Isaïas 65:1-25
65 “Noqapaq mana tapukoqkuna ashiyämänantam dejarqö,+y noqata mana ashimaqkuna tariyämänantam permitirqö.
Y jutïta mana alabaq nacionpita nunakunatam, ‘¡këchömi këkä, këchömi këkä!’ nirqö.+
2 Munëninkunata ruraqkunaman,+mana allita rurar kawakoqkunaman,+y mana wiyakoq+ sirwimaqnïkunamanmi entëru junaq makïta kamararqö.
3 Tsënöllam pëkunaqa mana penqakushpa insultamar,+huertakunachö+ y ladrïllukuna jananchö santunkunapaq qarëkunata rupatsiyan.
4 Sepultürakuna kanqanchö+y ni pï mana rikanqan sitiukunachömi waräyan.
Kuchi ëtsatam mikuyan+ y mankankunachöy sartenninkunachöpis, melanëpaq cösaskunapita rurashqa caldullam kan.+
5 Pëkunaqa, ‘këkanqëkichö quedakuy ama noqaman witimuytsu,noqaqa qampita mas limpium kä’ niyanmi.
Pëkunaqa entëru junaq rupëkaq ninanömi cöleratsimar* sïguiyan.
6 ¡Rikäyë! Puntächömi qellqarëkan,y imatapis mana rurarqa manam quedakushaqtsu.+
Pëkunataqa castigashaqmi,manam castïgunnaqtaqa dejashaqtsu.
7 Tsëtaqa rurashaq, pëkuna y unë kastankuna mana allikunata rurayanqampitam”+ ninmi Teyta Jehovä.
“Jirkakunachö qarëkunata rupatsiyanqampitay taksha jirkakunachö mana allikunata rurayanqampitam+puntataqa mana allikunata rurayanqampita castigashaq”.
8 Teyta Jehovämi këta nin:
“Imanömi juk nuna, juk sarta üvaswanllullu vïnu rurëta puëdinqanta rikëkur,tsë sarta üvaspaq, ‘ama jitariyëtsu, allikuna kanraqmi’ nin.
Tsënöllam sirwimaqnïkunatapis llapankunataqa ushakätsishaqtsu.+
9 Jacobpa y Judäpa kastankunapita juk yureqmi,sagrädu jirkächö kawanqa.+
Tsë sitiukunaqa akranqä sirwimaqnïkunapaqmi kanqa,tsëchömi kawayanqa.+
10 Noqata ashimaq sirwimaqkunapaqqaSaron+ pampam üshankunata mitsiyänan sitiuman tikranqa,y Acor+ pampanam wäkankuna pärayänan sitiuman tikranqa.
11 Peru qamkunaqa noqa Jehovätam dejayämarqunki,+y akranqä sagrädu jirkatam qonqëkuyarqunki.+
Suertita Apamoq santupaqmi mësata alistayanki,y Nunakunawan Ima Pasanampaq Kaqta Musyaq santupaqmi alli takushqa vïnuta cöpaman winayanki.
12 Qamkunata qayëkaptïpis* manam contestayämarqëkitsu,parlapëkaptïpis* manam wiyayämarqëkitsu.+
Rikënïchö mana allikunatay melananqäkunatam rikënïchö rurayarqëki.+
Tsëmi espädawan wanuyanki+y wanutsiyäshunëkipaq qonqurikuyanki”.+
13 Tsënö kayanqëkipitam, Llapanta Gobernaq Teyta Jehoväqa këta nin:
“¡Rikäyë! Sirwimaqnïkunaqa pacha juntam mikuyanqa, peru qamkunaqa mallaqäyankim.+
Sirwimaqnïkunapaqqa yakunkuna kanqam,+ peru qamkunaqa yakunäyankim.
