¿Diosta rejsiyta atisunmanchu?
“Diostaqa mana rejsiyta atisunmanchu.” (Ñaupa tiempo Filón yachayniyoj runa, Alejandría llajtamanta)
“Diosqa mana karupichu kashan sapa ujninchejmanta.” (Saulo de Tarsoj nisqan, Atenas llajtamanta yachayniyoj runasman)
¿MAYQENTAJ allin rijchʼasunki? Ashkha runasmanqa Sauloj nisqan allin rijchʼan, payqa aswan rejsisqa apóstol Pablo jina. Paypa nisqanqa runasta sonqochan, kallpachantaj (Hechos 17:26, 27). Bibliapi waj imasta nisqan kallpachallawanchejtaj. Sutʼincharinapaj, Jesusqa Diosmanta mañakushaspa nerqa yachachisqasnin Diosta rejsiyta atisqankuta, bendicionninta japʼiytataj (Juan 17:3).
Filón jina yachayniyoj runastaj waj jinata yuyarqanku. Nerqankutaj Diosqa mana rejsiy atina kasqanta. ¿Chay ajinachu?
Bibliaqa nin Diosmanta wakin imasta mana entiendeyta atisqanchejta. Arí, runasqa mana entiendeyta atisunmanchu maykʼajchus Dios rikhurisqanta, yuyayninta, yachayninta ima. Chaykunaqa mana yuyayninchejman yaykunanpaj jinallachu. Chayta Jehová Diosmanta mana yachayta atispapis rejsiyta atisunman. Chaykunapi tʼukurispaqa, Jehová Diosman qayllaykuyta atinchej (Santiago 4:8). Chaykunamanta wakinta ukhuncharina, chantá imastachus entiendeyta atisqanchejta qhawarisun.
¿Imastataj mana entiendeyta atisunmanchu?
WIÑAYPAJ KASQANTA. Bibliaqa yachachiwanchej Dios “wiñaymanta wiñaykama” kasqanta (Salmo 90:2). Payqa mana qallariyniyojchu, nitaj tukukuyniyojchu, wiñaypajtaj kausanqa. Chayrayku “noqanchejqa mana chayta entiendeyta atisunmanchu, nitaj watasnintapis yupayta atisunmanchu” (Job 36:26).
¿Imaraykú yachana tiyan? Diosqa niwanchej payta allinta rejsejtinchej wiñaypaj kausananchejta (Juan 17:3). Dios mana wiñaypajchu kausanman chayqa chay niwasqanchej qhasilla kanman. Chaytaqa “Wiñay Rey[lla]” juntʼanman (1 Timoteo 1:17).
YUYAYNIN. Bibliaqa yachachin Diospa “entiendeskanka mana taripay atina” kasqanta, noqanchejmantataj astawanraj yachasqanta (Isaías 40:28, Quechua de Cuzce [QC]; 55:9). Chayraykuchá Bibliapi kayta nin: “Pitaj Señorpa yuyayninta rejsin? Diosta yuyaychayta pitaj atinman?” (1 Corintios 2:16).
¿Imaraykú yachana tiyan? Ashkha runas ujllapi mañakojtinkupis, Diosqa uyariyta atin (Salmo 65:2). Ama manchachikunachu, Payqa tiempoyoj mañakusqanchejta uyarinanpaj. Diosqa uj pʼisqetu wañusqantapis yachan, Palabranpitaj niwanchej: “Qankunaqa pʼisqetusmanta nisqaqa aswan valorniyoj kankichej”, nispa (Mateo 10:29, 31).
IMAYNATACHUS RUWASQANTA. Bibliaqa yachachin “imatachus Dios qallariymantapacha ruwasqanta kunankama” mana yachayta atisqanchejta (Eclesiastés 3:11). Chayrayku Diosmantaqa ni jaykʼaj tukuy imata yachasunchu. Ima yachaywanchus ruwasqanqa “mana yachay atina” (Romanos 11:33). Chaywanpis Diospa munasqanman jina kausaspaqa yachayta atisun (Amós 3:7).
Dios maykʼajchus rikhurisqanta, yuyayninta, yachayninta ima entiendey mana yuyayninchejman yaykunanpaj jinallachu
¿Imaraykú yachana tiyan? Bibliata leespa, ukhunchaspataj Diosmanta waj imasta yachakullasunpuni. Chaytaj niyta munan wiñaypaj Paymanta yachakunanchejta.
