30 YACHAQANA

Videojuegospi pukllay, ¿allinchu?

 BRIAN nin: “Videojuegospi pukllay may sumaq, imaraykuchus chaypi tukuy imata ruwayta atiwaq ni ima chʼampaypi satʼikuspa”. Deboramanpis videojuegospi pukllay gustallantaq, chaywanpis pay nin: “Videojuegospi pukllayqa, achkha tiempota qhichuwanchik, chaymantaq yachaykukunchik”, nispa.

Wakinkunaqa, videojuegos runap may sumaq ruwasqan kasqanta ninku. Chaywanpis ichá qampaqqa, mana chayllachu. Imaraykuchus wakin videojuegospi pukllayqa, kusisqa kanaykipaq, usqhayllata tʼukuriyta, allinta ñawiriyta, chayri usqhayllata yupayta yachanaykipaq yanapasunki. Astawanqa, kunallanraq rikhuriq videojuegopi pukllankiña chayqa, compañerosniykiwan chaymanta parlayta atinki, videojuegosllamanta parlayta munasqankurayku.

Kay videojuegosmanta, chiqamanta tarinki wakin videojuegos allin pukllanapaq kasqanta, cristianospaqpis kusalla kasqanta. Chaywanpis allinta akllanayki tiyan. ¿Imaraykutaq?

Mana tukuy videojuegoschu allin

Llakikunapaqjina, mana tukuy videojuegoschu allin. Imaraykuchus wakinkunaqa, “aychaj ruwasqasnen[ta]” ruwanankupaq pukllaqkunata tanqan, chay ruwaykunatataq Diosninchik juchachan (Gálatas 5:19-21).

Ima videojuegopichus achkha waynas pukllaq kasqankumanta parlaspa, Adrián 18 watayuq nin: “Chay videojuegopi pandilleros maqanakuchkasqanku, drogakuchkasqanku, millayta parlachkasqanku, chantá khuchichakuy, wañuchinakuy ima rikukun”, nispa. Wakinkunapitaq layqa ruwaykunata allinpaq kasqanta rikuchikun. Chantá kunallanraq rikhuriq videojuegospi, astawan kay saqra ruwaykuna rikukun. Achkha waynasqa Internetniqta wak llaqtaspi kachkaq waynaswan videojuegospi pukllanku.  Santiago 19 watayuq nin: “Computadoraykiniqta, wak llaqtapi kachkaq waynawan videojuegopi pukllayta atinki”, nispa.

Chantá kunan tiempopi jukjina videojuegos Internetpi rikhurin, chaykunataq juegos en rol nisqa sutichakun. Kay videojuegospi pukllaqqa, videojuegopi juk pukllaqta (avatar nisqata) rikhurichiyta atin, juk runaman rikchʼakuqta, juk animalman rikchʼakuqta chayri iskayninman rikchʼakuqta. Videojuegopi rikhuriq pukllaqqa, manapis kawsayniyuqchu, computadorapiqa, Jallpʼanchikpipis kawsachkanmanjina rikukun, imaraykuchus chaypiqa wasis, autos, qhatus, fiesta wasis ima rikhurin. Chantá Internetniqta pukllaqkunaqa, pukllachkaspa Internetniqta qillqanakuyta atinku.

Chantá kay videojuegospiqa, suwa runas, phisu warmis, chʼawkiyaqkuna, runa wañuchis ima, rikukullantaq. Internetniqta pukllaqqa, ima millay ruwaykunatachus kawsayninpi mana ruwanmanchu, chaykunata videojuegospi ruwan. Computadorapi, iskay teclasta ñitʼiykuspalla videojuegopi rikhuriq pukllaqta khuchichakunanta kamachinman, pukllachkaspataq piwanchus Internetniqta pukllachkan paywan khuchichakuymanta qillqanakunman. Wakinkunataq computadorapi rikhuriq pukllaqta kamachinku, computadorapi wawitaman rikchʼakuq pukllaqwan khuchichakunanta. Ajina millay videojuegosta ruwasqankumanta, achkha runasqa mayta phiñakunku.

