1, 2. Chayaʼ e kʼutbʼal re jachin xkibʼan e utzalaj taq rachiʼl ri Jehová.

¿JAS UBʼANTAJIK ri winaq kachaʼ che kubʼan awachiʼl? Weneʼ katzukuj rachilaxik jun winaq che xa junam ri uchomanik, ri kraj kubʼano xuqujeʼ junam ri e ubʼantajik awukʼ. Qastzij wi kawaj che jun winaq utz ri e ubʼantajik; jun kʼutbʼal re are jun sukʼalaj winaq xuqujeʼ utz ranimaʼ.

² Umajim lo ojer, ri Dios e uchaʼom jujun taq winaq rech kkibʼan utzalaj rachiʼl. Jun kʼutbʼal re, are chiʼ xubʼij rachiʼl che ri Abrahán (chasikʼij uwach Isaías 41:8; Santiago 2:23). Xubʼij wariʼ chrij ri David: «Areʼ jun achi je ranimaʼ je jas ri kraj ri wanimaʼ», rumal che are jun winaq che ri Dios qas xuloqʼoqʼej (Hechos 13:22). Xuqujeʼ ri ajqʼaxal tzij ubʼiʼ Daniel ‹sibʼalaj loqʼ chuwach› (Daniel 9:23).

3. ¿Jas kril Jehová chiʼ keʼuchaʼ jujun taq winaq rech kkibʼan rachiʼl?

³ ¿Jasche ri Jehová xubʼan utzalaj rachiʼl che ri Abrahán, David xuqujeʼ che ri Daniel? Xubʼij wariʼ che ri Abrahán: «At nimaninaq chwe» (Génesis 22:18). Rumal laʼ, ri Jehová kqebʼ kukʼ jachin ri kkibʼan ta nim che kibʼ chiʼ kkibʼan ri kutaʼ chke. ‹Chixniman chwe [xchaʼ chke ri israelitas], we kʼu je kibʼan waʼ kinkanaj riʼ che iDios are kʼu ri ix kixkanaj riʼ che nutinamit.› (Jeremías 7:23.) We kanimaj ri Jehová, xuqujeʼ katkunik kabʼan rachiʼl.

4, 5. ¿Jas kubʼan Jehová che ukʼutik che kukoj ri uchuqʼabʼ che kitoʼik ri utinamit?

⁴ Chatchoman chrij ri kuya ri rachilanik ri Dios. Ri Biblia kubʼij chrij ri Jehová che kutzukuj ukʼutik che «kuyaʼ kichuqʼabʼ ri qas kakikubʼaʼ kikʼuʼx chrij areʼ» (2 Crónicas 16:9). ¿Jas kubʼan ri Dios che ukʼutik che kuya achuqʼabʼ? Pa Salmo 32:8 kukʼut jun ubʼanik: «[In, Jehová,] ri e nubʼaqʼwach e kʼo pawiʼ kebʼenyaʼ tijonik chawe, kebʼenyaʼ anoʼj, kinkʼut na ri bʼe chawach ri katerenej».

⁵ ¡Jun utzalaj ubʼixik kubʼan Jehová che kraj katuchajij na! Areʼ kuya na ri e pixabʼ che kajwataj chawe, xuqujeʼ we kabʼan ri e utaqonik, katuchajij na rech utz awach. Ri Dios kraj katutoʼ che uchʼijik ri e kʼax kariqo (chasikʼij uwach Salmo 55:22). Rumal laʼ we kapatanej rukʼ ronojel awanimaʼ, katkunik kakubʼsaj akʼuʼx junam che xubʼan ri salmista chiʼ xubʼij wariʼ: «Amaqʼel naʼtal ri Dios chwe; kʼo ri areʼ pa nuwikiʼaqʼabʼ man kʼo ta kintzaqow na» (Salmo 16:8; 63:8). Qastzij laʼ, ri Jehová kkunik katutoʼ rech kʼo jun akʼaslemal che utz chuwach areʼ. Awetaʼm kʼut che kʼo jun ukʼulel ri Dios che kraj taj kabʼan wariʼ.

6. ¿Jas xubʼij Satanás chkij ri winaq?

