Colosenses 2:1-23
2 Qamkunapaq lakikurmi lapan shonqüwan Tayta Diosta imaypis manakuykä. Tsaynölami manakuykä Laodicea markacho* * yärakuq mayintsipaq y wakin mana reqimaqkunapaqpis.
2 Qamkunapaq manakuykä Tayta Dios munashqanno kushishqa kawanaykipaq y jukniki juknikipis juk shonqunöla kuyanakur kawanaykipaqmi.
Tsaynöpis manakuykä Tayta Diospa wilakuyninta shumaq tantiyakärinaykipaqmi. Tsaynöpami runakuna mana musyashqa kaptinpis musyantsi Jesucristuwan salvamashqantsita.
3 Jesucristumi tantiyatsimantsi Tayta Diospa wilakuynin imano kashqanta y pay munashqanno kawanantsipaq kashqantapis.
4 Tsayno niykä pipis ali shimilanpa lutanta mana criyitsishunaykipaqmi.
5 Karucho karpis qamkunapaqmi imaypis yarparaykä. Tayta Dios munashqanno kawapäkushqaykita y Jesucristuman imaypis yärakärishqaykita musyarmi kushikü.
Mushuq kawayta chaskishqantsi
6 Señor Jesucristuta chaskikushqana kaykarqa pay munashqanno imaypis kawapäkuy.
7 Shumaq sapitsashqa yöra mana lukikashqanno y shumaq cimientushqa wayi mana juchushqanno paycho imaypis kawapäkuy. Yachakärishqaykinöla Jesucristuman yärakur imaykapitapis Tayta Diosta agradëcikäriy.
8 Paqta pipis lutankunata criyitsishushpayki manakaqkunata yachatsishunkiman. Lutanta yachatsikuqkunaqa manami Jesucristo munashqannötsu yachatsipäkun, sinöqa runakunapa yarpaynilanta y *Satanás munashqalantami yachatsipäkun.
9 Jesucristuqa runa karpis Diosmi kaykan.
10 Tsaymi Jesucristucho kaykarqa salvashqana kaykantsi. Manami *angilkunapis ni *supaykunapis payman tinkuntsu.
11 Tsaynöpis Jesucristucho karmi señalashqana kaykantsi. Tsayno kanantsipaqqa manami runakunatsu cuerpuntsita señalamashqantsi, sinöqa Jesucristumi shonquntsita señalamashqantsi. Tsayno señalamashqantsi jutsa ruraypa munaynincho kashqantsipita jorqamashpantsimi.*
12 *Bautizakurmi Jesucristuwan pampakuqno kashqantsi. Tsaynöpis Jesucristuwan kawarimushqanöna karmi mushuq kawaytana kawaykantsi. Tsayno kaykantsi munayninwan Jesucristuta kawaritsimuq Tayta Diosman yärakurmi.*
13 Shonquntsi manaraq señalashqa kaptin y jutsa rurashqantsita manaraq perdonamaptintsiqa wanushqanömi karqantsi. Kananmi itsanqa jutsantsipita perdonashqana kar Jesucristuwan kawarimushqanöna kaykantsi.*
14 Tsaynölami leyninkunata mana cumplir Tayta Diospa jaqan kar castigashqa kanantsipaq karqantsi. Kananmi itsanqa Jesucristo cruzcho wanuptin Tayta Diospa jaqan kantsinatsu, sinöqa lapan jutsantsipita perdonashqanami kaykantsi.*
15 Jesucristo tsayno wanurmi Satanásta y supaykunatapis vincishqa. Contran soldädukunata rey vinciykur runakuna rikaykaptin liyarkur penqaypaq puritsiqnömi Satanásta y supaykunatapis vincirkur penqayman churashqa.
Lutan yachatsikuqkunata mana chaskipänantsipaq nishqan
16 Tsayno kaykaptinqa lutan yachatsikuqkuna jamurpäshuptikipis ama cäsupaytsu. Paykunaqa kaynömi nirkaykan: “Kayta ama mikupäkuytsu ni upyapäkuytsu”.
