Lucas 17:1-37
17 Nirkurnami discïpulunkunata Jesús kayno nirqan: “Runa mayinta jutsaman tunitsiqkunaqa imaypis kanqami. ¡Tsay runakunaqa pasaypa kuyapaypaqmi kanqa!
2 Juk wamralatapis jutsata ruratsiptinqa mas alimi kanman mulinu rumita kunkanman wataparkur lamarman qarpuriptinpis.
3 ¡Tsayno kaykaptinqa pitapis jutsaman ama tunitsipäkuytsu!
Runa mayintsita perdonanantsipaq Jesús yachatsishqan
“Runa mayiki rabyanätsishuptikiqa lutanta ruraykashqanta tantiyatsinki. Tantiyatsiptiki chaskikuptinqa perdonanki.
4 Juk junaqlacho qanchis kuti rabyanätsishuptikipis qanchis kuti ‘perdonaykalämay’ nishuptikiqa perdonanki”.
Mas yärakärinanpaq manakushqan
5 Tsayno niptin *apostolninkuna Señor Jesústa kayno nirqan: “Yanapaykalämay mas yärakärinäpaq”.
6 Tsawraqa Señor Jesús kayno nirqan: “Ñäpushpa murunno takshalapis yärakuyniki kaptinqa kay sicómoro yörata ‘sapipita lukikarkur lamarman jawikamuy’ niptikipis nishqaykinömi kanman”.
Ashmaynöla kanantsipaq Jesús nishqan
7 “Mayqaykipapis ashmayniki arushqanpita o mitsikushqanpita chayamuptin manami kayno ninkitsu: ‘Jamaykulay mikunaykipaq’.
8 Tsaypa trukanqa kaynömi nipäkunki: ‘Yanukamuyraq qaramänaykipaq. Mikuyta usharkuptïraqmi qamqa mikunkipaq’.
9 Mandashqaykita ruraykaptinpis manami ashmaynikita yusulpalä ninkitsu.
10 “Qamkunapis Tayta Dios nishushqaykita rurarkushpaykiqa kayno nipäkuy: ‘Noqantsiqa Diospa ashmaynin karmi nimashqalantsita ruraykantsi’ ”.
Leprawan qeshyaykaq chunka runakunata Jesús aliyätsishqan
11 Jerusalénman aywarmi Samaria y Galilea kuchunpa Jesús pasarqan.
12 Taksha markaman chayananpaq kaykaptinmi *leprawan qeshyaykaq chunka runakuna tinkunanpaq yarqamurqan. Paykunami karulapitana
13 qayakurqan kayno nir: “¡Tayta Jesús, noqakunata kuyapaykalämay!”
14 Tsawraqa Jesús rikärir kayno nirqan: “Rikashunaykipaq cürakunaman aywapäkuy”.
Tsayno niptin aywarkaykashqalanchönami aliyarqan.
15 Tsaymi aliyashqanta tantiyaykur juk runalana Jesús kaqman kutirqan Tayta Diosta alabaraykar.
16 Chayaykurnami urkunpis pampaman töpashqanyaq Jesúspa nawpanman qonqurpakuykur kayno nirqan: “¡Yusulpalä, tayta!” Tsay runaqa Samariapitami karqan.
17 Tsawraqa Jesús kayno nirqan: “Aliyaqkuna ¿manaku chunka karqan? ¿Maytaq wakin kaqkunaqa?
18 Kay jäpa runalami Tayta Diosta agradëcikur kutimushqa”.
19 Nirkur tsay runata kayno nirqan: “Sharkuy. Kananqa aywakuyna. Yärakamashqaykipitami Tayta Dios aliyätsishushqanki”.
Tayta Dios mandaykashqan imay chayamunanpaq kashqanta Jesústa tapushqan
Mateo 24.23-28, 36-41
20 Juk kutimi *fariseukuna Jesústa tapupäkurqan kayno nir: “Tayta Dios *mandaykashqanqa ¿imaytaq chayamunqa?”
Tsaymi kayno nirqan: “Tayta Dios mandaykashqan chayamunanpaqqa manami ima señaltapis rikapäkunkipaqtsu.
21 Manami pipis kayno ninqatsu: ‘Kaychömi kaykan, wakchömi kaykan’. Tayta Dios mandaykashqanqa qamkuna kaqchönami kaykan”.
Manaraq kutimuptin ima kananpaq kashqantapis Jesús nishqan
22 Tsaypitanami discïpulunkunata kayno nirqan: “Shamuq watakunachömi *Runapa Tsurin juk junaqlapis mandaq kashqanta qamkuna rikayta munankipaq. Mayjina rikayta munarpis manami rikankipaqtsu.
23 ‘Kaychömi kaykan, wakchömi kaykan’ nishuptikipis ama cäsupäkunkitsu ni rikaqpis ama aywapäkunkitsu.
24 Elquptin ciëlupa juk kuchunpita jukaq kuchunyaq atsikyashqanta rikashqannömi Runapa Tsurin kutimuptin lapan rikanqa.
25 Tsayno manaraq kaptinmi kanan witsan runakuna payta chikir fiyupa nakatsinqa.
26 “Noé kawashqan witsan runakuna kawashqannömi* Runapa Tsurin shamunan witsanpis kawarkaykanqa.