⁶ Junam che xyaʼ ubʼixik pa ri kʼutunem 11, Satanás xubʼij itzel taq tzij chrij ri unimal uqʼatbʼal tzij ri Dios. Xubʼij che are ri Jehová jun ajbʼanol tzij xuqujeʼ xubʼij che jun ajqʼatbʼaltzij che sukʼ taj, rumal laʼ xuya ta chke ri Adán xuqujeʼ ri Eva kkichaʼ ri ubʼanik ri utz o ri utz taj. Chiʼ kibʼanom chi ri kimak ri taq nabʼe qatat qanan, ri uwach Ulew xnoj che kalkʼwal. Tekʼuriʼ ri Satanás xubʼij chkij ri e winaq che xaq xiw kkiya uqʼij ri Jehová rumal ri kuya chke. Junam che xubʼij wariʼ: «Ri winaq kkipatanej ta ri Dios rukʼ loqʼoqʼenik. We kyaʼ chwe, kinkunik kinbʼan che konojel ri winaq kkibʼan ta ri kraj ri Dios». Ri bʼantajik chrij ri Job kukʼutu che are wariʼ kuchomaj ri Itzel. Tekʼuriʼ ¿jachin laʼ ri Job, xuqujeʼ jas xubʼan pa ukʼaslemal ri itzel taq tzij xubʼij ri Satanás?

7, 8. a) ¿Jasche ri Job sibʼalaj nim ubʼantajik chkixoʼl ri winaq ojer? b) ¿Jas xubʼij ri Itzel chrij ri Job?

 ⁷ Qʼaxinaq chi 3.600 junabʼ che xkʼaseʼ ri Job cho ri uwach Ulew. Jun utzalaj achi, rumal laʼ Jehová xubʼij wariʼ: «Man kʼo ta jun chuwach ri uwach Ulew jachaʼ ri areʼ ri sibʼalaj jik che nupatanixik, ri kukʼam jun kʼaslemal ri sibʼalaj kolom ri man kʼo ta jubʼiqʼ makaj pa ri ukʼaslemal, sibʼalaj kʼu kuchajij ribʼ chi man kʼo ta jun kʼax kubʼan ta che jachin jun» (Job 1:8). Ri Jehová sibʼalaj utz xril ri Job.

⁸ Ri Itzel xubʼij chrij ri Job che kuya uqʼij ri Jehová xa ta rumal che kuloqʼoqʼej. Xubʼij wariʼ che Jehová: «Ri at man kaya ta kʼolbʼal chi kʼo ta jachin kachapowik, mawi ri ralkʼwal mawi ri jastaq rech; ri at katewchiʼj ronojel ri kubʼano, are kʼu achi waʼ ri sibʼalaj qʼinom ri e kʼo kʼiʼalaj rawaj pa ronojel ri ulew chilaʼ; chawesaj kʼu ronojel ri kʼo rukʼ kawil kʼu na chi qas chi apalaj katukʼoqoj na» (Job 1:10, 11).

9. ¿Jas xubʼan Jehová che ukʼutik che xaq xumol tzij ri Satanás, xuqujeʼ jasche?

⁹ Satanás xubʼij chrij ri Job che kupatanej ri Dios xaq xiw rumal ri kuya ri Dios che. Xuqujeʼ xubʼij che we kukoj ri Job pa kʼax, ri Job kubʼan ukʼulel che ri Dios. ¿Jas xubʼan Jehová che ukʼutik che xaq xumol tzij ri Itzel? Rumal che wariʼ kʼo kraj kubʼij chrij ri Job, Jehová xaq xuyaʼo che ri Satanás xukoj pa kʼax. Rukʼ wariʼ kkʼutik we qastzij che ri Job kuloqʼoqʼej ri Dios o qastzij taj.

10. ¿Jas taq kʼax xuriq ri Job, xuqujeʼ jas xubʼano?

¹⁰ Satanás chanim xukoj ri Job pa jalajoj taq kʼax rech kril ri ukojonik. Xubʼano che xeʼelaqʼax nikʼaj uchikop tekʼuriʼ ri nikʼaj chik xekamisaxik xuqujeʼ xekamisax kʼi chke ri rajpatanelabʼ. Ronojel wariʼ xubʼano che kʼo ta chi jastaq re. Tekʼuriʼ, ri Itzel xuya chi jun kʼax che, xekam ri e 10 ralkʼwal rukʼ jun nimalaj kaqiqʼ. Tekʼuriʼ, rukʼ ri kʼax xuriqo, «ri Job man xmakun ta kʼut mawi kʼo jun lawaloyil xubʼij ta chrij ri Dios» (Job 1:22).

11. a) ¿Jas nikʼaj chik jastaq xraj xukʼut Satanás chrij ri Job, tekʼuriʼ jas xubʼan Jehová rukʼ wariʼ? b) ¿Jas xubʼan Job chiʼ xuriq wajun yabʼil riʼ?

