Gobiernopi llankʼajkuna llajtamanta llojsisqankurayku, runaspis sajrallatataj ruwasqankurayku, gobiernosqa manapuni cheqan kajta ruwayta atinkumanchu. Chayrayku cheqan kajta ruwaj gobiernoqa waj ladomanta kanan tiyan. Bibliataj chay jina gobiernomanta parlan. Jesustaj yachachisqasninman chayta mañakunankuta kamacherqa. Chayqa Diospa Reinon (Mateo 6:9, 10).

Diospa Reinonqa kanpuni janaj pachamantapachataj kamachimonqa, tumpamantawantaj tukuy gobiernospa cuentanmanta yaykonqa (Salmo 2:8, 9; Apocalipsis 16:14; 19:19-21). Sajra ruwaytataj chinkachenqa. Kunanqa yachakusun imaraykuchus gobiernos sajra ruwayta mana chinkachiyta atisqankuta, chantapis imaraykuchus Diospa Reinonpi atienekunanchejta.

CHʼAMPAY: Gobiernosqa runaspa impuestosninwan astawan kausanku. Chaypi llankʼajkunaqa, may chhika qolqeta apaykachasqankurayku suwayta munanku. Wakintaj impuestota pisillata pagayta munajkunawan llukʼichikunku. Qolqe pisiyajtintaj gobiernosqa impuestota wicharichinku, chaytaj aswan sajra ruwayllata rikhurichin. Chayqa nipuni tukukunchu, allinta ruwaj runataj chaymanta paganan tiyan.

PITAJ ALLINCHANQA: Diospa Reinonqa tukuy atiyta Jehová Diosmanta japʼin (Apocalipsis 11: 15). * Diospa Reinonqa kamachinanpaj mana impuestosta mañanchu. Astawanpis kamachiyninpi kajkunata, khuyakuyninwan, kallpanwan, atiyninwantaj tukuy necesitasqankuta qon (Isaías 40:26; Salmo 145:16).

CHʼAMPAY: Susan Rose-Ackerman pimantachus ñaupaj yachaqanapi parlarerqanchejña nin, sajra ruwayta chinkachinapajqa, “patamanta qallarina” kasqanta. Runasqa manaña gobiernopi atienekunkuchu paypaj llankʼajkunata sajrata ruwajta saqellasqanrayku, policiapi, aduanaspi ima cheqan kajta ruwakunanta kamachispapis. Allin kamachej kaspapis pantanpuni, imaraykuchus Bibliapi nisqanman jina “kay pachapeqa mana uj runallapis cheqan runaqa kanchu” (Eclesiastés 7:20).

PITAJ ALLINCHANQA: Diosqa Jesucristota ajllarqa Reinonpi kamachinanpaj, paytaj runasmanta nisqaqa cheqan kajta ruwanqa. Jesusqa chayta rikucherqaña Satanás qoyta munasqanta qhesachaspa. Satanasqa, pichus kay pachata kamachishan yupaychachikuyta munaspa “tukuy kay pachantimpi kaj llajtasta, qhapaj kapuyninkutawan” Jesusman qoyta munarqa. Chaywanpis Jesusqa mana iskaychakuspa qhesacharqa (Mateo 4:8-10; Juan 14:30). Chantapis Jesusqa ñakʼarishaspapis cheqan kajllatapuni ruwayta munarqa. Chayrayku jaywasqanku ujyanata mana ujyarqachu, ichá nanayninta pisiyachinman karqa jinapis yuyayninta chinkachinman karqa (Mateo 27:34). Jesusqa janaj pachapi kamachishanña Dioswan khuska, payllataj Diospa Reinonpi kamachiyta atinanpaj jina wakichisqa kashan (Filipenses 2:8-11).

CHʼAMPAY: Ashkha suyuspi sapa kuti elecciones tiyan, chaytaj runas yuyasqankuman jina mana cheqan kajta ruwajkunata wijchʼukunanpaj nin. Jinapis políticos campañankuta ruwasqanku, eleccionespis sajra ruwaywan juntʼa kashan, jatuchaj suyuspipis. Sutʼincharinapaj, qhapajkunaqa gobiernopaj llankʼajkunata llukʼiykunku campañasninkupaj.

Tribunal Supremo de Estados Unidos nisqamanta juez John Paul Stevens, qhelqarqa qhapajkuna chayta ruwasqankoqa chinkachiyta atisqanta, “mana gobierno cheqanta ruwanallantachu nitaj imaynachus kasqallantachu, astawanqa runas gobiernopi atienekunankuta”. Chayrayku runasqa yuyanku políticos sajra kajllata ruwasqankuta.

PITAJ ALLINCHANQA: Diospa Reinon wiñaypaj kasqanrayku manaña campañas kanqachu nitaj sajra ruwaykunapis (Daniel 7:13, 14). Chantapis chay Reinopi kamachejtaqa mana eleccionesta  ruwaspachu ajllakun, astawanqa Dios ajllarqa. Chayrayku mana chinkachikunmanchu. Allin sayachisqa kasqanraykutaj kamachiypi kajkunata yanapallanqapuni.

