Salmos 143:1-12
(1a) David qelqashqan salmu.
143 (1b) TAYTA DIOS, manakamushqäta mayaykalämay.Ruwakamushqäta wiyaykalämay.Promitishqaykita cumpliq kaykarqa yanapaykalämay.
2 Qam musyankimi lapan runakuna jutsayuq kashqanta.Sirviqniki karmi manakamü mana castigamänaykipaq.
3 Wanutsimayta munarmi chikimaqnïkunaqa tumaparkaykäman.Ayatanömi jukla pampamayta munarkaykäman.
4 Pasaypami mantsariykä.Shonqüpis lakikuylawanmi turwataykan.
5 Unay rurashqaykitami yarparkü.Espantaypaq kaqkunata rurashqaykipitami yarpachakü.
6 Makïta joqarkurmi manakamü.Tsaki alpa yakuta munashqannömi noqapis qamta munaykä.* Selah
7 Jämaynï manaraq ushakaptin jukla contestaykalämay, TAYTA DIOS.Noqapita ama *pakakuykulaytsu.Pakakuptikiqa wanushqanöchari rikakushaq.
8 Lapan shonqüwanmi qamman yärakamü, Tayta.Kuyakuq kashqaykita tutapa musyaykatsilämay.Imata ruranäpaq kaqtapis tantiyaykatsilämay.
9 TAYTA DIOS, qamman amparakaykämuptïqa chikimaqnïkunapita tsapaykalämay.
10 Qamqa Tayta Diosnïmi kaykanki.Munashqaykino kawanäpaq yanapaykalämay.Alikunata ruranäpaq Espïrituyki tantiyaykatsilämätsun.
11 TAYTA DIOS, munayniyuq kashqaykita pïmaypis musyananpaq yanapaykalämay.Alilata ruraq kashpayki lakikuypita jorqaykalämay.
12 Kuyapämar conträkunata ushakaykatsilay.Ama juktapis kawaykaqtaqa kachaykulaytsu.Tayta, noqaqa qampa makikichömi kaykä.
Ichic wilacuycuna
^ 143.6 Sal. 42.1-2; 63.1.
