Salmos 25:1-22
(1a) David qelqashqan salmu.
25 (1b) TAYTA DIOS, qamtami lapan shonqüwan manakamü.
2 Tayta Diosnilä, qamlamanmi yärakamü.Runakuna penqapämänanpita tsapaykalämay.Conträkuna asipämänanta ama munaykulaytsu.
3 Qamman yärakamuqkunaqa mayqanpis penqayman churashqa ama kaykulätsuntsu.Contrayki sharkuqkuna itsanqa penqayman churashqa kaykulätsun.
4 Imano kawanäpaqpis nänikita reqiykatsilämay,* TAYTA DIOS.Munashqaykino kawanäpaq nänikipa pushaykalämay.
5 Jutsata mana ruranäpaq wilakuynikita tantiyaykatsilämay.Qamlami salvamaqnï Tayta Dios kaykanki.Imay hörapis qamlamanmi yärakamü.
6 Imaypis kuyamashqankimi, TAYTA DIOS.Kuyamashqaykita ama qonqaykulaytsu.
7 Mözu kaykar jutsata rurashqäta ama yarpaykulaytsu.Kuyapäkuq kaykarqa yarparkalämanki, TAYTA DIOS.
8 TAYTA DIOSQA alilata ruraqmi kaykan.Jutsa ruraqkunata pay munashqanno kawananpaqmi ali nänita reqitsin.
9 Humildi kaqkunatami tantiyatsin.Alilata rurananpaqmi yachatsin.
10 Rurashqan *pactuta y mandamientunkunata cumpliqkunataqa kuyapanmi.Promitishqannöla mana kachaypami yanapan.
11 Pasaypa jutsayuqmi kaykä, TAYTA DIOS.Kuyakuq kashqayki musyakänanpaq perdonaykalämay.
12 TAYTA DIOSTA *mantsakuqkunataqa kikinmi tantiyatsin shumaq kawapäkunanpaq.”
13 Paykunamanqa bendicionnintami imaypis churamun.Paykunapita miraqkunatapis posisionta aypun.*
14 TAYTA DIOSQA payta mantsakuqkunapa amïgunmi kaykan.Pactuta rurar promitishqannölami bendicionninta kamaripan.
15 TAYTA DIOSLATAMI imaypis manakü.Paymi ima peligrupitapis tsapäman.
16 Pïnïpis mana kaptinmi pasaypa lakishqa kaykä, Tayta.Nakashqäta rikar kuyapaykalämay.
17 Waran waranmi shonqü pasaypa lakinan.Kay lakikuypita jorqaykalämay.
18 Pasaypa nakaykashqäta y lakikuykashqäta rikaykalämay.Jutsäkunapita perdonaykalämay.
19 Conträkuna tsaytsikami kaykan, Tayta.Pasaypa chikimashqanta rikaykulay.
20 ¡Tsay runakunapita salvaykalämay!¡Paykunapita tsapaykalämay!Qamlamanmi yärakamü, Tayta.
21 Qamman yärakurmi alilata ruraykä.Munashqaykino kawaykaptïqa tsapaykalämay.
22 Tayta Dios, contrankunapita Israel runakunata salvaykulay.
Ichic wilacuycuna
^ 25.4 Nänikita reqiykatsilämay ninanqa munashqaykino kawanäpaq tantiyaykatsilämay ninanmi.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ 25.12-13 Deut. 11.8-9; Sal. 37.9, 11; Mat. 5.5.
