Salmos 51:1-19
(1-2) Cantaqkunapa mandaqninpaqmi. Betsabéwan David adulteriu jutsata rurashqanpita profëta Natán olqüparqan. Tsaymi jutsata rurashqanpita lakikur kay salmuta David qelqarqan.*
51 (3) Kuyapäkuq Tayta Dios, perdonaykalämay.Kuyapäkuq kashpayki jutsa rurashqäta qonqaykulay.
2 (4) Lutankunata rurashqäpita maylaykalämay.Jutsa rurashqäpita perdonaykalämay.
3 (5) Mana cäsukuq kashqäta tantiyakümi.Jutsa rurashqäta manami qonqayta kamäpakütsu.
4 (6) Jutsata rurar qampa contraykimi rikakushqä.*Qamta mana cäsukushpämi rabyanätsishqä.Tsaymi rasun kaqlata juzgaykämanki.Imanöpa tsapakuytapis manami kamäpakütsu.*
5 (7) Yurishqäpita patsami jutsasapa kaykä.Jutsayuqtami mamäpis wachamashqa.
6 (8) Jutsa rurashqanta mana pakaqtaqa qam kuyankimi.Jutsayuq kashqäta qammi shonqücho tantiyatsimanki.
7 (9) *Hisöpu jachawan purificamaptikiqa limpiumi kashaq.*Maylamaptikiqa rajupitapis mas yoraqmi kashaq.*
8 (10) Kushikuyta shonqüman churaykalämuy.Lakikuyman churamashqa karpis yapay kushikaykatsilämay.
9 (11) Jutsa rurashqäta perdonaykalämay.Lutan rurashqäta ama yarparaykulaytsu.
10 (12) Munashqaykino kawanäpaq ali shonquta qoykalämay, Tayta Dios.Nimashqaykita imaypis cäsukunäpaq yanapaykalämay.*
11 (13) Nawpaykipita ama qarqaykalämaytsu.Espíritu Santuykitapis ama qechuykalämaytsu.
12 (14) Salvamashqaykipita yapay kushishqa kawanäpaq yanapaykalämay.Cäsukuq kanäpaq tantiyaykatsilämay.
13 (15) Tsaynöpami mana wiyakuq runakunata tantiyatsishaq wiyakushunaykipaq.Jutsa ruraykunata kacharirmi qamtana cäsukushunkipaq.
14 (16) Salvamaqnï Tayta Dios, runa mayïta wanutsishqäpita perdonaykalämay.Perdonamashqaykipitami kushishqa imaypis alabashayki.
15 (17) Lapan shonqüwan alabanäpaq yanapaykalämay.
16 (18) Sacrificiuta apamunäta manami munankitsu.Apamunäta munaptikiqa apamümanmi.*
17 (19) Sacrificiuta apamunäpa trukanqa jutsata kacharir lapan shonqüwan wiyakunätami munanki.Jutsata rurashqanpita lakikuqkunataqa kuyapankimi, Tayta Dios.*
18 (20) *Siónta kuyapaykulay.Jerusalénpa murällanta altsaykulay.
19 (21) Tsaymi nishqaykino sacrificiukunata rupatsipäkushaq.Turitukunatapis *altarnikichömi rupatsipäkushaq.
Ichic wilacuycuna
^ 51.0 2Sam. 12.1-15.
^ hisöpu Hisöpuqa muñä jachanömi kaykan. Israel runakuna impüru kashqanpita püru kananpaqmi hisöpu jachata yawarman ushmarkatsir tsaqtsupaq (Éxo. 12.22; Núm. 19.18; Sal. 51.7; Heb. 9.19).
^ 51.10 Eze. 11.19; 36.26; 2Cor. 5.17.
^ 51.16 Sal. 40.6; 50.8-14.
^ 51.17 Sal. 34.18.
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
