Lucas 15:1-32
15 Jesús yachatsishqanta mayapäkunanpaqmi impuestu cobraqkunapis y jutsasapakunapis aywapäkurqan.
2 Tsayta rikaykurmi *fariseukuna y ley yachatsiqkuna jamurpar kayno nirqan: “¿Imanirtaq kay runaqa jutsasapakunawan juntakaykur mikupäkun?”
3 Tsayno nipäkuptinmi tinkutsiypa yachatsir Jesús kayno nirqan:
4 “Pipis pachak (100) uyshanpita jukta oqraykurqa ¿manaku isqun chunka isqun (99) kaqta ayluykur jukla ashiq aywan?
5 Tariykurqa kushishqami aparikurkur apan.
6 Wayinman chayaykatsirnami reqinakushqankunata y vecïnunkunata qayaykatsir kayno nin: ‘¡Oqrashqä uyshätami tarimushqä! ¡Lapantsi kushikärishun!’
7 “Noqa kaynömi nï: Tsay runa uyshata tariykur kushikushqannölami jana patsachöpis kushikärin juk runalapis jutsa rurayta kacharir Tayta Dios munashqannöna kawaptin. Tsayno kushikärin isqun chunka isqun (99) ali ruraq runakunapaq kushikushqanpitapis masraqmi.
Warmi oqrashqan qellayman Jesús tinkutsishqan
8 “Pï warmipis chunka qellayninpita jukta oqraykurqa ¿manaku atskita ratarkatsir jukla wayinta pitsapakun tarinanyaq?
9 Tariykurmi yanasankunata y vecïnankunata qayaykatsir kayno nin: ‘¡Oqrashqä qellaynïtami tarishqä! ¡Lapantsi kushikärishun!’
10 Tsaynömi Tayta Diospa *angilninkunapis kushikärin juk runalapis jutsa rurayta kacharir Tayta Dios munashqanno kawaptin”.
Aywakuq mözuman Jesús tinkutsishqan
11 Tsaynöpis Jesús kayno nirqan: “Juk runapashi ishkay tsurinkuna karqan.
12 Tsayshi shulka kaq tsurin papäninta kayno nirqan: ‘Papä, herenciäta rakipaykalämay’. Tsayno niptinshi ishkan tsurinta papänin rakipaykurqan.
13 “Tsaypita juk ishkay junaqlatanashi shulka kaq tsurin lapan chaskishqankunata rantikuykur aywakurqan karu markaman. Tsaychöshi munashqanta rurar lapan qellayninta manakaqkunacho usharqan.
14 Tsayno ushapakushqa kaykaptinnashi tsay markacho fiyupa muchuy karqan. Tsayshi tsay mözu fiyupa yarqanar
15 tsay markacho aruyta ashirqan. Tsawraqa juk runashi chaskirqan kuchinta mitsipänanpaq.
16 Tsaychöshi pasaypa yarqanar kuchipa mikuynintapis mikuyta munarqan. Tsayno yarqaptinpis manashi pipis qararqantsu.
17 “Tsawraqa yarpachakurqan kayno nir: ‘Kaycho yarqaypita wanuykaptï papänïpa minkayninkunaqa saksaqpaq mikushqachari karkaykan.
18 Kanan kutiykur papänïta kayno nishaq: “Papä, qamta y Tayta Diostapis rabyanätsirmi jutsata rurashqä.
19 Amana tsurikitanöqa chaskimaynatsu papä, sinöqa minkaynikitanölana chaskiykalämay” ’.
20 Tsayno yarpachakurkurnashi papänin kaqpa kutikurqan.
“Karulataraq kutiykaqta rikärirshi papäninqa kushikushpan warakayla aywar makalakurkur mutsarqan.
21 Tsayshi tsurin kayno nirqan: ‘Papä, qamta y Tayta Diostapis rabyanätsirmi jutsata rurashqä. Amana tsurikitanöqa chaskimaytsu’.
22 “Tsayno niykaptinshi papäninqa ashmayninkunata kayno nirqan: ‘Mas ali kaq röpata jukla jorqarkamur tsurïta jatipay. Tsaynöla sortëjata y lanqitapis jatipay.
23 Nirkur werannin turituta pishtapäkuy fiestata rurar mikunantsipaq.
24 ¡Kay tsurïqa wanushqanpitami kawarimushqa! ¡Oqrakashqanpitami yurimushqa!’ Tsayno nirshi fiesta rurayta qalaykärirqan.
25 “Qechpa kaq tsurinqa chakrachöshi kaykarqan. Wayiman chayaykashqanchöshi fiestata rurarkaykaqta mayarqan.
26 Tsawraqa juk ashmayninta qayaykur wayicho ima pasashqantapis tapurqan.
27 Tsayshi ashmaynin kayno nirqan: ‘¡Wawqikimi kutimushqa! Sänu kutimushqa kaptinmi papäniki kushikur werannin turituta pishtatsishqa’.
28 “Tsayno wilaptinshi fiyupa rabyashpan wayiman yaykuyta mana munarqantsu. Tsayshi papänin aywaykur yaykunanpaq yaparir yaparir ruwarqan.
29 Tsayshi papäninta kayno nirqan: ‘Mana yarquypami lapan nimashqaykita rurar imaypis qamta yanapaykä. Tsayno yanapaykaptïpis amïgükunawan mikunäpaq manami juk cabra malwalatapis qomashqankitsu.
30 ¡Kay tsuriki *wayrapakuq warmikunacho qellaynikita usharkur kutiykamuptinmi itsanqa werannin turituta pishtatsishqanki!’
31 “Tsayno niptinnashi taytan kayno nirqan: ‘Mana yarqukuypami noqawan kaykanki, hïju. Lapan imaykäkunapis qamlapaqmi kaykan.
32 Imano kaptinpis fiestata kushishqa rurashun. ¡Kay wawqikiqa wanushqanpitami kawarimushqa! ¡Oqrakashqanpitami yurimushqa!’ ”
Ichic wilacuycuna
^ fariseo runa Fariseukunaqa Moisés qelqashqan leykunata lapantami yachakärirqan. Tsay leykuna jananmanmi mas leykunata y costumbrikunata yapapäkurqan (Mar. 7.1-4). Tsaykunata yachaykarpis runa mayinta manami kuyarqantsu (Mat. 16.5-12; 23.1-36).
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ wayrapakuq warmi Wayrapakuq warmiqa pägupaq rayku jukwan jukwan kakuq warmimi kaykan. Tsayno warmikunata Tayta Dios imaypis mana perdonananpaq kashqanta runakuna yarpaptinpis Jesucristuqa nirqan jutsankunata kacharir Tayta Dios munashqanno kawarqa perdonashqa kananpaq kashqantami (Mat. 21.31-32; Heb. 11.31).
