1, 2. 1) ¿Imaraykutaj ‘mana saykʼuspa Diosmanta mañakunanchej’ tiyan? 2) ¿Imastataj tapukunanchej kanman?

UJ RUNA, pichus tutaspi llankʼaj, nerqa: “Niraj sutʼiyamushajtenqa puñuywan atipachikunapaj jinapuni”, nispa. Wajkunapis kikillantatajchá ninkuman. Kay tiempo cristianospis chay jinallapitaj rikukushasqanchejta nisunman. Imajtinchus, Satanaspa sajra pachanqa chay horaspipis kashanman jina kashan, tukukapunanpajña. Noqanchejtaj mana puñurpanapaj mayta kallpachakunanchej tiyan (Rom. 13:12). Chayrayku, Diosta yupaychayninchejpi mana puñurpanapajqa “maychus kajta ruwaspa” kausakuna, “mana saykʼuspataj Diosmanta” mañakuna (1 Ped. 4:7, QB).

² Satanaspa sajra pachan tumpamantawan tukukunanta yachaspa, kaykunata tapukunanchej kanman: “¿Sumajtachu tʼukurini imatapis mañakunaypaj? ¿Tukuy laya mañakuytachu ruwani? ¿Mañakunipunichu? ¿Wajkunapaj mañapunichu chayri munasqayman jina noqallapajchu mañakuni? ¿Reparanichu salvasqa kanaypaj mañakunaypuni kasqanta?”, nispa.

3. ¿Ima laya mañakuykunataj tiyan?

³ Apóstol Pabloqa Efesopi cristianosman qhelqashaspa, “tukuy laya” mañakuyta ruwanamanta parlarqa (Efe. 6:18). Jehovamantaqa imastachus necesitasqanchejta mañakunchejpuni, jinallataj chʼampaykunata atipanapaj yanapanawanchejtapis. Bibliataj Jehovamanta nin: “Qan uyarinki mañakususqankuta”, nispa. Arí, Payqa munakuwasqanchejrayku uyariwanchejpuni (Sal. 65:2). Chaywanpis, mana chay laya mañakuykunallatachu ruwananchej tiyan. Manaqa Diosta jatunchanapaj, jinallataj graciasta qonapajpis mañakunallanchejtaj tiyan, wakin kutitaj sinchʼita mañakunanchej tiyan.

4. ¿Imaraykutaj mañakushaspa Jehovata kʼiskimanta jatunchana?

 ⁴ Jehovamanta mañakushaspaqa payta jatunchananchej tiyan. Sutʼincharinapaj, “atiywan” ruwasqasninpi tʼukurispa Payta jatunchayta munanchej, jinallataj “jatun kaynin mana tukukuyniyoj” kasqanpi tʼukurispapis (Salmo 150:1-6 leey). Salmo 150 capitulopeqa 13 kutista Jehovata jatunchanata nin. Waj salmota qhelqajtaj Jehovaman tukuy sonqo takispa nerqa: “Sapa pʼunchay qanchis kutista qanta jatunchayki, kamachisqasniyki cheqan kasqanrayku”, nispa (Sal. 119:164). Arí, Jehovaqa jatunchasqapuni kanan tiyan. Chayrayku, mañakushaspaqa “sapa pʼunchay qanchis kutista”, nisunman kʼiskimanta Payta jatunchana.

5. ¿Imaynatataj agradecekunapaj mañakusqanchej jarkʼawanchej?

⁵ Jehovata agradecekunapajpis mañakunallanchejtaj tiyan. Pabloqa Filipos llajtamanta cristianosman nerqa: “Ama imamantapis phutikuychejchu, astawanqa Diosmanta mañakuspaqa, imatachus munasqaykichejta mañakuychej, tukuy imamanta graciasta qospallapuni”, nispa (Fili. 4:6). Mañakushaspa tukuy sonqo agradecekusqanchejqa jarkʼawanchej. Imajtinchus, qhepa pʼunchaykunapi kashasqanchejrayku “mana graciasta qoyta yachajkuna” chaupipi kausashanchej (2 Tim. 3:1-4). Mana allinta qhawarikojtinchejtaj, noqanchejpis chay jina runasllamantaj tukusunman. Chantapis, mañakushaspa Jehovata agradecekoyqa sonqo juntʼasqa kanapaj yanapawanchej, nitaj kausayninku mana allin kasqanmanta “wasa rimakus, thutojkunataj” kanku, chay runas jinachu kanapaj (Jud. 16). Qosasqa warminkuta, wawasninkuta ima graciasta qoyta yachanankupaj yanapankuman. ¿Imaynamantá? Mañakuyninkupi Diosta agradecekuspa.