Sirwimaqnïkunaqa kushishqam kayanqa,+ peru qamkunaqa penqakuychömi ushayanki.+
14 ¡Rikäyë! Sirwimaqnïkunaqa shonqunkunachö alli sientikurmi kushikur büllayanqa,peru qamkunaqa alläpa llakikurmi büllayanki,y imanö këtapis mana puëdirmi waqayanki.
15 Jutikikunataqa pitapis maldiciyänampaqmi sirwimaqnïkuna utilizäyanqa.
Y noqa Llapanta Gobernaq Jehoväqa, llapëkikunatam ushakätsiyashqëki,peru sirwimaqnïkunaqa juk jutipanam reqishqa kayanqa.+
16 Kë patsachö pï nunapis,noqa confiakuypaq Dios bendicinäta munarqa, bendicishqam kanqa.
Y patsachö imatapis änikur jurarqa,noqa rasumpa kaqta parlaq Diospa jutïchömi juranqa.+
Unë sufriyanqëkikunataqa manam yarpäyankinatsu,tsëkunataqa manam nawï rikanqanatsu.+
17 ¡Rikäyë! Mushoq ciëlukunata y mushoq patsatam ruramushaq.+
Unë pasayanqëkitaqa manam yarpäyankinatsu,tsëkunaqa manam shonquykikunaman chämunqanatsu.+
18 Tsëqa, ruramunäpaq kaqman pensar imëpis alläpa kushikuyë.
¡Rikäyë! Jerusalen marka y tsëchö nunakuna imanö kayanqanta rikarkushishqa kayänampaqmi imëkata rurëkä.+
19 Jerusalen marka y tsëchö nunakunarëkurmi alläpa kushikushaq,+tsëchöqa manam ni llakikur ni waqar kayanqanatsu”.+
20 “Tsëchöqa llullukunapis manam juk ishkë junaqllanatsu kawayanqa,y manaraq tiempunchöqa manam awkinkunapis wanuyanqatsu o wañuyanqatsu.
Cien watayoqna këkar wanoqkunatapis jövintanöllam yarpäyanqa,y jutsata* ruraqkunaqa, cien watayoqna këkarpis maldicishqa karmi wanuyanqa.*
21 Kikinkunapaqmi wayikunata rurayanqa,+y kikinkuna mikuyänampaqmi üvastapis plantayanqa.+
22 Rurayanqan wayikunaqa manam jukkunapaqtsu kanqa,y plantayanqan üvaskunapis manam jukkunapaqtsu kanqa.
Juk planta* mëtsika watakuna kawanqannömi,sirwimaqnï nunakunaqa mëtsika wata kawayanqa.+
Y trabajarnin llapan tariyanqankunaqa kikinkunapaqmi kanqa.
23 Manam ardëllatsu* alli trabajar afanakuyanqa,+ni wamrankunapis sufriyänampaqtsu yuriyanqa.
Pëkuna y tsurinkunaqa+Teyta Jehovä bendicinqan nunakunam kayanqa.+
24 Manaraq mañakayämuptinmi pëkunata contestashaq,y manaraqpis parlar ushayaptinmi pëkunata wiyashaq.
25 Üshawan löbupis juntum mikuyanqa, leonpis törunöllam qewata mikunqa,+ y culebrapis allpatam mikunqa.
Sagrädu jirkächöqa tsë animalkunamanam ni ima mana allita rurayanqatsu,ni imata ushakätsiyanqatsu”+ ninmi Teyta Jehovä.
Nötakuna
^ Hebreu idiömachöqa “senqächö qoyënömi o qoshninömi kayan” ninmi.
^ Kënöpis niyanmi: parlapëkäyapteqpis.
^ Kënöpis niyanmi: qayëkäyapteqpis.
^ Kënöpis niyanmi: pecäduta.
^ O capazchi “manaraq 100 watayoq këkar wanukoqkunaqa, maldicishqa kayanqantam niyanqa”.
^ O “monti”.
^ Kënöpis niyanmi: yaptallatsu.