 ¹¹ Xkos ta ri Satanás rukʼ wariʼ. Weneʼ xuchomaj che we ri Job xuchʼij ri kʼax chiʼ xesax ri jastaq re, chiʼ xkamisax ri e ralkʼwal xuqujeʼ ri e upatanel, tekʼuriʼ kuxutuj ri Dios we kpe jun yabʼil chrij. Rumal laʼ, Jehová xaq xuya che ri Satanás xuya, o xukoj, jun itzelalaj yabʼil che ri Job. Tekʼuriʼ ri Job xuya ta kan ukubʼsaxik ukʼuʼx chrij ri Dios. Xa xubʼij wariʼ: «Joropa qʼij kinkʼasiʼk, kintaqej na ubʼixik chi man kʼo ta numak» (Job 27:5).

12. ¿Jas xubʼan ri Job chrij ri xubʼij ri Satanás?

¹² Job retaʼm taj che are ri Satanás ri xyaʼow ri kʼax che. Retaʼm ta ri xubʼij ri Satanás chrij unimal uqʼatbʼal tzij ri Jehová, xuxibʼij ribʼ rumal che xuchomaj che weneʼ are ri Dios ri xyaʼow ri kʼax che (Job 6:4; 16:11-14). Rukʼ wariʼ qas xubʼan sukʼ chuwach ri Jehová. Xaq xiw ta wariʼ xubʼano: rukʼ ri usukʼilal, ri Job xukʼutu che qastzij ta ri kubʼij ri Satanás che xaq xiw kupatanej ri Dios rumal kʼo kyaʼ che.

13. ¿Jas xukʼut ri Dios rukʼ ri usukʼilal ri Job?

¹³ Rukʼ ri usukʼilal ri Job, xkun ri Jehová che ukʼutik che qastzij ta ri kubʼij ri Satanás. Job are jun qastzij rachiʼl ri Jehová, rumal laʼ xutewchij rumal ri usukʼilal (Job 42:12-17).

14, 15. ¿Jasche kqabʼij che ri xubʼij ri Satanás kʼo kraj kubʼij chkij konojel ri winaq, xaq xiw ta chrij ri Job?

¹⁴ Ri preguntas xbʼan chrij ri sukʼilal che ri Dios rumal ri Satanás xaq xiw ta xbʼan chrij ri Job. Xuqujeʼ xbʼan chqij oj. Ri Utzij ri Dios kukʼut wariʼ pa Proverbios 27:11, che kubʼij: «Chatux ajnoʼj, nukʼojol, kabʼan kʼu na chwe chi sibʼalaj utz wech; jeriʼ kinkunik kʼo kintzelej na ubʼixik chke ri kakibʼan il patan chwe». Ri e tzij riʼ, che xetzʼibʼax kʼi junabʼ chrij ukamikal ri Job, kkikʼutu che ri Satanás qastzij ta ri kubʼij chrij ri Dios xuqujeʼ kumol tzij chkij ri rajpatanelabʼ. Chiʼ kqabʼan pa qakʼaslemal ri utz kril ri Jehová, kqatoʼ che ukʼutik  che ri kubʼij Satanás qastzij taj, rukʼ wariʼ kqakikotemaj ranimaʼ ri Dios. ¿Jas kachomaj chrij wariʼ? Weneʼ rajawaxik kakʼex ri akʼaslemal, wariʼ sibʼalaj utz rumal che katkunik katoʼ che ukʼutik che ri Itzel xa jun ajmolom tzij.

¹⁵ Chawilampeʼ ri xubʼij ri Satanás: ri winaq kuya ronojel rumal utotajisaxik ri ukʼaslemal (Job 2:4). Chiʼ xubʼij ri tzij, winaq, Satanás xukʼutu che xaq xiw ta xubʼij wariʼ chrij ri Job, xa xchʼaw chkij konojel ri winaq. Wariʼ sibʼalaj nim ubʼantajik. Ri Itzel kubʼij che katkun taj kabʼan sukʼ chuwach ri Dios. Ri Itzel are sibʼalaj utz krilo we kanimaj ta ri Dios chiʼ kariq kʼax, xuqujeʼ kabʼan ta chi ri utzilal. ¿Jas e jastaq kukoj Satanás rech kuriq ri kraj?

16. a) ¿Jas e jastaq kukoj Satanás rech ri winaq e kʼo ta che unaqaj ri Dios? b) ¿Jas ukojik ri e jastaq kubʼan ri Itzel chawe?

