Estelaqa, * wawasninwan khuska iglesianman rillajpuni. Uj pʼunchayqa, pastorninman Bibliata entiendeyta munasqanta nisqa. Paytaj ni jaykʼaj yanapasqachu. Chayrayku manaña iglesianman risqachu. Pay nin: “Pastoresqa uj cartata apachimuwarqanku, niwarqankutaj mana rispaqa qolqellatapis apachinayta. Paykunaqa qolqellayta munarqanku”, nispa.

Angelinataj, pichus wawamantapacha iglesiaman rej, nin: “Iglesiaypeqa kinsa kutitapuni qolqe canastillata cultopi pasachej kanku. Sapa pasachejtinkutaj qolqeta churanapuni kaj. Qolqellata mañaj kanku. Chayrayku, ‘kaykunaqa mana Diospa espiritunwanchu kashanku’, nispa yuyarqani”.

Rejsisqayki religionespi tʼukuriy. ¿Qolqellatachu runasmanta orqhonku? Chay ruwasqanku, ¿Bibliaj nisqanman jinachu?

Jesús, cristiano religionta sayarichej, nerqa: “Mana pagaspalla japʼerqankichej, amallataj pagachikuychejchu” (Mateo 10:8). Bibliaj yachachiynenqa tukuypaj, manataj vendenapajchu.

Ñaupa cristianos, ¿ima qolqewantaj imatapis ruwaj kanku?

“Sapa uj chura[j] sonqompi yuyasqanman jina, mana llakikuspa, nitaj kamachisqa jinachu, imaraykuchus Diosqa munakun pichus kusiywan qojta” (2 Corintios 9:7). Apóstol Pablopis nerqa: “Tuta pʼunchay trabajarqayku kawsanaykupaj, imaraykuchus mana mayqenniykichejpajpis pisichikusqaykuwan llasa qʼepi jina kayta munarqaykuchu, Diospa evangelionta qankunaman willashanaykukama”, nispa (1 Tesalonicenses 2:9). Arí payqa, gastosninpaj toldosta ruwaj (Hechos 18:2, 3).

Jehovaj testigosnenqa, maychus kajman jina ruwasqa wasispi tantakunku, sutichankutaj Tantakuna Wasis. ¿Maymantá chay wasej gastosninpaj orqhonku? Paykunaqa, ni jaykʼajpis qolqe churana canastasta tantakuyninkupi pasachinkuchu, nitaj qolqeta mañaspa cartasta apachinkuchu. Chaypi yachachikusqanmanta agradecesqa kajkunaqa, chʼinllamanta qolqe churana cajitasman churakunku.

Kay revista ruwakunanpaj, tukuynejman chayananpaj ima, qolqeqa necesitakunpuni. Chaywanpis ni jaykʼaj qolqeta mañaj propagandasta kay revistapi rikunkichu. Imaraykuchus Bibliaj yachachiyninta runasman rejsichinapaj orqhokun.

¿Ima ninkitaj? ¿Jesús nisqanta kasukushaykuchu? ¿Ñaupa cristianos jinachu ruwashayku?