Números 30:1-16
30 Chantá Moisesqa Israel ayllusta* kamachejkunaman+ nerqa: “Jehová Diosqa kayta kamachin:
2 Sichus uj qhari Jehová Diosman juraspa nin imatapis ruwananta+ chayri juraspa nin+ imamantapis waqaychakunanta chayqa, chay nisqantaqa juntʼanan tiyan.+ Payqa ruwananpuni tiyan imatachus ruwasaj nisqanta.+
3 ”Sichus uj sipas tatanpa wasinpi tiyakushaspallaraj, Jehová Diosman juraspa nin imatapis ruwananta chayri imamantapis waqaychakunanta,
4 tatantaj chay ruwasaj nisqanta yachaspa mana imatapis ninchu chayqa, chay sipasqa juntʼanan tiyan imastachus ruwasaj nisqanta chayri imasmantachus waqaychakunanta nisqanta.
5 Sitajchus tatan imastachus ruwasaj nisqanta yachaspa chayri imasmantachus waqaychakunanta nisqanta yachaspa mana munanchu ruwananta chayqa, chay nisqantaqa manaña juntʼananchu tiyan. Jehová Diostaj chay sipasta perdonanqa, tatan mana ruwananta munasqanrayku.+
6 ”Sichus chay sipas imatapis ruwasaj nisqanmantaña chayri mana allinta piensarikuspalla imatapis ruwasaj nisqanmantaña casarakun,
7 qosantaj chayta yachasqan día mana imatapis ninchu chayqa, chay warmeqa juntʼanan tiyan imatachus ruwasaj nisqanta chayri imamantachus waqaychakunanta nisqanta.
8 Sitajchus qosan chayta yachasqan día mana ruwananta munanchu chayqa, chay warmeqa manaña juntʼananchu tiyan chay ruwasaj nisqanta chayri mana allinta piensarikuspalla imatapis ruwasaj nisqanta.+ Jehová Diostaj payta perdonanqa.
9 ”Sichus uj viuda warmi chayri uj divorciasqa warmi juraspa nin imatapis ruwananta chayqa, juntʼananpuni tiyan chay ruwasaj nisqanta.
10 ”Sichus uj casarasqa warmi qosanpa wasinpi kashaspa juraspa nin imatapis ruwananta chayri imamantapis waqaychakunanta,
11 qosantaj chayta yachaytawan mana imatapis ninchu, nitaj jarkʼanchu chayqa, chay warmeqa juntʼanan tiyan imatachus ruwasaj nisqanta chayri imamantachus waqaychakunanta nisqanta.
12 Sitajchus qosan imatachus ruwasaj nisqanta yachaspa chayri juraspa imamantapis waqaychakunanta nisqanta yachaspa, chay yachasqan día mana munanchu ruwananta chayqa, warmenqa imatachus ruwasaj nisqanta manaña juntʼananchu tiyan.+ Jehová Diostaj chay warmita perdonanqa, qosan mana ruwananta munasqanrayku.
13 Qosanqa imatachus warmin ruwasaj nisqanta yachaspa chayri juraspa imamantapis waqaychakunanta nisqanta yachaspa, niyta atin warmin ruwananta chayri mana ruwanantapis.
14 Sichus qosan chayta yachaspa mana imatapis ninchu, diastaj pasapunman paytaj chʼinllapuni kanman chayqa, payqa saqeshan warmin juntʼananta imatachus ruwasaj nisqanta chayri imamantachus waqaychakunanta nisqanta. Chayta yachasqan día mana imatapis nisqanrayku, qosanqa warminta saqeshan imatachus ruwasaj nisqanta juntʼananta.
15 Sichus qosan yachasqan diamanta qhepataña mana ruwananta nin chayqa, pay apanqa warminpa juchanta”,+ nispa.
16 Chay imasta Jehová Diosqa Moisesman kamacherqa uj qosamanta warminmantawan, jinallataj uj tatamanta wasinpi tiyakoj sipas wawanmantawan.
Sutʼinchaykunasnin
^ Uj aylloqa uj familiamanta miraj ashkha familias kanku.