¹⁶ Junam che xqil pa ri kʼutunem 10, ri Satanás kukoj kʼi jastaq rech ri winaq e kʼo ta che unaqaj ri Dios. Jun ubʼanik are chiʼ «ri itzel kusutij iwij je jas jun koj kuraq uchiʼ kutzukuj jachin kubʼiqʼo» (1 Pedro 5:8). Katkunik kawil wariʼ we ri e awachiʼl, e afamilia o nikʼaj chik winaq kkaj taj kawetaʼmaj chrij ri Dios xuqujeʼ kabʼan ri kawetaʼmaj (Juan 15:19, 20). * Jun chik ubʼanik, are chiʼ ri Satanás amaqʼel «kujaluj ribʼ che jun taqoʼn ajchikaj re saqil» (2 Corintios 11:14). Ri Itzel kkunik kukoj kʼi jastaq rech katusacho xuqujeʼ kubʼano che kabʼan ta pa akʼaslemal ri utz kril ri Dios. Jun chke wariʼ are ri bʼisonik. Weneʼ kubʼano che kachomaj che katkun taj kakikotemaj ri Dios (Proverbios 24:10). Weneʼ xa kubʼan «jun koj kuraq uchiʼ» o xa kubʼan che ribʼ che «jun taqoʼn ajchikaj re saqil», ri kraj xa junam: areʼ qas kubʼij che chiʼ kariq kʼax kaya kan upatanexik ri Dios. ¿Jas kabʼano rech kakʼutu che katkunik kabʼan sukʼ chuwach ri Dios junam che xubʼan Job?

17. ¿Jas ri qas rumal che kqanimaj ri e utaqonik ri Jehová?

¹⁷ Katkunik kakʼutu che ri kubʼij ri Satanás qastzij taj chiʼ kabʼan pa akʼaslemal ri utz kril ri Ajawaxel. ¿Jas kraj kubʼij wariʼ? Ri Biblia kuya ubʼixik: «Chaloqʼoqʼej ri Ajawaxel ri aDios rukʼ ronojel awanimaʼ, rukʼ ronojel akʼaslibʼal xuqujeʼ rukʼ ronojel achuqʼabʼ» (Deuteronomio 6:5). Chiʼ qas knimar ri aloqʼoqʼenik chrij ri Dios, qas kawaj kabʼan ri kutaʼ chawe. Ri apóstol Juan xutzʼibʼaj wariʼ: «Ri uloqʼoqʼexik ri Dios are ri kinimaxik ri kakibʼij ri e utaqomal». We kaloqʼoqʼej ri Jehová rukʼ ronojel awanimaʼ, kawil na che ri e «utaqomal man e al taj», wariʼ kubʼij che xa ta jun eqaʼn (1 Juan 5:3).

18, 19. a) Chabʼij nikʼaj taq taqonik rech ri Jehová (chawilaʼ ri recuadro che kubʼij « Maqabʼan ri itzel kril ri Jehová»). b) ¿Jasche qetaʼm che ri Dios kʼax ta ri kutaʼ chqe?

¹⁸ ¿Jas ri kojutaq Jehová che kqabʼan taj? Jujun chke are ri e bʼantajik che rajawaxik kqabʼan taj. Nikʼaj kʼutbʼal re, are ri recuadro che kubʼij « Maqabʼan ri itzel kril ri Jehová». Kʼo kʼi taq bʼantajik tzʼibʼam chilaʼ che ri Biblia kubʼij che e nimalaj taq mak. Weneʼ e kʼo nikʼaj kachomaj che qas ta awas ubʼanik. Tekʼuriʼ chiʼ achomam chi chrij wa taq textos rech ri Biblia, weneʼ kawilo che qas utz ri utaqonik ri Dios. Weneʼ rajawaxik kakʼex ri akʼaslemal, weneʼ wariʼ kubʼano che are sibʼalaj kʼax ubʼanik pa akʼaslemal rumal che at naqʼatal ta che ubʼanik. Tekʼuriʼ jachin taq kkibʼan pa kikʼaslemal ri utz kril ri Dios sibʼalaj kekikotik xuqujeʼ kʼo utzil pa kanimaʼ (Isaías 48:17, 18). Tekʼuriʼ wariʼ katkunik kabʼano. ¿Jasche qetaʼm wariʼ?