27 *Arcaman Noé yaykushqan junaqyaqmi runakuna mikur, upyar y casarar karkaykarqan. Tsayno kaykaptinmi diluviu shamur lapan runakunata ushakätsirqan.
28 “Tsaynölami Lot kawashqan witsanpis* runakuna mikur, upyar, rantir, rantikur, murukur y wayitapis sharkatsir kaykarqan.
29 Sodoma markapita Lot yarqushqan junaqmi azufriyuq nina ciëlupita tamyamur lapan runakunata ushakätsirqan.
30 Tsaynölami kanqa Runapa Tsurin kutimunan junaqpis.
31 “Tsay junaqqa wayi janancho kaykaqkuna* imaykankunatapis jorqunanpaq ama wayinman yaykutsuntsu. Chakracho kaykaqkunapis wayinman ama kutitsuntsu.
32 ¡Yarpapäkuy Lotpa warminta ima pasashqantapis!*
33 Kawayninta salvayta munaqkunaqa kawayninta oqranqami. Kawayninta oqraqkunami itsanqa kawayninta salvanqa.* *
34 “Noqa kaynömi nï: Tsay tsakaymi juk cämalacho ishkaq punurkaykaqpita jukaqta apakunqa y jukaqta kachaykunqa.
35 Maraycho ishkay warmikuna aqakurkaykaqpitami jukaqta apakunqa y jukaqta kachaykunqa.
36 [Chakracho ishkay runakuna aruykaqpitami jukaqta apakunqa y jukaqta kachaykunqa]”.
37 Tsayno niptinmi tapupäkurqan kayno nir: “¿Maychötaq tsayqa kanqa, tayta?”
Tsawraqa Jesús kayno nirqan: “Maychöpis wanushkuna jitaraykashqanmanmi wiskulkuna juntakanqa”.*
Ichic wilacuycuna
^ apóstol Apóstol ninanqa “wilakunanpaq kachashqan runa” ninanmi. Apostolkunataqa Jesucristumi kacharqan maytsaymanpis aywar wilakuyninta wilakunanpaq. Tsay apostolkunaqa karqan chunka ishkaymi. Jesucristo wanushqanpita kawarirkamurmi Pablutapis yuriparkur churarqan apóstol kananpaq (Mar. 3.14; Luc. 6.13-16; 1Cor. 9.1-2). Apostolkunatami Jesucristo nirqan Espíritu Santu shamur lapanta yachatsinanpaq kashqanta y Jesucristo yachatsishqanta yarpätsinanpaq kashqanta (Juan 14.25-26; 16.12-15). Tsaynöpami Jesucristupa apostolninkuna y paykuna autorizashqan runakuna Mushuq Testamentuta qelqapäkurqan.
^ lepra Lepra qeshyaqa runapa qarancho tukuy casta qerikunami karqan. Israel nacioncho lepra qeshyawan qeshyaykaqkunaqa markapita juk läduchömi täkäriq (Lev. 13.45-46). Paykunataqa runakuna manami yataylapis yataqtsu (Lev. 22.5). Tsayno kaptinpis Jesucristo munayniyuq karmi leprawan qeshyaykaqkunata yataykur aliyätsirqan (Mar. 1.40-43).
^ fariseo runa Fariseukunaqa Moisés qelqashqan leykunata lapantami yachakärirqan. Tsay leykuna jananmanmi mas leykunata y costumbrikunata yapapäkurqan (Mar. 7.1-4). Tsaykunata yachaykarpis runa mayinta manami kuyarqantsu (Mat. 16.5-12; 23.1-36).
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ Runapa Tsurin Runapa Tsurinpaq parlarqa Jesucristo kikinpaqmi parlarqan (Juan 9.35-37). Tsaynöpami tantiyatsirqan Daniel 7.13-14-cho qelqaraykashqanno Runapa Tsurin kashqanta, kutimunanpaq kashqanta (Mat. 13.41-42; 24.27, 30, 44; 25.31) y lapanpaq munayniyuq kashqanta (Mar. 2.10; 2.28).
^ 17.26 Gén. 6.5-8.
^ arca Arcaqa jatunkaray atska cuartuyuq büquimi karqan. Pelötawan puklakuna pampapitapis mas jatunmi karqan. Tayta Dios niptinmi arcata Noé rurarqan. Tsay arcamanmi diluviupita salvakärinanpaq Tayta Dios nishqanno Noé, warmin, tsurinkuna, lumtsuyninkuna y tukuy casta uywakunapis yaykurqan (Gén. 6.9–9.17).
^ 17.28 Gén. 19.1-29.
^ 17.31 Tsay witsanmi wayita qatananpa trukan terrädu jananman tsaqlarkur mituwan lashtapäkuq. Tsay jananchönami awakäriq, aqakäriq y trïgutapis akrapäkuq.
^ 17.32 Gén. 19.17, 26.
^ 17.33 Tsayno nirqa Jesucristo kaynömi nirqan: “Kikin munashqanno luta kawakuqkunaqa manami salvakunqatsu. Noqa munashqäno kawaqkunami itsanqa salvakunqa”.
^ 17.33 Mat. 10.39; Mar. 8.35; Juan 12.25.
^ 17.37 Tsayno nirmi Jesucristo tantiyatsirqan nishqankuna maytsaychöpis pasananpaq kashqanta.
