Kenia suyupeqa iskay precursoresta uj wasiman pasaykucherqanku. Chaypitaj camapi uj watʼa runita kashasqa. Payta rikuspataj tʼukulla qhepakorqanku, imajtinchus wasan, makisninpis juchʼuysitulla kasqa. Paytaj mayta kusirikorqa “cojosqa tarukas jina phinkiykachanqanku” nispa willarejtinku (Isa. 35:6).

Payqa Onesmus sutikun, kunantaj 40 watanmanña rishan. Payqa tullusninmanta onqosqa nacekusqa, tullusnintaj pʼakirakunanpaj jinalla. Onesmusqa onqoyninpaj mana jampi, nitaj tratamiento kasqanrayku, ruedasniyoj sillapi kaspa wañupunankama ñakʼarinanta yuyarqa.

Onesmusqa Bibliamanta yachakuyta qallarerqa. Mamantajrí tantakuykunaman rinantaqa mana munarqachu, imanarpakojtin astawan nanananta manchachikusqanrayku. Chayrayku hermanosqa tantakuykunata grabapoj kanku, Onesmustaj wasinpi chayta uyarej. Jinapis phishqa killataña Bibliamanta yachakushajtin, ima kajtinpis tantakuykunaman riyta munasqantapuni nerqa.

¿Astawanchu nanaynin yapakorqa tantakuykunaman riyta qallarejtin? Mana. Pay nin: “Tantakuykunapi kajteyqa nanayniy pisiyaspa jinaj”, nispa. Payqa qhepaman sumaj kausay kananta yachakusqan yanapashasqanta yuyarqa. Mamanpis wawanta kusisqata rikuspa, Bibliamanta yachakuyta qallarerqa. Pay nej: “Wawaypajqa Diosta sirviy jampin jina”, nispa.

Onesmusqa pisi tiemponman willayta qallarerqa. Aswan qhepamantaj bautizakorqa, kunanqa siervo ministerial jina llankʼashan. Payqa mana puriyta, nitaj makisninwan imata ruwayta atejtinpis, Jehovapaj tukuy atisqanta llankʼayta munarqa. Chay jawa, precursor auxiliar kayta munarqa, jinapis wajpa tanqaykachanan kananta yuyasqanrayku solicitudta juntʼachiyta manchachikorqa. Chaywanpis hermanosqa chayta ruwayta munasqanta yachaspa yanapanankuta nerqanku. Chayrayku Onesmusqa precursor auxiliar kayta aterqa.

Chaymantataj precursor regular kayta munarqa, chaywanpis ñaupajta jina manchachikullarqataj. Jinapis uj pʼunchayqa sapa pʼunchay ukhunchana folletopi leesqan mayta kallpacharqa. Chaytaj Salmo 34:8 versiculomanta karqa, chaypi nin. “Qhawaychej, yachaychejtaj Tata Diosqa kʼacha kasqanta”, nispa. Chaypi tʼukuriytawanqa precursor regular kananta nerqa. Kunantaj, sapa semana tawa pʼunchayta willan, ashkha runasmantaj Bibliamanta yachachishan, pikunachus sumajta ñauparishanku. Kay 2010 watapeqa Precursorespaj Escuelaman rerqa. Chaypeqa ñaupaj kutipi wasinman willaj rerqanku chay hermanosmanta ujnin yachachejnin karqa, chayraykutaj Onesmusqa mayta kusikorqa.

Onesmuspa tatasnenqa wañupunkuña, kunanqa qotuchakuymanta hermanos sapa pʼunchay tukuy imapi yanaparinku. Payqa mayta agradecekun Jehová bendecisqanmanta, maytataj suyakushan Bibliaj nisqan juntʼakunanta: “Mana pipis nenqachu: Onqosqa kani, nispaqa” (Isa. 33:24).