Josué 6:10-15, 20 versiculosqa israelita soldados sapa pʼunchay Jericó llajtata uj kutita muyurisqankuta, sojta pʼunchayta kikillantapuni ruwasqankuta ima nin. Qanchis kaj pʼunchaypitaj qanchis kutita chay llajtata muyurisqankuta, Jehová Jericó llajtaj perqasninta loqherajtinkamataj, chay llajtata japʼikapusqankuta nillantaj. ¿Imastaj rikuchin ajina kasqantapuni?

Ñaupa tiempopi uj llajtata japʼikapunankupaj soldadosqa chay llajtata muyuykoj kanku, ni pi ayqenanpaj. Ashkha pʼunchaykunata soldados llajtata muyuykojtinkutaj llajtapi kaj mikhoyqa tukukuyta atinman karqa. Llajtata japʼikapuspataj tukuy ima munasqankuta chay llajtamanta apakapoj kanku, mikhunata ima. Palestinatapis ajinallatataj japʼikaporqanku, chayrayku yachayniyoj runas Palestina laqayaspi (raqay) pisi mikhunata chayri ni imata tarerqankuchu. Jericó laqayaspitaj ashkha mikhunata tarerqanku. Chaymanta parlaspa uj revista nisqanman jina yachayniyoj runasqa Jericó laqayaspi ashkha wichʼista mikhunamanta juntʼata tarisqanku. Chay revistaqa sutʼinchan mana sapa kutichu uj llajtata japʼikapojtinku, ajina ashkha mikhunata tarisqankuta.

Bibliaqa israelita soldados Jericomanta mikhunata mana apakapusqankuta nin, Jehová mana apakapunankuta nisqanrayku (Jos. 6:17, 18). Chantapis nillantaj Jericó llajtata cosecha tiempo pasayta (marzo chayri abril killapi) japʼikapusqankuta, mikhuna ashkha kashajtin (Jos. 3:15-17; 5:10). Jericó laqayaspi ashkha mikhunata tarisqankoqa, Biblia nisqanman jina israelitas chay llajtata pisi tiempollapi japʼikapusqankuta rikuchin.