa, llojsimuspa paykunawan maqanakunkichej. Cheqa Diosqa ñaupaqeykita llojsenqa filisteospa soldadosninta atipananpaj”,+ nispa.
16 Davidqa cheqa Diospa kamachisqanman jinapuni ruwarqa,+ filisteospa soldadosnintataj atiparqanku Gabaonmantapacha Guezerkama.+
17 Davidqa tukuy jallpʼaspi rejsisqa karqa, tukuy nacionestaj Davidta manchachikorqanku Jehová Dios yanapasqanrayku.+
Sutʼinchaykunasnin
^ Chayri “perqasta ruwajkunata”.
^ Chayri “kamachina wasita ruwapunankupaj”.
^ Glosariopi cheqa Dios nisqata leeriy.
^ Baal-Perazim suteqa niyta munan lajrasqaspa patronninku.
