Salmos 98:1-9
(1a) Salmu.
98 (1b) Mushuq alabanzata cantar TAYTA DIOSTA alabapäkuy.Paymi mantsariypaq kaqkunata rurashqa.Munayniyuq karmi lapan contrankunata vincishqa.
2 Contrankunata vincishqantami TAYTA DIOS wilakushqa.Chikiqninkunata castigashqantami lapan nacioncho taq runakunata musyatsishqa.
3 Israel runakunata kuyar promitishqantami cumpliykan.Intëru kay patsachömi pïmaypis musyaykan Tayta Diosnintsi salvakuq kashqanta.*
4 Kay patsacho taqkuna, kushikushpayki Tayta Diosta alabapäkuy.Lapan shonquykiwan alabanzakunata cantapäkuy.*
5 Arpata tukapalanpa TAYTA DIOSTA alabapäkuy.Cuerdayuq instrumentukunata tukapalanpa alabapäkuy.
6 TAYTA DIOSQA mandamaqnintsi reymi kaykan.*Cornëtakunata y waqrakunata tukapalanpa alabapäkuy.
7 Lamarpis y tsaycho kaykaqkunapis kushishqa qaparpätsun.Kay patsapis y kay patsacho taqkunapis pasaypa kushikäritsun.
8 Mayukunapis kushikuypita paqchipätsun.Jirkakunapis kushishqa cantapäkutsun.*
9 TAYTA DIOSPA nawpancho alabapäkutsun.Payqa lapan runakunata juzgananpaqmi aywaykämun.Paymi kay patsacho taqkunata mana jananpaypa juzganqa.
Ichic wilacuycuna
^ 98.1-3 Isa. 52.10.
^ 98.4 Sal. 100.1.
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ 98.7-8 Isa. 44.23.