6, 7. ¿Imataj niyta munan sinchʼita mañakuy, imatataj Jehovamanta sinchʼita mañakusunman?

⁶ Sinchʼita mañakoyqa sonqo nanaywan, waqaywan ima mañakuy niyta munan. ¿Maykʼajtaj ajinata Jehovamanta mañakusunman? Qhatiykachasqa kashaspa chayri sinchʼi onqosqa kashaspa. Ajinapi rikukuspaqa sinchʼitapuni Jehovamanta mañakunchej. Chaywanpis, ¿chaykunallapichu ajinata mañakusunman?

⁷ Chayta yachanapajqa Jesús mañakuyta yachachishaspa Diospa sutinmanta, Reinonmanta, munayninmantapis imatachus nisqanta qhawarina (Mateo 6:9, 10 leey). Kay pachapeqa sajra ruwaykuna juntʼa kashan, kamachejkunataj mana runasman necesitasqankuta qoyta atinkuchu. Chaynejta, Tatanchej Jehovamanta sinchʼita mañakunanchej tiyan sutin jatunchasqa kananta, Reinontaj Satanaspa makinmanta Jallpʼata kacharichinanta. Chantapis, sinchʼita mañakunallanchejtaj tiyan Diospa munaynin Jallpʼapi ruwasqa kananta, imaynatachus janaj pachapi ruwakushan ajinata. Rikunchej jina, tukuy laya mañakuyta mana saykʼuspa ruwananchej tiyan.

8, 9. ¿Imaraykutaj mana nisunmanchu Pedro, paywan kaj apóstoles ima mayta pantasqankuta?

⁸ Apóstol Pedroqa ‘mana saykʼuspa Diosmanta mañakuychej’ nispa yuyaychajtinpis, aswan ñaupajta mana chayta ruwarqachu. Chaytaj karqa Jesús Getsemaní huertapi Diosmanta mañakushajtin. Chaypeqa Pedrowan, waj apostoleswan puñurparerqanku. Jesusqa niraj mañakoj rishaspa paykunaman nerqa: “Ama puñuychejchu, rijchʼarisqa kaychej; jinataj Diosmanta mañakuychej[puni]”, nispa. Chaywanpis paykunaqa puñuywan atipachikorqanku (Mateo 26:40-45 leey).

⁹ ¿Paykuna mayta pantasqankutachu nisunman? Kaypi tʼukurina. Chay pʼunchaypeqa mayta saykʼorqanku. Imajtinchus Pascua fiestapaj wakicherqanku chantá Pascuata ruwarqanku. Chaymantataj, Jesusqa Señorpa Cenan nisqata paykunawan ruwarqa,  mayqentachus wañuyninta yuyarinankupaj ruwanallankupuni karqa (1 Cor. 11:23-25). Chantá “uj salmota takiytawan, tukuyninku Olivos Orqoman rerqanku”, chayman chayanankupajtaj Jerusalenpa kʼullku callesninta rerqanku (Mat. 26:30, 36). Chaykamaqa chaupi tuta pasayñachá karqa. Noqanchej chay chʼisi Getsemaní huertapi kasunman karqa chayqa ichapis puñurpallasunmantaj karqa. Jesusqa chay saykʼusqa apostolesninta mana rimarqachu, astawanpis kʼachamanta nerqa: “Espiritoqa wakichisqa kashan kasunapaj, aycha cuerpotajrí pisi kallpayoj”, nispa.

10, 11. 1) ¿Imatataj Pedro puñuywan atipachikusqan chʼisipi yachakorqa? 2) ¿Imatataj Pedromanta yachakunki?

¹⁰ Pedroqa Getsemaní huertapi puñuywan atipachikusqan chʼisipi, mayta yachakorqa. Imajtinchus Jesusqa aswan ñaupajsituta kayta nerqa: “Kunan chʼisi noqata tukuyniykichej saqerpariwankichej”, nispa. Pedrotajrí kayta kuticherqa: “Tukuyninku saqesojtinkupis, noqaqa manapuni jaykʼajpis qanta saqerparisqaykichu”, nispa. Chantá Jesusqa Pedro kinsa kutita mana rejsisqanta ninanta nerqa, Pedrotaj nillarqapuni: “Qanwan wañunay kashajtimpis, manapuni nisajchu: Paytaqa mana rejsinichu”, nispa (Mat. 26:31-35). Chaywanpis Pedroqa Jesús nisqanman jinapuni ruwarqa. Mayta pantasqanta reparakuspataj “sonqo nanayta waqarikorqa” (Luc. 22:60-62).

