Job 7:1-21
7 ”Kay jallpʼapi wañoj runaqa sinchʼita trabajanan tiyan wañunankama.
Sapa diataj peón jinalla kausakun.+
2 Payqa esclavopis kanman jina llanthurikuyta munan,peón jinataj pagapunankuta munan.+
3 Ajinata noqaqa killasta qhasipaj kausani,sapa chʼisitaj llakisqalla kani.+
4 Puñunaypaj siriykushaspaqa* ‘sutʼiyamullanmanñapis’ nini.+
Nitaj sutʼiyamunchu, mana puñuyta atispataj suntʼisqaypi* sutʼiyani.
5 Cuerpoyqa khuroj tukusqan kashan, jallpʼapurulla.+
Aycha qarayqa qarachasniyoj kashan, qʼala qʼeyachasqa.+
6 Kausasqay pʼunchaykunaqa rato pasapun, awashaspa minita pasachisqankumantapis aswan ratoraj.+
Kausayneyqa usqhayllata tukukapushan, nitaj imapis kanñachu suyakunaypaj.+
7 Diosníy, yuyarikuy ari kausayneyqa samay jinalla kasqanta.*+
Yuyarikuy ari niña ujtawan kusisqachu kanayta.
8 Kunan rikuwajqa niña ujtawan rikuwanqañachu.
Rikuwayta munaspa maskʼawanki, nitaj tariwankiñachu.+
9 Imaynatachus phuyoqa chinkapun,ajinata Sepulturaman* yaykojqa niña ujtawan llojsimunchu.+
10 Niña ujtawan wasinman kutenqachu,llajta masisninpis niña paymanta yuyarikonqankuchu.+
11 Chayrayku mana chʼinllaqa kaymanchu.
Sonqoyqa nanasqa kashan, parlasajpuni.
Kay jina llakiypi kashani, atisqayta qhaparikusaj.+
12 ¿Imajtintaj uj guardiata noqapaj churankiri?
¿Mar qochachu kasqani? ¿Mar qochamanta may chhikan animalchu kasqani?
13 Noqa nini: ‘Camaypi siriykuspaqa sonqochakusaj.
Camayqa llakiyniyta pisiyachenqa’, nispa.
14 Qantaj mosqoyniypi imaymanasta rikuchiwaspa sinchʼita mancharichiwanki.
Mosqoypi jina imaymanasta rikuchiwaspa manchariykuchiwanki.
15 Aswan allin kanman qʼallpinawayki.
Arí, allin kanman wañunay, kay jinata kausanaymantaqa.+
16 Amisqaña kani kausayniywan.+ Niña kausayta munanichu.
Saqellawayña, kausayneyqa uj samay jinalla.+
17 ¿Imapunitaj wañoj runa kasqa paymanta yuyarikunaykipajri?
¿Imajtintaj ñawillaykipi purichinkiri?+
18 ¿Imajtintaj sapa paqarin pay qhawarisqalla kankiri?
¿Imajtintaj sapa rato pruebaman churankiri?+
19 ¿Nichu uj ratollapis waj ladota qhawariwaj,thoqayniyta pasaykuchinaykama?+
20 Tukuy runasta qhawamoj Dios, sichus juchallikuni chayqa, ¿imanaykitaj qantari?+
¿Imaraykutaj noqatapuni flechanaykipaj churakuwankiri?
Noqarí, ¿llasa qʼepichu qanpaj kani?
21 ¿Imajtintaj juchayta mana pampachankichuri?
¿Imajtintaj pantasqaytapis mana perdonawankichuri?
Tumpamantawanqa wañusaj, jallpʼamantaj tukusaj,+chaypacha maskʼawanki, niñataj tariwankiñachu”.
Sutʼinchaykunasnin
^ Siriy: waj lugarespi ninku winkuy.
^ Suntʼiy: waj lugarespi ninku qhospay.
^ Chayri “wayra jinalla kasqanta”.