Tsaynöpis kaynömi nirkaykan: “Lulu killa fiestata y wakin fiestakunatapis rurashun. Jamay junaqtapis respitashun”.*
17 Tsayno niptinpis paykuna yachatsishqankuna lantuyno pasaqla karmi Jesucristo shamushqanyaqla kashqa.
18 Tsayno kaykaptinqa ama cäsupaytsu lutan yachatsikuqkuna manakaqkunata yachatsishuptiki. Paykunaqa nirkaykan nishqankunata cumplipäkunaykipaq y *angilkunataraq adorapäkunaykipaqmi. Tsaykunata yachatsinanpaq Tayta Dios sueñuynincho revelashqanta nirpis lulakurkaykanmi. Kikinkunapa yarpaynilanpita tsayno parlarmi pasaypa yachaq tukärin.
19 Jesucristo *iglesiapa uman kaptinpis tsay runakunaqa manami cäsukurkaykantsu. Moquntsikunata anku ankuntsi tsararashqannömi noqantsitapis Jesucristo makincho tsararaykämantsi paywan juklaylano kanantsipaq. Tsayno karmi Tayta Dios munashqanno kawayta yachakuntsi.*
20 Jesucristuwan wanushqana kaykarqa* y *supaykunapa yachatsikuyninkunata mana cäsuykarqa ¿imanirtaq lutan yachatsikuqkuna yachatsishushqaykita chaskikurkaykanki?
21 Paykunaqa kaynömi nirkaykan: “¡Tsayta ama yataytsu! ¡Kayta ama mikuytsu! ¡Taqayta ama ni yataylapis yataytsu!”
22 Tsayno yachatsirmi kikinkunapa jamuylanpita ushakaqkunalata yacharkaykätsin.
23 Yachatsipäkushqanta cumplirmi runakuna pasaypa nakapäkun. Tsay nakaqkuna religiösu kashqanta yarparmi wakin runakuna nipäkun tsay yachatsikuy ali kashqanta. Tsayno nipäkuptinpis tsay yachatsikuyta cumpliqkuna manami jutsankunata kachariyta kamäpakuntsu.
Ichic wilacuycuna
^ 2.1 Apoc. 3.14-22.
^ 2.1 Laodicea markaqa Colosaspita ishkay lëwa pulanmi karqan.
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ supay Supaykunaqa Tayta Diosta mana cäsukuq angilkunami kaykan. Paykunami Satanás mandashqanta rurar runakunata qeshyatsin, löcuyätsin, chikinakatsin y yarpayninta pantakätsin Tayta Diospa ali wilakuyninta mana tantiyapäkunanpaq (Mat. 12.43-45; Mar. 1.23-26; Luc. 8.2). Masta musyanaykipaq liyinki Satanáspita tantiyatsikuyta.
^ 2.11 Deut. 10.16; 30.6; Jer. 4.4; Rom. 2.28-29; 8.2.
^ bautizay Jesucristuta chaskikuqkuna bautizakurqa runakunata musyatsipäkun jutsankunata kacharishqanta, Jesucristuman yärakärishqanta y Jesucristuta cäsukärinanpaq kashqantami. Discïpulunkunatami Jesucristo nirqan payta chaskikuqkunata bautizananpaq (Mat. 28.19; Mar. 16.16).
^ 2.13 Efe. 2.1-5.
^ 2.16 Rom. 14.1-6.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ iglesia Iglesiaqa manami Diosta alabana wayilatsu, sinöqa Jesucristuta chaskikuqkunami kaykan (Hech. 13.1; 14.23; 20.28; Rom. 16.1; Efe. 1.22; 5.23).
^ 2.19 Efe. 1.22; 4.15-16.
^ 2.20 Rom. 6.6-7; Gál. 2.19-20.
^ supay Supaykunaqa Tayta Diosta mana cäsukuq angilkunami kaykan. Paykunami Satanás mandashqanta rurar runakunata qeshyatsin, löcuyätsin, chikinakatsin y yarpayninta pantakätsin Tayta Diospa ali wilakuyninta mana tantiyapäkunanpaq (Mat. 12.43-45; Mar. 1.23-26; Luc. 8.2). Masta musyanaykipaq liyinki Satanáspita tantiyatsikuyta.