¹¹ ¿Imatá Pedro chay pantasqanmanta yachakorqa? Mana payllapichu atienekunan kasqanta. Chaypajtaj maytachá Diosmanta mañakorqa. Chayrayku aswan qhepaman, “mana saykʼuspataj Diosmanta mañakuychej” nispa yuyaycharqa. Noqanchejrí, ¿chay yuyaychasqanman jinachu ruwashanchej? ¿Diosmanta mañakunchejpunichu ajinamanta Paypi atienekusqanchejta rikuchinapaj? (Sal. 78:7.) Chantapis, Pabloj yuyaychasqanta yuyarikuna. Pay nerqa: “Pichus sinchʼi sayasqanta yuyakojqa allinta qhawakuchun ama urmanampaj”, nispa (1 Cor. 10:12).

12. ¿Imaraykutaj Nehemiasmanta mayta yachakusunman?

¹² Kunanqa Nehemiasmanta parlarina. Payqa Jesús niraj jamushajtin 450 wata chaynejpi, rey Artajerjespa kamachina wasinpi vinota jaywaspa llankʼarqa. Nehemías uj kuti Diosmanta tukuy sonqo mañakusqanmanta, mayta yachakusunman. Chayqa karqa Jerusalenpi judíos llakiypi rikukushajtinku. Chay kuti pay nerqa: “Uj mashkha pʼunchaytachari sinchʼi llakisqa karqani, ayunota ruwaspataj mañakorqani janaj pacha Diosmanta”, nispa (Neh. 1:4). Rey Artajerjestaj,  imaraykuchus llakisqa uya kashasqanta taporqa. Imatachus payrayku ruwapunanta nejtintaj, Nehemiasqa chay ratopacha “janaj pachapi kaj Diosmanta” mañarikorqa. Jehovataj mañakusqanta uyarerqa, ajinamanta llajtanqa yanapasqa karqa (Neh. 2:2-6). Chay kutipi, Nehemiaspa creeynin astawanchá sinchʼiyarqa.

13, 14. ¿Imatataj ruwananchej tiyan Satanás creeyninchejta mana llauchʼiyachinanpaj?

¹³ Nehemías jina Diosmanta mañakusunpuni chayqa creeyninchej sinchʼillapuni kanqa. Satanasqa mana khuyakuyniyoj kasqanrayku, llauchʼiyasqa kashajtinchejpuni urmachiyta munawanchej. Sutʼincharinapaj, onqosqa chayri sinchʼi llakisqa tarikojtinchejqa sapa killa willasqanchej, Diospaj ancha pisi kasqanta yuyasunman. Chaytajrí ñaupajta mana allin imasta ruwasqanchejrayku chayri ñakʼarisqanchejrayku mana allin yuyaykuna jamuwasunman. Satanastaj ajinapi rikukojtinchej mana valesqanchejta yuyachiyta munawanchej, ajinamanta creeyninchejta llauchʼiyachinanpaj. Chaywanpis ‘mana saykʼuspa Diosmanta mañakusun’ chayqa creeyninchej sinchʼillapuni kanqa. “Imaraykuchus chay creesqa[n]chejqa uj jarkʼakuna escudo jina, Kuraj Supaypa tukuynin larwashaj flechasninta thasnonqa” (Efe. 6:16).

¹⁴ ‘Mana saykʼuspa Diosmanta mañakusun’ chayqa urmachinawanchejpaj jina imapis kajtin, mana urmallasunchu. Chayrayku urmanapaj jina kashajtinchejqa Nehemías jina, chay ratopacha Diosmanta mañakuna. Ajinallamanta imapi rikukuspapis sinchʼita sayayta atisun.

15. ¿Imastataj tapurikunanchej tiyan wajkunapaj mañapuymanta?

