Biblia nin: “Tukuy ima allin kaj regaloqa, jinallataj aswan sumaj regalopis patamanta jamun, cielopi kʼanchaykunata ruwaj Tatamanta”, nispa (Santiago 1:17). Kay versiculoqa Jehová Dios khuyakuwasqanchejrayku imatachus ruwasqanmanta parlashan. Wawanta kachamusqanqa tukuy imamanta aswan sumaj regalo. Chaytataj Wawan Jesusllataj Juan 3:16 versiculopi nerqa. Chaypi nin: “Diosqa chay jinatapuni kay mundomanta runasta munakusqanrayku, uj kʼata Wawanta qorqa, ajinamanta pillapis paypi creejqa mana wañunanpaj, manachayqa wiñay kausayniyoj kananpaj”, nispa.

Jehová Dios kʼata Wawanta qosqanqa ni ima regalowan kikinchakunchu. Imaraykuchus chaynejta wañuymanta, machuyaymanta, juchamantawan kacharichiwanchej (Salmo 51:5; Juan 8:34). Ni pi runapis chaymanta kacharichiyta atiwasunmanchu. Jinapis Diosqa mayta munakuwanchej, chayraykutaj Wawan Jesucristota qorqa kacharichinawanchejpaj. Ajinamanta kasukoj runas wiñaypaj kausakunankupaj. ¿Imaraykú Wawanta Dios kachamorqa? ¿Imaynatá chay yanapawanchej?

Jesusqa kausayninta runasrayku qorqa, chaytaj uj presochasqa runa kacharichisqa kananpaj, mashkhatachus mañanku chayta pagay jina karqa. Bibliaqa nin Jehová Dios ñaupa tatasninchej Adanta Evatawan mana juchayojta ruwasqanta, paykunaqa wawasninkuwan uj kʼachitu huertapi wiñaypaj kausakunanku karqa (Génesis 1:26-28). Jinapis Diosta mana kasukusqankurayku, juchallikuspa tukuy imata chinkacherqanku. Chayrayku Biblia nin: “Uj runanejta jucha kay mundoman yaykumorqa, jucharaykutaj wañuypis tiyan. Ajinamanta wañoyqa tukuy runasman chayarqa, tukuyninku juchallikusqankurayku”, nispa (Romanos 5:12). Adanwan Evawanqa wawasninkuman herenciata jina saqerqanku juchayoj kausayta, chayraykutaj tukuypis wañunchej.

Adanqa mana juchayoj karqa, chayrayku mana juchayoj runallataj juchamanta wañuymantawan kacharichinawanchej karqa. Adanqa Diosta mana kasukusqanrayku juchayojman tukorqa. Biblia nin jinataj Adanqa tukuyninchejta juchaman, wañuymanwan vendeykuwarqanchej. Chaymanta kacharichisqa kananchejpajtaj Jesús kausayninta qonan karqa (Romanos 5:19; Efesios 1:7). Jehová Dios Wawanta mana kachamunmanchu karqa chayqa, mana atisunmanchu karqa paraisopi wiñaypaj kausakuyta (Apocalipsis 21:3-5).

Jesús wañusqanrayku tukuy imata tariyta atinchej, wiñay kausaytapis. Chayrayku Wawanta Jehová kachamusqanqa sumaj regalopuni. Chayta aswan sutʼita yachanapajqa, ñaupaj yachaqanapi sumaj regalota regalanapaj imaschus yanapawasqanchejwan kikincharina.

Imatachus munasqanchejta qowanchej. Jehová Diosqa wiñaypaj kausakuyta munananchejpaj jina ruwawarqanchej (Eclesiastés 3:11). Wawanta kachamusqanraykullataj wiñaypaj kausakuyta atinchej. Biblia nin: “Juchaj pagonqa wañuymin. Diospa regalonrí wiñay kausay, Señorninchej Cristo Jesusnejta”, nispa (Romanos 6:23).

Imatachus necesitasqanchejta qowanchej. Ni pi runapis juchamanta, wañuymantawan kacharichiyta  atiwanchejchu. Biblia nin: “Mana jaykʼajpis qolqe wakinmanchu runaj kawsayninta rantinapajqa”, nispa (Salmo 49:8, 9). Jehová Dioslla Juchamanta, wañuymantawan kacharichiyta atiwarqanchej. Chayraykutaj ‘Jesusnejta preciowan kacharichiwarqanchej’ (Romanos 3:23, 24).

Maychus tiemponpi. Biblia nin: “Cristorí juchasapasllaraj kashajtinchej noqanchejrayku wañorqa”, nispa (Romanos 5:8). Jehová Diosqa juchasapas kashajtinchej Wawanta kachamorqa. Ajinamanta pantaj runas kajtinchejpis mayta munakuwasqanchejta rikuchiwanchej. Juchasapas kasqanchejrayku tukuy imata aguantana kajtinpis, suyakushanchej imaschus paraisopi kananta.

Imaraykuchus Jehová wawanta kachamusqan. ¿Imaraykutaj Dios Wawanta kachamorqa? Biblia nin: “Kay jinamanta Diosqa munakuyninta rikuchiwarqanchej: Diosqa kʼata Wawanta kay mundoman kachamorqa paynejta kausayta japʼinanchejpaj. [...] Payqa chayta ruwarqa munakuwasqanchejrayku, manataj payta munakusqanchejraykuchu”, nispa (1 Juan 4:9, 10).

¿Imatá qan ruwawaj Jehová Wawanta kachamusqanmanta agradecekunaykipaj? Imatachus Juan 3:16 versiculopi Jesús nisqanta yuyarikuy. Chaypi nin “paypi creejqa” mana wañunanta. Biblia nin jina “creeyniyoj kajqa mana iskayrayanchu imatachus suyakushan chay juntʼakunanmantaqa” (Hebreos 11:1). Mana iskayrayanaykipajqa Diosninchejmanta astawan yachakunayki tiyan. Chayrayku Diosmanta astawan yachakunaykipaj tiempocharikuwaj, imaraykuchus payqa “tukuy ima allin kaj” regalota qowanchej. Chantapis wiñaypaj kausakunaykipaj kallpacharikuwaj, imaraykuchus Jesús kausayninta qosqanrayku wiñaypaj kausakuyta atinchej.

Diosmanta astawan yachakunaykipajqa Internetpi www.pr2711.com. nisqapi kaj yanapasta estudiay. Jehovaj testigosnenqa yanapasuyta munayku. Yachakuytaj Jehová Dios Wawanta noqanchejrayku kachamusqanmanta, chay imaynatachus yanapawasqanchejmanta yachakojtiykitaj, kayta ninki: “Diosman graciasta qoni. Imaraykuchus paymin kacharichiwan Señorninchej Jesucristonejta”, nispa (Romanos 7:25).