¹⁹ Jehová kutaʼ ta jastaq chqe che kojkun taj kqabʼano (chasikʼij uwach Deuteronomio 30:11-14). Areʼ retaʼm jampaʼ kojkunik kqabʼano xuqujeʼ ri kojkun taj kqabʼano (Salmo 103:14). Xuqujeʼ, kkunik kuya chuqʼabʼ che kajwataj chqe rech kqanimaj. Ri apóstol Pablo xutzʼibʼaj wariʼ: «Jik kʼu ri Dios, rumal riʼ man kuya taj chi kiriq jun kʼax ri mat kixkuin che uchʼijik. Xaneʼ, are taq kiriq kʼax, kixutoʼ rech kixel chupam, jeriʼ kixkuʼin che uchʼijik» (1 Corintios 10:13, El Nuevo  Testamento en Quiché y Español, ortografía actualizada). Rech kojutoʼ che uchʼijik ri kʼax, ri Jehová kkunik kuya «ri nimalaj kuʼinem» chqe (2 Corintios 4:7).

20. ¿Jas taq bʼantajik che utz kril ri Dios che rajawaxik kabʼano, xuqujeʼ jasche nim ubʼantajik?

²⁰ Rech kqakikotemaj ri Jehová xaq xiw ta rajawaxik kqabʼan ta ri itzel kril Jehová. Xuqujeʼ rajawaxik kqaloqʼoqʼej ri  kuloqʼoqʼej areʼ (Romanos 12:9). ¿La utz kanaʼo chiʼ at kʼo kukʼ winaq che xa junam ri kkichomaj, ri kibʼantajik xuqujeʼ ri kkaj xa junam awukʼ? Ri Jehová xuqujeʼ je kubʼano. Rumal laʼ chatijosaj awibʼ che uloqʼoqʼexik ri e jastaq che ri Dios kuloqʼoqʼej. Pa ri Salmo 15, chilaʼ kbʼix wi e jachin keraj ri Dios che rachiʼl, kbʼix nikʼaj jastaq chilaʼ (chasikʼij uwach Salmo 15:1-5). Ri e rachiʼl ri Jehová kkiyaʼo che ri uxlabʼixel keʼutoʼ che ukʼutik ri utz taq bʼantajik pa kikʼaslemal. Ri uxlabʼixel keʼutoʼ rech kʼo «loqʼoqʼebʼal kikʼuʼx ri winaq, kekikotik, kʼo jamaril chkixoʼl kukʼ nikʼaj chik, kʼo kikochʼonik, chʼuchʼuj ri kanimaʼ, kakibʼanalaʼ toqʼobʼ, e jik pa ri kitzij, man  kkinimarisaj ta kibʼ xuqujeʼ ketaqan pa kiwiʼ chikibʼil kibʼ» (Gálatas 5:22, 23).

21. ¿Jas katutoʼ che ukʼutik pa ri akʼaslemal ri e bʼantajik che utz kril ri Dios?

²¹ Ri katutoʼ che ukʼutik ri e bʼantajik che utz kril ri Dios are usikʼixik uwach xuqujeʼ retaʼmaxik chrij ri Biblia. Xuqujeʼ, chiʼ kawetaʼmaj ri kutaʼ ri Jehová chawe, xa junam katchoman rukʼ areʼ (Isaías 30:20, 21). Chiʼ qas nim kaloqʼoqʼej ri Jehová, qas kawaj kabʼan pa akʼaslemal ri utz krilo.

22. ¿Jas kariq na we kabʼan pa akʼaslemal ri utz kril ri Dios?

²² Rajawaxik kqakoj qachuqʼabʼ rech kqabʼan pa qakʼaslemal ri utz kril ri Jehová. Ri Biblia kubʼij che chiʼ kqakʼex ri jastaq pa qakʼaslemal, are chiʼ kqaya kan ri ojer taq qabʼantajik tekʼuriʼ kqabʼan kʼakʼ taq qabʼantajik. Junam rukʼ che kqesaj pan ri qʼeʼl qatzʼyaq tekʼuriʼ kqakoj jun kʼakʼ qatzʼyaq (Colosenses 3:9, 10). Tekʼuriʼ, ri salmista xubʼij chrij ri e utaqonik ri Dios: «Kʼo karechbʼej che ri kinimaxik» (Salmo 19:11). We kabʼan pa akʼaslemal ri utz kril ri Dios, xuqujeʼ kariq sibʼalaj kʼi tewchibʼal. Xuqujeʼ, kakʼutu che qastzij ta ri kubʼij ri Satanás xuqujeʼ kakikotemaj ri ranimaʼ ri Jehová.