Allin videojuegosta akllay

Maqanakuywan, khuchichakuywan chhapusqa videojuegospi pukllaqkunaqa, ichá ninku kay videojuegosqa, pukllanallapaq kasqanta. Chaywanpis ama chʼawkiyachikuychu, imaraykuchus chay nisqankuqa mana chiqachu.

 Biblia nin: “Uj wawapis ruwasqasnimpi allinta rejsichikun, sichus llimphuta, cheqantataj kawsan chayqa”, nispa (Proverbios 20:11). Millay videojuegospi pukllaptiyki, ¿llimphu yuyayniyuqtachu Jehová qhawasunkiman? Astawanpis, yachakusqanmanjinaqa, maqanakuymanta videojuegospi pukllaqkuna, maqanakuq runasman tukunku. Chantá videojuegospi pukllayqa, teleta qhawaymanta nisqaqa yuyayninchikta astawan tikrachin.

Sutʼinchanapaq; maqanakuymanta, khuchichakuymanta videojuegospi pukllayqa, chʼichi yakuta achkhata ukyaywan kikinchakunman. Ichá qallariypiqa, chʼichi yakuta ukyasqayki wiksaykita mana nanachisunqachu. Chaywanpis pisi tiempoman unqusqa kachkasqaykitaña reparakunkiman, imaraykuchus chʼichi yakuta achkhata ukyayqa, wiksanchikmanta mayta unquchiwasunman. Jinallataq maqanakuymanta, khuchichakuymanta videojuegospi achkhata pukllaspaqa, imachus allin, imataqchus mana allin kasqanta, manaña reparayta atisunmanchu, chayraykutaq saqra ruwaykunamanta ‘manaña pʼinqakusunmanchu’, chantapis yuyayninchikpi saqra yuyaykuna saphichakunman, saqra ruwaykunatataq ruwasunman (Efesios 4:19; Gálatas 6:7, 8).

 ¿Imaynatá allin videojuegosta akllawaq?

Tatasniyki videojuegospi pukllaqta saqisunkuman chayqa, ¿imaynatá yachawaq ima videojuegoschus allin pukllanapaq kasqanta, machkha unaytachus pukllanayki kasqanta ima? Chayta yachanaykipaq allin kanman kaykunata tapukunayki:

“¿Jehová allinpaqchu qhawawanqa?” Salmo 11:5 nin: “Tata Diosqa kʼacha runasta watun, manchaytataj chejnikun sajra ruwajta [nisunman maqanakuqta]”, nispa. Chantá, Biblia nillantaq layqiriyus mana allinchu kasqanta, Biblia nin: “Tata Diosqa millachikun chaykunata ruwajkunamantaqa”, nispa (Deuteronomio 18:10-12). Chayrayku, Diospa amigon kayta munaspaqa, Salmo 97:10 nisqanmanjina  ruway, chaypi nin: “Tata Diosta munakojkunaqa sajra kajta chejnichunku”, nispa.

“¿Yuyayniyta chʼichichanqachu?” Tapurikuy: “Kay videojuegopi pukllayqa, ¿khuchichakuy juchamanta ayqinaypaq yanapawanqachu?” (1 Corintios 6:18). Khuchichakuymanta videojuegospi pukllayqa, tukuy ima llimphu kaqpi, tukuy kʼacha kaqpi, tukuy allinpaq qhawasqa kaqpi ima yuyanallaykipaqpuni, mana yanapasunqachu (Filipenses 4:8).

“¿Machkha unaytataq pukllasaq?” Allin pukllanapaq videojuegospis, tiemponchikta usuchinman. Chayrayku allin kanman machkha unaytachus pukllachkasqaykita qillqanayki. Ajinamanta yachanki videojuegospi pukllasqaykirayku ima allin ruwaykunatachus mana ruwachkasqaykita (Efesios 5:16).

