Números 35:1-34
35 Jericó tsimpan Jordán mayu nawpanpa kaykaq Moab pampacho Israel runakuna kaykaptinmi Moisésta TAYTA DIOS kayno nirqan:
2 “Israel runakunata kayno niy: ‘Chaskinaykipaq kaq markakunacho *levitakunapis tänanpaq wakin markakunata rikatsipäkunki. Tsay rikatsishqayki markakunapa nawpancho kaykaq chakrankunapis uywankunata mitsikunanpaqmi kanqa.
3 Tsaynöpami levitakuna tänanpaq markankuna kanqa y uywankunata mitsikunanpaq chakrakunapis kanqa.
4 Uywata mitsikunan chakrakuna kanqa markapa murällanpita chusku pachak pitsqa chunka (450) metrumi.
5 Tsay chakrakuna chuskun nawpanpa iwalmi kanqa. Inti jeqamunan kaq lädupapis, inti jeqanan kaq lädupapis, norti kaq lädupapis, sur kaq lädupapis isqun pachak (900) metru largumi kanqa jukaq kuchunpita jukaq kuchunyaq. Tsaymi marka kanqa uywa mitsikuna chakrakuna chawpincho.
6 “ ‘Levitakunata aypushqayki markakunapitami soqta markakuna kanqa runakuna tsay markakunaman amparakunanpaq. Tsay soqta markakunamanmi mana yarpaypa runa mayinta wanutsiqkuna amparakunqa. Tsay markakunapita chusku chunka ishkay (42) markakuna masta levitakunata entregapäkunki.
7 Tsaymi levitakunata aypushqayki markakuna kanqa uywakunata mitsikunan chakrankunawan chusku chunka pusaq (48) markakuna.
8 Juk trïbu atska markayuq karqa mas atska markakunatami levitakunata kachapanqa. Walkala markayuq karqa walkalatami kachapanqa’ ”.*
Runakuna amparakunapaq markakunata akrananpaq tantiyatsishqan
Deuteronomio 19.1-13; Josué 20.1-9
9 Moisésta TAYTA DIOS kayno nirqan:
10 “Israel runakunata kayno niy: ‘Jordán mayuta tsimparir *Canaánman chayashpayki
11 markakunata akrapäkunki runakuna amparakunanpaq.* Tsay markakunamanmi mana yarpaypa runa mayinta wanutsiq runakuna qeshpir amparakunqa.
12 Tsaymanmi qeshpinqa wanuq runapa aylunkuna venganzata ashir mana wanutsinanpaq. Tsaynöpami wanutsiq runa salvakunqa marka mayinkuna juzgananyaq.
13 “ ‘Tsay amparakunan markakunaqa soqtami kanqa tsaykunaman qeshpikunanpaq.
14 Kimsa kaq markakuna kanqa Jordán mayu tsimpan inti jeqamunan kaq lädupa y kimsa kaqkunanami kanqa Canaán lädupa.
15 Tsaynöpami Israel runa karpis jäpa runa karpis mana yarpaypa runa mayinta wanutsiptin soqta markakuna kanqa mayqanmanpis amparakunanpaq.
16 “ ‘Pipis fiërru herramientawan runa mayinta wanutsiptinqa kikintapis wanutsipäkunki.
17 “ ‘Pipis rumiwan saqmaypa runa mayinta wanutsiptinqa kikintapis wanutsipäkunki.
18 “ ‘Pipis qeruwan wiruypa runa mayinta wanutsiptinqa kikintapis wanutsipäkunki.
19 Wanutsikuq runataqa wanuq runapa legïtimu aylun maychöpis tarishqancho wanutsinqa.
20 “ ‘Pipis runa mayinta chikishpan tanqaypa wanutsiptin o imawanpis saqmaypa wanutsiptinqa
21 o maqaykälar wanutsiptinqa kikintapis wanutsinki. Wanutsikuq runataqa wanuq runapa legïtimu aylunmi maychöpis tinkushqancho wanutsinqa.
22 “ ‘Itsanqa pitapis mana yarpaypa tanqar wanutsiptin, imawanpis mana yarpaypa chayaykatsir wanutsiptin
23 o mana rikaypa kuchpawan wanutsiptinqa
24 marka mayinkunami juntakaykur tantiyakärinqa wanutsikuq runa yarpaypa o mana yarpaypa wanutsishqantapis. Tsayno tantiyakärinanpaqqa kanan nishqäkunata ama qonqapäkutsuntsu. Tsaynöpami wanuq runapa aylunpis tantiyakunqa yarpaypa wanutsishqanta o mana yarpaypa wanutsishqanta.
25 “ ‘Mana yarpaypa wanutsishqanta tantiyarqa marka mayinkuna juzgashqan markapita kutitsipäkunqa amparakuna markaman. Tsay markachöna kaykaptinqa wanuqpa aylun amana wanutsinqatsu. Wanutsiq runaqa tsay markalacho tanqa mandaq cüra wanunanyaq. Tsay cüraqa *sagrädu aceitita umanman winapashqami kaykan.
26 Amparakuna markapita yarquptinmi itsanqa
27 wanuq runapa aylun tinkur wanutsinqa. Tsayno wanutsirpis manami jutsayuqtsu kanqa.
28 Tsayno kaptinqa wanutsiq runa amparakuna markalacho täkunqa mandaq cüra wanunanyaq. Mandaq cüra wanuptinraqmi markanman kutikunqa.
29 “ ‘Kay nishqäkunaqa leymi kaykan. Kay leytami tsurikikunata maycho tarpis yachatsipäkunki.
30 “ ‘Wanutsikuq runataqa runa mayinta wanutsishqanpita careaptinraqmi wanutsipäkunki. Juk runala careaptinqa ama wanutsipäkunkitsu.*
31 “ ‘Wanutsikuq runa wanuyta mantsakur qellayta pägayta munaptinpis ama chaskipäkunkitsu. Runa mayinta wanutsishqanpita tsay runataqa wanutsipäkunki.
32 “ ‘Mana yarpaypa wanutsiq runapis amparakuna markacho tashqanpita markanman kutiyta munar pägayta munaptin ama chaskipäkunkitsu. Mandaq cüra manaraq wanuptinqa tsay amparakuna markalacho täkutsun.
33 “ ‘Runa mayinta wanutsiq runaqa tashqayki naciontami *impüruyätsin. Tsaymi wanutsikuq runata wanutsiptikiraq nacionniki purificashqa kanqa.
34 “ ‘Noqa TAYTA DIOSMI qamkunawan taykä. Tsawraqa tänantsipaq kaq nacionta ama impüruyätsinkitsu’ ”.
Ichic wilacuycuna
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ 35.1-8 Jos. 21.1-42.
^ Canaán Canaánchöqa atska markakunami karqan. Cada markachömi juk mandaq rey karqan. Tsaychömi tarqan ceneo runakuna, cenezeo runakuna, cadmoneo runakuna, heteo runakuna, ferezeo runakuna, refaíta runakuna, amorreo runakuna, cananeo runakuna, gergeseo runakuna y jebuseo runakunapis (Gén. 15.19-21). Abrahamtami Tayta Dios promitirqan paypita miraqkunata Canaánta qoykunanpaq (Gén. 17.8).
^ 35.9-28 Jos. 20.1-9.
^ sagrädu Liyinki santupita tantiyatsikuyta.
^ 35.30 Deut. 17.6; 19.15.
