KʼUTUNEM 5
¿Jas urayibʼal ri Ajawaxel che ri uwach Ulew?
1. ¿Jasche xubʼan ri Ajawaxel ri uwach Ulew?
Jehová xubʼan ri uwach Ulew rech kekʼejeʼ ri winaq chuwach. Chiʼ xubʼan ri Adán xuqujeʼ ri Eva, ri nabʼe kʼulaj, xeʼubʼan täj rech kkinojisaj ri kaj. Ri Ajawaxel ubʼanom chi ángeles rech kekʼejeʼ chilaʼ (Job 38:4, 7). Jehová xuya ri nabʼe achi pa jun kotzʼiʼjalaj Ulew ubʼiʼ Edén (Génesis 2:15-17). Xuya che, xuqujeʼ chike ri ralkʼwal, che kekunik kkiriq kikotemal pa kikʼaslemal che kʼot ukʼisik pa ri uwach Ulew. Chasikʼij uwach Salmo 37:29 xuqujeʼ 115:16.
Ri kotzʼiʼjalaj Edén xaq xiw jun chʼaqap rech ri uwach Ulew. Rajawaxik che ri Adán xuqujeʼ ri Eva kkʼejeʼ kalkʼwal rech kkinojisaj ri uwach Ulew tekʼuriʼ kkinimarisaj ri kotzʼiʼjalaj Ulew (Génesis 1:28). Ri uwach Ulew are ri qas kikʼolbʼal ri winaq, xuqujeʼ ksachisax ta uwach. Chasikʼij uwach Salmo 104:5.
Chawilaʼ ri video ¿Jasche Dios xubʼan ri uwach Ulew?
2. ¿Jasche ri uwach Ulew kotzʼiʼj ta uwach kimik?
Rumal che ri Adán xuqujeʼ ri Eva xkinimaj ta ri Ajawaxel rumal laʼ xeʼesax bʼi pa ri Edén. Rumal laʼ, ri Kotzʼiʼjalaj Edén xsach uwach, kʼot nijun winaq kunaq che usukʼumaxik. Qastzij wi, ri Loqʼalaj Pixabʼ kubʼij che ri uwach Ulew yaʼom pa kiqʼabʼ ri itzel täq winaq (Job 9:24). Chasikʼij uwach Génesis 3:23, 24.
¿La xresaj ri Ajawaxel pa ranimaʼ ri kraj kubʼan chike ri winaq? Xresaj täj, rumal che areʼ kkun che ubʼanik ri jastaq xuqujeʼ qas kbʼan ri kubʼij (Isaías 45:18). Pa ri petinaq, ri Ajawaxel kubʼan na che ri kikʼaslemal ri winaq kubʼan junam rukʼ ri xraj areʼ nabʼe. Chasikʼij uwach Salmo 37:11, 34.
3. ¿Jas kbʼanik rech ri Ulew kux kotzʼiʼjalaj uwach?
Jesús, ri Ajawinel rech ri Rajawbʼal ri Ajawaxel, kubʼan na jun kotzʼiʼjalaj uwach che ri Ulew. Jesús rukʼ ri ángeles, kkisachisaj na kiwach konojel ri ukʼulel ri Ajawaxel pa ri chʼoj ubʼiʼ Armagedón. Tekʼuriʼ, pa 1.000 junabʼ ktzʼapix ri Satanás, ri itzel ángel che xeʼutaqchiʼj ri Adán rukʼ Eva rech xeniman täj. Ri rajpatanelabʼ ri Ajawaxel kekʼaseʼ kanoq chiʼ kqʼax wajun chʼoj riʼ, rumal che Jesús kukʼam kibʼe xuqujeʼ keʼuchajij, tekʼuriʼ, kkiriq kikotemal pa jun kikʼaslemal che kʼot ukʼisik pa ri Kotzʼiʼjalaj uwach Ulew. Chasikʼij uwach Apocalipsis 20:1-3 xuqujeʼ 21:3, 4.
4. ¿Jampaʼ ksach uwach ri kʼaxkʼolil?
¿Jampaʼ kesax ri itzelal rumal ri Ajawaxel? Jesús xuya jun «retal» rech kilik che tijan kopan wajun qʼij riʼ. Ri jastaq che kbʼan kimik, che tijan kubʼan kʼäx chike ri winaq, kkikʼutu che öj kʼo pa ri «ukʼisbʼalil ri uwach ulew [o ri itzelal]». Chasikʼij uwach Mateo 24:3, 7-14, 21, 22.
Pa ri 1.000 junabʼ chiʼ ri Jesús kubʼan Ajawinel pa ri kaj puwiʼ ri uwach Ulew, kresaj ronojel ri kʼaxkʼolil (Isaías 9:6, 7; 11:9). Xaq xiw ta Ajawinel, xuqujeʼ are ajkojol tabʼal toqʼobʼ, kubʼano che ksach kimak ri winaq che kkiloqʼoqʼej ri Ajawaxel. Je wariʼ, rumal ri Jesús, ri Ajawaxel kusach na uwach ri yabʼil, ri rijobʼik xuqujeʼ ri kamikal. Chasikʼij uwach Isaías 25:8 xuqujeʼ 33:24.
5. ¿Jachin kekʼejeʼ na pa ri kotzʼiʼjalaj uwach Ulew?
Pa ri Ja rech Ajawbʼal kawetaʼmaj kiwach ri winaq che kkiloqʼoqʼej ri Ajawaxel xuqujeʼ kkaj kketaʼmaj ri kraj
Ri winaq che keniman che ri Ajawaxel kekʼejeʼ na pa ri Kotzʼiʼjalaj uwach Ulew (1 Juan 2:17). Jesús xeʼutaq ri rajtijoxelabʼ che kitzukuxik ri winaq che utz kanimaʼ rech kkikʼut chkiwach ri kkibʼano rech kkibʼan ri utz chuwach ri Ajawaxel. Kimik, Jehová tijan keʼutijoj sibʼalaj e kʼi winaq rech kekʼejeʼ pa ri Kotzʼiʼjalaj uwach Ulew (Sofonías 2:3). Ri kkimulij kibʼ pa täq Ja rech Ajawbʼal kech ri testigos rech Jehová —e kʼo familias che konojel kkipatanej ri Ajawaxel— kketaʼmaj ri kkibʼano rech e utz kʼulaj, utz tat nan xuqujeʼ uriqik utzilal chirij ri utz täq jastaq che kuya ubʼixik ri Loqʼalaj Pixabʼ. Chasikʼij uwach Miqueas 4:1-4.