Arí, Bibliaqa, mana ninchu tukuy tiempo estudianayki, wasipi ruwanasta ruwanayki ima kasqanta. Astawanpis nin “uj tiempotaj asinapaj”, “uj tiempotaj tusunapaj [“phinkiykachanapaq”, NM]” kasqanta (Eclesiastés 3:4). Kay pʼitipi  “phinkiykachanapaq” rimayqa, pukllaymanta, ejerciciosta ruwaymanta ima parlanapaq uqharikun. Chayrayku videojuegopi pukllaspa unayta kanaykimantaqa, aswan allin kanman pukllaspa ejerciciosta ruwanayki.

Allinta akllay

Chiqamanta juk videojuegopi pukllaspa mayta kusikuwaq, astawanraq sumaqta pukllayta yachanki chayqa. Chayraykutaq astawan allinta qhawarikunayki kanqa. Sutʼinchanapaq; ¿ima materiatataq astawan allinta japʼiqayta atinki? Chay materiamanta yachakuyqa astawan gustasunki, ¿icharí? Chiqamanta juk materia gustasuptinqa, chay materiamanta astawan japʼiqayta atinki. Chayrayku tapurikuy: “¿Ima videojuegotaq astawan gustawanrí? Chay videojuegopi pukllay, ¿llimphuta kawsanaypaqchu yanapachkawan?”.

Chayrayku allinta yuyaychakuspa, ima videojuegotachus pukllanaykita allinta akllay, amataq compañerosniyki nisusqankumanjinalla akllaychu. Qam kikiykimanta akllachkaspataq kay pʼitimanta yuyarikuy: “Allinta reparaychej imachus Señorta kusichinanta” (Efesios 5:10).

QHIPAN YACHAQANAPI

Ichá qamtapis takiykunata uyariyqa mayta gustasunki, chaywanpis, ¿tukuy imamanta ñawpaqpichu kachkan?

BIBLIAMANTA

“Tata Diosta munakojkunaqa sajra kajta chejnichunku.” (Salmo 97:10)

JUK YUYAYCHAY

Juk videojuegopi niraq pukllachkaspa, imamantachus kasqanta, atipanaykipaq imatachus ruwanayki kasqanta ima qillqariy. Qillqasqaykitataq, kay yachaqanapi Bibliap yuyaychaykunasninwan kikinchay, pukllanaykitachus manachus reparanaykipaq.

¿YACHARQANKICHU?

Kay 2006 watapi Ámsterdam (Países Bajos) llaqtapi juk hospital kichakun, Internetniqta videojuegospi pukllayman qukuqkunata yanapanapaq.

¡RUAYTA QALLARIY!

Khuchichakuymanta chayri maqanakuymanta videojuegopi pukllanapaq juk amigoy waqyariwaptin, kayta nisaq... ․․․․․

Videojuegospi, kay tiempollata sapa semana pukllasaq: ․․․․․

Kay tiempollata pukllanaypaqtaq, kayta ruwasaq: ․․․․․

Kay yachaqanamanta, ¿imatá tatayta chayri mamayta tapuyta munani? ․․․․․

QHAWASQAYKIMANJINA

● Videojuegospi pukllay, ¿imaynatá yuyayniykita, munayniykita ima tikrachinman?

● Ima videojuegopichus pukllayta munasqaykita niraq akllachkaspa, ¿imaraykutaq Jehovap yuyaychaykunasninmanjina akllanayki tiyan?

● Juk sullkʼa hermanoyki kapusunkiman chayqa, mana allin videojuegomantaq qukunman chayqa, ¿imaynatá yanapawaq?

[249 paginapi sutʼinchaynin]

“Achkha videojuegosqa, millay parlaykunata, maqanakuyta, khuchichakuyta ima, manaña juchapaqchu qhawanaykipaq tanqasunki. Chayrayku ima videojuegopichus pukllanaykita allinta qhawarikuy.” (Amalia)

[250 paginapi dibujo]

Khuchichakuymanta, maqanakuymanta videojuegospi pukllayqa, venenowan pukllaywan ninakunman. Ichá qallariypiqa cuerpoykita mana imanasunkimanchu. Chaywanpis pisi tiempoman cuerpoykipaq mana allinchu kasqanta reparakuwaq