¿Imastá paymanta yachayta atisunman?
Diosmanta mana tukuy imatachu yachayta atispapis, payta rejsiyta atisunman. Bibliapeqa ashkha imasta Diosmanta yachakunchej. Wakinta qhawarina.
SUTIN. Bibliaqa yachachin Diosllataj sutinta ajllakusqanta. Pay nerqa: “Ñoka Jehová cani, chayka sutiymin”. Chay suteqa Bibliapi 7.000 kutismanta astawan rikhurin, ni mayqen suti jina (Isaías 42:8, QC).
¿Imaraykú yachana tiyan? Jesusqa mañakuyta yachachishaspa nerqa: “Janaj pachapi kashaj Tatayku, sutiyki jatunchasqa kachun”, nispa (Mateo 6:9). Chayrayku Diosmanta mañakushaspaqa sutinta oqharina. Jehovaqa sutinta jatunpaj qhawajkunata salvanqa (Romanos 10:13).
MAYPICHUS TIYAKUSQANTA. Biblia nisqanman jina Jehovaqa angelesta ruwarqa janaj pachapi tiyakunankupaj, chantá ruwallarqataj kay Jallpʼata, cielopi estrellasta waj imastawan (Juan 8:23; 1 Corintios 15:44). Bibliaqa janaj pacha palabrata oqharin maypichus ángeles tiyakunku chaymanta parlananpaj, Diospis chayllapitaj tiyakun (1 Reyes 8:41-43).
¿Imaraykú yachana tiyan? Chayta yachaspaqa imaynachus Dios kasqanta entiendeyta atinchej. Payqa mana tukuynejpichu kashan. Astawanpis janaj pachapi kausakun. Chayrayku “tukuy ruwasqa kajqa Diospa qhawayninmanta mana pakasqa kayta atinchu” (Hebreos 4:13).
IMAYNACHUS KASQANTA. Bibliaqa yachachin Jehová kʼacha kasqanta. Nintaj “Diosqa munakuymin” mana jaykʼaj llullakoj, cheqan, khuyakuyniyoj, nitaj usqhayllata phiñakoj (1 Juan 4:8; Tito 1:2; Éxodo 34:6; Hechos 10:34, 35). Astawanpis Payta jatunpaj qhawajkunamanta “ni imata pakanchu” (Salmo 25:14).
¿Imaraykú yachana tiyan? Qanpis, Jehovaj amigon kayta atiwaj (Santiago 2:23). Imaynachus Jehová kasqanta astawan yachaspa, Bibliaj nisqanta astawan entiendenki.
“TARICHIKUSONQA”
Bibliaqa nin imaynapunichus Jehová Dios kasqanta. Diosqa amigonchej kayta munan. Palabran nin: “Payta maskʼanki chayqa, pay tarichikusonqa”, nispa (1 Crónicas 28:9). Bibliata leesun, tʼukurisuntaj chayqa Diosta rejsiyta atisun, paytaj noqanchejman qayllaykamuwasun (Santiago 4:8).
Bibliata leespa, ukhunchaspataj Diosmanta waj imasta yachakullasunpuni
Ichá yuyasunman mana tukuy imatachu Diosmanta yachaspa, mana amigosnin kayta atisqanchejta. Sutʼincharinapaj, uj doctorpa amigon kanapajqa mana doctorllatajchu kana tiyan. Sumaj amigonqa ichá waj imasta ruwan. Chantapis allinta rejsin, yachantaj imachus gustasqanta imatajchus mana gustasqanta. Dioswanpis jinallataj. Amigon kanapajqa imaynachus Jehová kasqanta yachakuna tiyan.
Bibliaqa imaynachus Jehová Dios kasqanta yachanapaj yanapawanchej. ¿Diospa amigon kayta munawajchu? Jehovaj testigosnin Bibliamanta yachachisunkuman. Paykunawan parlariwaj chayri Internetpi jw.org/qu nisqanman yaykuwaj.
Kaykunatapis qhawaykurillawajtaj
TORREMANTA QHAWAJ
¿Imaraykutaj ashkha runas uj Ruwaj kasqanpi yuyanku?
¿Dioschu ruwawarqanchej chayri animalesmantachu runaman tukorqanchej?
