Números 6:1-27
6 Moiséstami TAYTA DIOS kayno nirqan:
2 “Israel runakunata kayno niy: ‘Mayqan runapis o mayqan warmipis nazareo kananpaq TAYTA DIOSTA promitirqa
3 manami vïnuta ni ima shinkatsikuqtapis upunqatsu. Tsaynöpis manami upunqatsu üvapita rurashqa vinagrita ni üvapa yakuntapis. Manami üvata ni päsastapis mikunqatsu.*
4 Nazareo kananpaq promitishqanta cumplishqanyaq manami imatapis üvapita rurashqataqa mikunqatsu ni upunqatsu.
5 Nazareo karqa TAYTA DIOSPAQ *santumi kanqa. Tsaymi nazareo kananpaq promitishqanta cumplishqanyaq aqtsanta mana rutukunqatsu.
6 Nazareo kaykarqa pï wanuptinpis ayaman ama witipätsuntsu.
7 Maman wanuptinpis, papänin wanuptinpis, wawqin wanuptinpis ni panin wanuptinpis *impüru mana kananpaq ama witipätsuntsu. Tsayno ama witipätsuntsu TAYTA DIOSPAQ consagrädu kashqanta cumplir.
8 Nazareo kananpaq TAYTA DIOSTA promitishqanta cumplishqanyaqmi olqu karpis o warmi karpis consagrädu kanqa.
9 “ ‘Nawpancho pipis elaqpita wanuptin imaptinqa TAYTA DIOSPAQ consagrashqan aqtsan impürumi rikakunqa. Tsaymi qanchis junaq pasarkuptin aqtsanta rutukunqa purificakunanpaq.
10 Pusaq junaq kaqchönami ishkay kulkushta karpis ishkay pushapa palumata karpis Tinkuna Toldu patiuman apaykur cürata entreganqa.
11 Cüranami rupatsinqa jukta purificatsina sacrificiupaq y jukaqtana rupatsina sacrificiupaq. Tsaynöpami tsay nazareo runa o nazareo warmi püruna rikakunqa. Aqtsanpis TAYTA DIOSPAQ yapaymi consagrädu kanqa.
12 Tsaynöpis watayuq carnishta consagratsina sacrificiupaq apamur yapay nazareo runa o nazareo warmi kanqa. Itsanqa impüruyashqanpitami nawpata nazareo kashqan tiempupis manakaqlapaqna kanqa. Tsaymi nazareo kayta yapay qalaykur cumplinqa promitishqan tiempu cumplinanyaq.
13 “ ‘Nazareo kananpaq tiempun cumplirkuptin Tinkuna Toldu patiuman shamunqa.
14 Tsayman shamurmi juk watayuq carnishta rupatsina sacrificiupaq apamunqa, juk watayuq china uyshata purificatsina sacrificiupaq apamunqa y juk carnita jawka kawakuy sacrificiupaq apamunqa. Tsay uywakunaqa lapanpis sänumi kanqa.
15 Tsaynöpis alinnin harinapita levadüraynaq tantata canastawan apamunqa. Tsay tantaqa aceitiwan masarashqami kanqa. Tsay canastamanmi winanqa aceitiwan lushipashqa levadüraynaq lapsha tantata, tsaki mikuy ofrendakunata y vïnutapis.
16 “ ‘Tsaykunata chaskirkurmi purificatsina sacrificiuta TAYTA DIOSPA nawpancho cüra rupatsinqa. Tsaypitanami rupatsina sacrificiutapis rupatsinqa.
17 Nirkurnami jawka kawakuy sacrificiupaq chaskishqan carnita y canastacho levadüraynaq tantakunata TAYTA DIOSPAQ joqarkur wakman kayman kuyutsinqa. Tsaynöpis apamushqan tsaki mikuyta y vïnuta *altarman winapanqa.
18 Tsay hörami nazareo runa aqtsanta Tinkuna Toldu patiucho rutukunqa. Tsay consagrädu aqtsatanami jawka kawakuy sacrificiu rupaykashqan ninaman qaykunqa.
19 “ ‘Nirkurnami rutukushqa nazareo runata cüra makyanqa calduypa yanushqa carnipa palitillanta. Tsaynöpis canastapita makyanqa levadüraynaq juk tantata y levadüraynaq lapsha tantatapis.
20 Tsaykunata nazareo runapita yapay shuntarkurna TAYTA DIOSPA nawpancho joqarkur wakman kayman kuyutsinqa. Tsaymi *sagrädu kar cürapaq kanqa. Tsaynöpis cürapaq kanqa TAYTA DIOSPA nawpancho wakman kayman kuyutsishqan pëchun y alawqa kaq chankan. Tsaypitanami itsanqa nazareo runa vïnuta upunqa.
21 “ ‘Nazareo runa aypäpakurqa ofrendatapis uywatapis masta apamunqa. Nazareo kananpaq TAYTA DIOSTA promitirqa ley nishqannöla lapantapis cumplinqa’ ”.*
Cürakuna bendicionta qoshpan imata ninanpaq kashqanpis
22 Moisésta TAYTA DIOS kayno nirqan:
23 “Aarónta y tsurinkunata yätsinki Israel runakunata bendicionta qor kayno ninanpaq:
24 “ ‘TAYTA DIOS bendicionninta qoshushpayki ima peligrupitapis tsapaykuläshunki.
25 TAYTA DIOS ali rikashushpayki imaypis kuyapaykuläshunki.
26 TAYTA DIOS imachöpis kuyapäshushpayki ali kawanaykipaq yanapaykuläshunki’.
27 “Tsaynöpami Israel runakunata yanapanäpaq cürakuna jutïcho manakamanqa. Tsayno manakamaptinmi bendicionnïta qoshaq”.
Ichic wilacuycuna
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ sagrädu Liyinki santupita tantiyatsikuyta.
^ 6.13-21 Hech. 21.23-24.