CHʼAMPAY: Ichá yuyasunman sajra ruwayta chinkachinapajqa leyesta astawan yapakunanta. Chaywanpis yachayniyoj runas nisqankuman jinaqa, ashkha kutispi leyes yapakusqanman jina, sajra ruwaypis yapakullantaj. Chantapis leyesta juntʼayqa mana atikullanchu, qhasillapajtaj.

PITAJ ALLINCHANQA: Diospa Reinonpa leyesnenqa mana runaspa leyesnin jinachu. Sutʼincharinapaj, imastachus ruwakunanmanta, imastatajchus mana ruwakunanmanta uj listata jina orqhokunanmantaqa, Jesusqa kayllata nerqa: “Imatachus munankichej runas qankunapaj ruwanankuta, ajinallatataj qankunapis paykunapaj ruwapuychej” (Mateo 7:12). Chantapis Reinoj leyesnenqa mana kamachillanchu astawanqa juntʼachin. Jesús nerqa: “Runa masiykita munakunki qan kikiykita jina” (Mateo 22:39). Diosqa imachus runaj sonqonpi kasqanta yachan, chayrayku leyesninta juntʼachiyta atin (1 Samuel 16:7).

CHʼAMPAY: Sajra ruwayqa tukuy imasta munapayaymanta, munaynillanchejta maskʼaymantataj qallarin, chaytataj gobiernopi llankʼajkuna, waj runas ima ruwasqankupi rikukun. Qallariypi parlarqanchej chay edificio urmaykusqanqa, ruwajkuna autoridadesman llukʼiykusqankurayku karqa. Ruwajkunaqa yacharqanku llukʼiykuspaqa pisi qolqellata gastanankuta, nitaj leyman jinachu ruwanankuta.

Chayrayku sajra ruway chinkananpajqa runata yachachikunan tiyan kaykunata atipanankupaj: tukuy imata munapayayta, munaynillankuta maskʼaytataj. Jinapis gobiernosqa mana chaykunata yachachikunanpaj wakichisqachu kanku, nitaj munankuchu.

 PITAJ ALLINCHANQA: Diospa Reinollan chinkachiyta atin, imaraykuchus runasta yachachin imaynachus kanankuta. * Chantapis mosojman ‘tukuchin sonqonkoj yuyayninpi’ (Efesios 4:23). Chaytaj yanapan tukuy imata munapayayta, munaynillankuta maskʼayta atipanankupaj. Chantapis kapusqallankuwan sonqo juntʼasqa kausanankupaj, wajkunaj allinninkuta maskʼanankupajtaj (Filipenses 2:4; 1 Timoteo 6:6).

CHʼAMPAY: Mana sajra runaspa chaupinpi, allin yachachisqataj kaspapis, wakin runasqa wistʼutapuni ruwayta munanku. Yachayniyoj runas nisqankuman jinaqa chayrayku gobiernos sajra ruwayta mana chinkachiyta atinkuchu. Gobiernosqa sajra runas ruwasqankuta pisiyachiyllata atinkuman.

PITAJ ALLINCHANQA: Convención de las Naciones Unidas contra la Corrupción nisqanman jina, sajra ruwayta chinkachinapajqa gobiernos “runasta cheqanta ruwayman, llankʼayman ima tanqananku tiyan”. Chayta munasqanku allin kajtinpis, Diospa Reinonqa mana tanqallanchu manaqa jinatapuni ruwakunanta nin. Bibliaqa nin Diospa Reinonpi, tukuy imata munapayajkuna, llullaspis chinkanankuta (1 Corintios 6:9-11; Apocalipsis 21:8).

Tukuy yachakunkuman Diospa Reinonpa kamachiykunasninman jina kausakuyta, ñaupa tiempomanta cristianos jina. Sutʼincharinapaj, Jesuspa yachachisqan Simón sutiyoj apostolesman llukʼiykuyta munajtin, apostolesqa qhesacharqanku, nerqankutaj: “Chay juchaykimanta Diosman kutirikuy”. Simonqa repararqa imatachus munashasqan mana allinchu kasqanta, chayta atipananpajtaj Diosmanta mañapunankuta apostolesman nerqa (Hechos 8:18-24).

Ima llajtamanta kaspapis Diospa Reinon kamachishajtin kausakuyta atiwaj (Hechos 10:34, 35). Diospa Reinon Jallpʼantinpi yachachisqanqa chaypi kausakunaykipaj yachachisonqa. Jehovaj testigosnintaj, Bibliamanta yachachisonqanku. Sapa semana tiempochakunki chayqa “Diospa reinonmanta” astawan yachakunki. Chantapis imaynatachus sajra ruwayta chinkachinanmanta (Lucas 4:43). Maypichus tiyakunki chay qayllapi kaj Jehovaj testigosninwan parlariy, chayri Internetpi kay jw.org nisqaman yaykuwaj.