Salmos 48:1-14
(1) Cantanapaq. Corépita miraqkuna qelqashqan salmu.
48 (2) TAYTA DIOSNINTSIQA munayniyuqmi kaykan.Tashqan markacho payta imaypis alabashun.*Sagrädu jirkannincho payta imaypis adorashun.
2 (3) *Sión jirkanqa kuyaylapaqmi kaykan.Tsay jirkanta rikarmi intëru kay patsacho runakuna kushikärin.Norti kaq läduchömi tsay jirkan kaykan.Lapanpaq munayniyuq Reymi* tsaycho taykan.*
3 (4) Tayta Diosmi rikachakuna törrikunapita Jerusalén markata cuidaykan.Paymi Jerusaléncho taqkunata imapitapis tsapan.
4 (5) Mandaq reykuna juntakaykurmi Jerusalénta atacananpaq aywapäkurqan.
5 (6) Itsanqa Tayta Dios cuidaykashqanta rikaykurmi pasaypa ukakashqa rikakärirqan.Ima ruraytapis mana kamäpakurmi jinan höra qeshpir aywakärirqan.
6 (7) Warmita wachay nanay tsarishqannömi paykuna pasaypa mantsakarqan.
7 (8) Tarsispita shamuq *büquikunata huracán wayra pasaypa ushakätsishqannömi tsay runakunata ushakätsishqanki.
8 (9) Lapanta mandaq TAYTA DIOSNINTSI tashqan markacho tsayno pasashqantami rikashqantsi.Tsaynölami unay ima pasashqantapis wilamashqantsi.Jerusaléntaqa Tayta Dios imaypis cuidanqami. Selah
9 (10) Tayta Dios, templuykiman juntakarmi kuyakuq kashqaykita yarpapäkü.
10 (11) Munayniyuq kashqaykita musyarmi intëru kay patsachöpis alabarkaykäshunki.Munayniyuq karmi imaypis alilata ruranki.
11 (12) Sión jirkanchöpis kushikäritsun.Judá markakunachöpis kushikäritsun.Runakunata mana jananpaypa juzgashqaykipita kushikäritsun.
12 (13) Sión jirkanta tumapäkuy.Ayka törrikuna kashqantapis yupapäkuy.
13 (14) Marka murällatapis y amparakuna wayinkunatapis shumaq rikapäkuy.Wara warantin qepa yuriqkunatapis imano kashqanta wilapänaykipaq rikapäkuy.
14 (15) Tayta Diosqa imaypis Diosnintsimi kaykan.Wanushqantsiyaqpis paymi rikaykämantsi.
Ichic wilacuycuna
^ sagrädu Liyinki santupita tantiyatsikuyta.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ 48.2 Tsay reyqa Tayta Diosmi kaykan.
^ büqui Büquiqa yaku jananpa purinanpaq tablapita rurashqa jatunkaray artësanömi kaykan. Tsay büquikunawanmi lamarcho y jatun qochakunacho pescäduta tsaripäkun y juk lädu markakunapapis aywapäkun. Bibliata qelqashqan witsanqa qeruta cruztano ruraykurmi büquicho ichitsipäkurqan. Tsay cruzmanmi rakta tëlata ishkan jana kaq kuchunkunapita watarqan. Ura kaq kuchunkunatanami büquiman watapäkurqan wayraptin aywananpaq (Luc. 8.22-25; Hech. 27.17).
