KAUSANALLAPAJPUNEQA SUMAJ KAUSAY KANANPI CREENANCHEJ TIYAN. Uj libro nin: “Sumaj kausay kananta suyakuspaqa, mana yuyanchejchu sapallanchej kasqanchejta, nitaj manchachikunchejchu”, nispa.

Bibliapis chayta nillantaj. Jinapis nillawanchejtaj, pipichus mana atienekunanchej kasqanta. Salmo 146:3 versiculopi nin: “Kamachej runaspeqa ama atienekuychejchu; ama atienekuychejchu runasllapi, pikunachus mana salvayta atejkunapi”, nispa. Runapi atienekunamantaqa, Jehová Diosninchejpi atienekunanchej tiyan. Imajtinchus payqa atiyniyoj tukuy ima nisqanta juntʼananpaj. ¿Imastá Diosninchej niwanchej? Wakinta qhawarina.

SAJRA RUWAYKUNA MANAÑA KANQACHU, LLAMPʼU SONQO RUNASTAJ ALLINTA WIÑAYPAJ KAUSAKONQANKU. Biblia Salmo 37:10, 11 versiculospi nin: “Tumpamantawanqa manaña sajra runas kanqankuchu [...]. Llampʼu sonqoyojkunatajrí kay pachata herenciata jina japʼenqanku, allin kawsaypitaj kusisqa kanqanku”, nispa. Versículo 29 nillantaj: ‘Cheqan runasqa kay jallpʼapi wiñaypaj kausanqanku’, nispa.

GUERRAS TUKUKONQA. Jehová Diosqa “tukuy kay pachapi chʼajwasta chʼinyachin. Maqanakuna flechasta, tʼojsina lanzastapis pʼakiran, caballoswan aysana carretastataj rupharachin” (Salmo 46:8, 9).

ONQOY, LLAKIY, WAÑUY IMA MANAÑA KANQACHU. Diosqa “ñawisninkumanta tukuy waqayta pichanqa, manañataj wañuy kanqachu, nitaj llakiypis, nitaj qhapariypis, nitaj nanaypis. Chay ñaupaj kaj imasqa chinkapunña” (Apocalipsis 21:3, 4).

TUKUYPIS ASHKHA MIKHUNAYOJ KANQANKU. Diosqa nin: “Nacionnimpeqa ashkha trigo kachun; orqo puntaspipis trigoqa wayrawan pujllachun”, nispa (Salmo 72:16).

JALLPʼANTINPI UJ SUMAJ GOBIERNO KANQA: CRISTOJ KAMACHIYNIN. Jesucristoman “atiy qosqa karqa, jinallataj jatumpaj qhawasqa kay, reinopis, tukuy nacionesmanta kaj runas, tukuy parlaymanta kaj runas ima payta sirvinankupaj. Atiynenqa kikillampuni kanqa, kamachinantaj mana jaykʼajpis tukukonqachu” (Daniel 7:14).

Diosninchej imastachus ruwananta nisqan, ¿juntʼakonqapunichu? Arí. Jesusqa kay jallpʼapi kashajtin, uj sumaj Gobierno kananta rikucherqa. Payqa onqosqasta sanoyacherqa, wajchasta mikhucherqa, wañusqastapis kausaricherqa. Mana chayllatachu ruwarqa, payqa runasta allinta kausakunankupaj yachacherqa. Chantapis Jesusqa, imaschus kay qhepa pʼunchaykunapi kananta nerqa.

Jesusqa qhepa pʼunchaykunapi mana allin kausay kananta nerqa. Pay nerqa uj nación waj nacionpa contranta oqharikunanta, yarqhaykuna, wañuchej onqoykuna, terremotos ima kananta. Chaytaj “kay mundoj imasninpa” tukukuyninmanta uj señal jina kanan karqa (Mateo 24:3, 7; Lucas 21:10, 11; Apocalipsis 6:3-8). Jesús nillarqataj: “Sajra kausay yapakusqanraykutaj, ashkhaspa munakuyninku chiriyaponqa”, nispa (Mateo 24:12).

Chaytaj kay tiempopi juntʼakushanpuni. Jinapis mana Jesusllachu chayta nerqa. Bibliaqa 2 Timoteo 3:1-5 versiculospi nillarqataj: ‘Qhepa pʼunchaykunapi runasqa kay jina kanqanku: Paykunallata munakojkuna, qolqeta munakojkuna, paykunaj munaynillankuta maskʼajkuna, jatunchakojkuna, manchay phiñas, familiankuta mana munakojkuna, tatasninkuta mana kasukojkuna. Paykunaqa Diosta yupaychajkunaman rijchʼakullanqanku, manataj chayman jinachu kausanqanku’, nispa.

Sajra ruwaykunaqa, tukukuy pʼunchaykunapi kasqanchejta rikuchiwanchej. Chantá rikuchillawanchejtaj Diospa Gobiernon qayllitapiña kasqanta. Chay Gobiernotaj allin kausayta apamonqa. Jesusqa qhepa pʼunchaykunamanta parlashaspa nerqa: “Diospa Gobiernonmanta sumaj willaykunapis jallpʼantinpi willakonqa tukuy laya runas yachanankupaj, chaypachamá tukukoyqa jamonqa”, nispa (Mateo 24:14).

Chay sumaj willaykunaqa, sajra runasta reparachin sajra kausayninkuta cambianankupaj. Cheqan runastataj yanapan Jehovaj nisqasnin juntʼakunanpi atienekunankupaj. Chaymanta astawan yachakuyta munanki chayqa, kay revistaj wasanta leeriy.