¹⁵ Jesusqa Diosmanta Pedropaj mañaporqa  creeynin mana pisiyananpaj (Luc. 22:32). Epafraspis Jesús jinallataj, Colosaspi hermanosninpaj Diosmanta mañaporqa. Chayrayku Pabloqa paykunaman nerqa: “Payqa mañapusunkichejpuni Diosmanta, sinchʼita sayanaykichejpaj sumaj wiñasqas, Diospa munayninta juntʼaspa”, nispa (Col. 4:12). Sapa ujninchej kayta tapurikuna kanman: “¿Tukuy sonqochu Jallpʼantinpi hermanospaj mañapuni? ¿Diosmanta mañapunipunichu jallpʼa ikhakuykuna chayri waj ñakʼariykuna kasqanrayku llakiypi rikhurej hermanospaj? ¿Maykʼajtaj tukuy sonqo mañaporqani Diospa llajtanpi jatun ruwaykunata japʼejkunapaj? ¿Diosmanta mañapushanipunichu qotuchakuymanta llakiypi tarikoj hermanospaj?”, nispa.

16. ¿Hermanospaj mañapusqanchej paykunata yanapanmanchu?

¹⁶ Hermanospaj Jehovamanta mañapusqanchejqa paykunata yanapanman (2 Corintios 1:11 leey). Jehovaqa, mana ashkha kamachisnin paymanta kutin kutita mañakusqankuraykullachu mañakuyninkuman kutichin. Chaywanpis Jehovaqa kamachisnin hermanosninkumanta llakikusqankuta rikuspa, maychus tiemponpi mañakuyninkuman kutichinman. Chayrayku, Diosmanta mana saykʼuspa wajkunapaj mañapunanchejpuni tiyan. Arí, Epafras jina rikuchina hermanosninchejmanta llakikusqanchejta, paykunatataj munakusqanchejta. Ajinamanta aswan kusisqa kasunchej, imajtinchus “aswan kusiy wajman qoriy qorichikunamanta nisqaqa” (Hech. 20:35).

17, 18. ¿Imaynatataj ‘mana saykʼuspa Diosmanta mañakuy’ yanapawanchej?

¹⁷ Pablo nerqa: “Tutaqa tukukapushanña, pʼunchaytaj qayllamushan”, nispa. Niraj chayta nishaspataj kayta nerqa: “Tiempota allinta reparaspa. Yachanchej puñuymanta rijchʼarina horaña kasqanta, imaraykuchus salvacionninchejqa aswan qayllapi kashan, creesqanchej, chay pʼunchaymantaqa”, nispa (Rom. 13:11, 12). Dios mosoj pachata apamunanta nisqanqa, jinallataj salvacionninchejpis, ichá yuyasqanchejmantapis aswan qayllitapiña kashan. Chaynejta, Diosta yupaychayninchejpi ama puñurpanachu, nitaj saqenachu kay pachaj imasnin Jehovamanta sapallanchejpi mañakunapaj tiempota qhechunawanchejta. Astawanpis ‘mana saykʼuspa mañakunapuni’. Chaytaj yanapawasun Jehovaj pʼunchayninta suyaspa “astawanraj juchamanta tʼaqasqa, cheqan kajman jina” kausananchejpaj (2 Ped. 3:11, 12). Chayta ruwaspataj, rijchʼarisqa kashasqanchejta rikuchisun, jinallataj kay sajra pachaj tukukuynin kaysitupiña kasqanpi creesqanchejtapis. Chay jawa, “mana saykʼuspa, Diosmanta” mañakunallapuni (1 Tes. 5:17). Chantapis, Jesús jina tiempochakuna Jehovamanta sapallanchejpi mañakunapaj, nitaj usqhay usqhayllatachu mañakuna. Ajinamanta Jehovaman astawan qayllaykusunchej (Sant. 4:7, 8). Chayta ruwayta atisqanchejtaj, ¡may sumaj!

¹⁸ Biblia nin: “Jesusqa kay pachallapiraj kawsashaspa, qhapariywan, waqaywan mañakorqapuni Diosmanta, pichus atiyniyoj karqa wañuymanta salvanampaj, chaymanta. Jinataj tukuy sonqo kʼumuykukusqanrayku Diosqa mañakusqanta uyarerqa”, nispa (Heb. 5:7). Arí, Jesusqa qhapariywan, waqaywan ima Tatanmanta sinchʼita mañakorqa, chaytaj yanaparqa Jallpʼapi wañupunankama cheqa sonqo kananpaj. Jehovataj wañuymanta kausarichimorqa, mana jaykʼaj wañuspa janaj pachapi kausakunanpaj. Noqanchejpis ‘mana saykʼuspa Diosmanta mañakusun’ chayqa imapi rikukuspapis chayri juchaman tanqasqa kaspapis, Tatanchej Jehovaman cheqa sonqollapuni kayta atisunchej. Ajinamantataj, wiñay kausayta tʼinkata jina japʼisun.