Job 1:1-22
1 Uj runa Uz jallpʼapi tiyakorqa, sutintaj Job*+ karqa. Jobqa mana juchayoj karqa, cheqan runataj.+ Payqa Diosta manchachikoj, sajra ruwaykunatataj chejnikoj.+
2 Paypataqa qanchis qhari wawasnin karqa, warmi wawasnintaj kinsa karqanku.
3 Uywasninpis may chhika karqa: 7.000 ovejas, 3.000 camellos, 1.000 wakas,* 500 burros.* Kamachisninpis allin ashkhapuni karqanku. Jobqa inti llojsimuy ladopi tiyakojkunamanta aswan qhapaj karqa.
4 Jobpa qhari wawasnenqa sapa ujninku turnakuspa wasisninkupi mikhunasta waykʼuchej kanku. Paykunaqa kinsantin hermanasninkuta wajyarikoj kanku, khuska mikhurikunankupaj, ujyarikunankupaj.
5 Chay mikhunasta tukuyninku ruwasqankutawan, Jobqa tukuynin wawasninta wajyachimoj Diospa ñaupaqenpi llimphuchakunankupaj. Payqa sutʼiyayta sayarispa uywasta wañuchiytawan Diospaj qʼolachipoj,*+ sapa wawanpa sutinpi. Jobqa chayta ruwaj kayta nispa: “Ichapis wawasneyqa juchallikorqanku, Diostataj sonqonkupi maldicerqanku”, nispa. Jobqa chayta ruwallajpuni.+
6 Uj pʼunchay angelesqa*+ Jehová Diospa ñaupaqenman yaykorqanku,+ lugaresninkuman. Satanaspis+ paykunaj chaupinkuman yaykullarqataj.+
7 Jehová Diostaj Satanasta taporqa: “¿Maymantataj jamushanki?”, nispa. Satanastaj Jehová Diosman kuticherqa: “Jallpʼa patata purispa qhawaykachamusqaymanta”,+ nispa.
8 Jehová Diostaj Satanasta nerqa: “¿Rikorqankichu kamachiy Jobta? Pay jinaqa mana pipis jallpʼa patapi kanchu. Payqa mana juchayoj, cheqan runa,+ Diosta manchachikun, sajra ruwaykunatataj chejnikun”, nispa.
9 Satanastaj Jehová Diosman nerqa: “Chanta, ¿qhasichu Jobqa Diosta manchachikun?+
10 ¿Manachu qanllataj tukuy imamanta payta jarkʼanki?+ ¿Manachu qanllataj payta, familianta, tukuy imasnintapis perqawan jina muyuykuchispa jarkʼanki? Tukuy ima ruwasqanta bendecinki,+ uywasnintapis mirachinki.
11 Kunanqa makiykita aysarispa tukuy kapusqanta qhechuy, rikunkitaj uyaykipi maldecisusqanta”, nispa.
12 Jehová Diostaj Satanasta nerqa: “Tukuy kapuynintaqa imanaypis, makiykipi kashan. Payllata ama imanankichu”, nispa. Chaymantataj Satanasqa Jehová Diospa ñaupaqenmanta llojserqa.+
13 Uj pʼunchay Jobpa qhari wawasnin, warmi wawasninpis khuska mikhusharqanku, vinotapis ujyasharqanku kuraj hermanonkoj wasinpi.+
14 Chaypacha ujnin kamachin chayamuspa Jobman willarqa: “Wakasniykiwan llankʼasharqayku, burrosniykipis chaynejpi mikhusharqanku.
15 Jinallapi sabeos jamuspa muyuykuwayku, uywasniykita suwakapunku, kamachisniykitapis espadawan wañurachinku. Noqalla ayqemuni willasunaypaj”, nispa.
16 Chay kamachin parlashajtillanraj waj kamachiñataj chayamuspa Jobta nerqa: “Cielomanta Diospa ninan urmamun, laurarispataj ovejasniykita, michejkunatawan qʼalata ruphaykun. Noqalla ayqemuni willasunaypaj”, nispa.
17 Chay kamachin parlashajtillanraj waj kamachiñataj chayamuspa Jobta nerqa: “Kinsa tropa caldeos+ jamuspa ujllata camellosniykiman correykunku, suwakapunkutaj. Kamachisniykitapis espadawan wañurachinku. Noqalla ayqemuni willasunaypaj”, nispa.
18 Chay kamachin parlashajtillanraj waj kamachiñataj chayamuspa Jobta nerqa: “Qhari wawasniyki, warmi wawasniykiwan khuska mikhusharqanku, vinotapis ujyasharqanku kuraj hermanonkoj wasinpi.
19 Jinallapi sinchʼi wayra chʼin pampasmanta wayramuspa, chay wasej tawantin esquinasninman wajtakamun, wasitaj wawasniykej patankuman urmaykun. Tukuyninku wañupunku. Noqalla ayqemuni willasunaypaj”, nispa.
20 Chayta uyarispa Jobqa sayariytawan ropanta llikʼirakorqa, chujchantapis kʼutukorqa. Chantá pampaman qonqoriykukuspa kʼumuykukorqa,
21 nerqataj:
“Mamaypa wijsanmantaqa ni imayoj llojsimorqani,wañuspataj ni imata apasajchu.*+
Jehová Dios qowan,+ Jehová Diosllataj qhechukapuwan.
Jehová Diospa sutenqa jatunchasqallapuni kachun”, nispa.
22 Chay jina llakiykunapi rikukuspapis, Jobqa mana juchallikorqachu, nitaj ima sajratapis Diospa contranpi parlarqachu.
Sutʼinchaykunasnin
^ Job suteqa ichapis niyta munan wajkunaj ñakʼarichisqan runa.
^ Hebreo parlaypeqa nin, “500 yuntas”.
^ Hebreo parlaypeqa nin, “china burros”.
^ Chayri “ruphachipoj”.
^ Hebreo parlaypeqa nin, “Diospa wawasnenqa”.
^ Hebreo parlaypeqa nin, “Mamaypa wijsanmantaqa qʼalalla llojsimorqani, qʼalallataj kutiykusaj”.
