Job 12:1-25
12 Jobtaj kuticherqa:
2 “Arí á, qankunalla kankichej yachayniyoj runasqa.
Wañojtiykichejqa niña pipis yachayniyojqa kanqachu.
3 Noqaqa qankuna jinallataj yachayniyoj kani.
Qankunamanta nisqaqa mana imapipis pisichu kani.
¿Pitaj mana yachasqachu chay imastari?
4 Diosman qhaparikorqani uyarinawanta munaspa,+amigosniytaj asipayawanku.+
Runasqa asipayallanku mana juchayoj cheqan runatapis.
5 Mana ima phutiyniyoj runaqa mana yuyallanpischu imapis pasanantaqa.
Paymantaqa llakiypi rikhurej runasllata imapis qhatirin.
6 Suwasqa wasisninkupi allinta kausakunku.+
Diosta phiñachejkunapis, ni ima llakiyniyoj kanku,+santosninkuta yupaychanankupaj apaykachashajtinkupis.
7 Animalesta tapurikuy, yachachisonqankutaj.
Pʼisqostapis tapurikuy, willasonqankutaj.
8 Jallpʼatapis allinta qhawariy, yachachisonqataj.
Mar qochamanta pescadospis imatachus yachasqankuta willasonqanku.
9 Jehová Diospuni makinwan chay imasta ruwan.
¿Mayqenninkutaj chayta mana yachanchu?
10 Diospa makinpi tukuypa kausayninku kashan,jinallataj tukuy runaspa kausay samayninkupis.*+
11 ¿Nichu ninreqa reparan runaj parlasqanta,imaynatachus simipis llamirispa mikhunata reparayta yachan ajinata?+
12 ¿Manachu machu runasqa yachayniyoj kanku?+
¿Manachu runasqa machuyasqankuman jina aswan yachayniyojman tukunku?
13 Diosqa yachayniyoj, atiyniyojtaj.+
Paymin yachayniyojqa, munaynintataj juntʼanqapuni.+
14 Imatapis urmachin chayqa, ni pi watejmanta sayarichiyta atinchu.+
Wisqʼasqantapis ni pi kichariyta atinchu.
15 Manaña parachimojtenqa tukuy ima chʼakipun.+
Parachimojtintaj yakoqa jallpʼata pʼampaykun.+
16 Diosqa kallpayoj, yachayniyojtaj.+
Pantaj runaspis pantachej runaspis paypata kanku.
17 Diosqa yuyaychaj runasta qʼara chakisllata purichin.
Juezkunatapis mana yuyayniyojman tukuchin.+
18 Payqa reyesta autoridad kasqankumanta orqhon,+esclavosmantaj tukuchin.
19 Payqa sacerdotesta* qʼara chakisllata purichin,+allin sayasqa autoridadestapis urmachin.+
20 Yuyaychajkunata opasman tukuchin.
Kurajkunaj allin yuyayninkutapis chinkachin.
21 Kamachejkunata kʼumuykachachin.+
Atiyniyojkunatapis mana atiyniyojman tukuchin.
22 Laqhapi pakasqa imasta sutʼiman orqhon.+
Manchay laqha lugaresta kʼanchaykuchin.
23 Nacionesta jatun atiyniyojman tukuchin chinkachinanpaj.
Nacionesta jatunyachin, waj llajtasman presosta apachinanpaj.
24 Llajtaj kurajkunasninpa yachayninkuta qonqachin,mana mayman riy atina chʼin pampaspitaj pawichispa purichin.+
25 Paykunaqa laqhapi thamaykachaspa purinku,+ maypichus mana kʼanchay kanchu chaypi.
Machasqasta jina kayman jaqayman purichin.+
