Proverbius 14:1-35
-
Kikin nunallam shonqunchö llakikunqanta musyan (10)
-
Nunaqa pensan, rurëkanqankuna alli kanqantam, peru wanuymanmi o wañuymanmi chätsin (12)
-
“Pensëta mana yachaq nunaqa, imata niyaptimpis llapantam creikurkun” (15)
-
“Rïcu nunapaqa, mëtsikam amïgunkuna kayan” (20)
-
“Shonqunkunachö tranquïlu kayanqanqa cuerpunkuna sänu kanampaqmi yanapan” (30)
14 Imatapis alli entiendeq warmiqa, wayin alli kanampaqmi yanapakun,+peru upa warmiqa, makinwanmi wayinta ushakäratsin.
2 Teyta Jehoväta respetaq* nunaqa allikunatam ruran,peru mana allikunata ruraq nunaqa manam respetantsu.
3 Pensëta mana yachaq orgullösu nunakunaqa, imëka garrutikoqnömi parlayan,peru alli pensëta yachaq nuna parlakunqanqa, imëkapitam kikinta tsapanqa.
4 Wäka mana kaptinqa corralpis limpium këkanqa,peru yunta kaptinran* cosëchaqa alli yarqun.
5 Alli testïguqa, rasumpa kaqllatam parlan,peru mana alli testïguqa, imata parlarpis ulikunmi o llullakunmi.+
6 Burlakoq nunaqa, Teyta Dios yachaq kanqanta entiendita munarpis manam puëdintsu.
peru alli entiendeq nunaqa, imatapis fäcil-llam yachakurin.+
7 Mana entiendeq nunamanqa ama witipëtsu,pëqa imatapis mana allillatam yachatsishunki.+
8 Teyta Dios yachaq kanqanta entiendeq nunaqa, alliran pensan imata ruranampaqpis,peru upa nunaqa, alli kanqanta pensarmi imatapis llutalla ruran.*+
9 Pensëta mana yachaq nunakunaqa, jutsata* rurarirpis asikuyanmi,*+peru alli nunakunaqa, ofendinakurpis shumaqmi arreglayan.
10 Kikin nunallam musyan, shonqunchö imanir llakikunqanta.
Kikin nunallam musyan, imapitapis alläpa kushishqa këkanqanta.
11 Mana alli nunakunapa wayinqa, pasëpam* ushakanqa,+peru alli nunakunapa wayinqa,* imëpis allillam këkanqa.
12 Nunaqa pensan, rurëkanqankuna allilla kanqantam,+peru wanuymanmi o wañuymanmi chäratsin.+
13 Nunaqa, asikurpis shonqunchöqa llakishqam këkanman,y rasumpa kushishqa karpis llakikuychömi usharinman.
14 Mana cäsukoq nunaqa, mana alli portakunqampitam mana allikunachö ushanqa,+peru alli nunaqa, allikunata ruranqampitam imëka allikunata tarinqa.+
15 Pensëta mana yachaq nunaqa, imata niyaptimpis llapantam creikurkun,peru pensëta yachaq nunaqa, imata ruranampaqpis alliran pensan.+
16 Yachaq nunaqa, imatapis alkäbum këkan y mana alli rurëkunapitaqa witikunmi,peru imatapis mana entiendeq nunaqa, musyaq tukunmi* y kikinllamanmi alläpa confiakun.
17 Jinan höra cölerakoq nunaqa, manaraq pensarmi imatapis ruran,+peru alliraq pensaq nunataqa chikiyanmi.
18 Imatapis mana entiendeq nunakunaqa, tsënöllam imëpis kayanqa,peru alli entiendeq nunakunapaqa, imatapis alli musyayanqanmi corönan cuenta kanqa.+
19 Mana alli nunakunaqa, alli nunakunapa puntanmanmi qonqurikuyanqa,mana allikunata ruraq nunakunaqa, allikunata ruraq nunakunapa wayimpa punkunchömi qonqurikuyanqa.
20 Waktsa nunataqa, hasta vecïnunkunapis chikiyanmi,+peru rïcu nunapaqa, mëtsikam amïgunkuna kayan.+
21 Nuna mayinta despreciaqqa jutsatam* rurëkan,peru waktsakunata llakipëkoq* kaqqa kushishqam kanqa.+
22 Mana allikunata rurayänampaq pensaqkunaqa, ¿manatsuraq mana allichö ushayanqa?
Peru allikunallata rurëta procuraq nunakunataqa, rasumpam kuyayanqa* y pëkunamanmi confiakuyanqa.+
23 Alli trabajarqa munayanqantam tariyanqa,peru imatapis rurayänampaq parlarir mana rurarqa waktsam quedayanqa.+
24 Yachaq nunakunapa corönanqa riquëzankunam,peru imatapis mana musyaq nunakunaqa, imëpis mana musyaqllam kayanqa.+
25 Alli testïguqa nuna mayintam salvan,peru mana alli testïguqa imata parlarpis ulikunmi o llullakunmi.
26 Teyta Jehoväta llapan shonqunwan respetaq* nunaqa, pëmanmi confiakun,+y wamrankunapis segürum kawakuyanqa.+
27 Teyta Jehoväta respetarqa,* imëpis kawakuyanqam,awmi, Teyta Diosta respetarqa wanuypitam salvakuyanqa.
28 Mandädunchö mëtsikaq nunakuna kayaptinqa, gobernantiqa kushishqam kakun,+peru mandädunchö nunakuna mana kayaptinqa, ushakärinampaqnam këkan.
29 Pacienciakoq nunaqa imatapis alliran pensan,+peru imatapis jinan höra rurareq nunaqa, pensëta mana yachaq kanqantam musyatsikurin.+
30 Shonqunkunachö tranquïlu kayanqanqa cuerpunkuna sänu kanampaqmi yanapan,peru tariyanqampita pitapis chikipäyanqanqa* tulluta ismutseq qeshyanömi.+
31 Waktsa nunata alläpa trabajatseq* nunaqa, Kamaqnin Teyta Diostam ofendin,+peru waktsa nunata llakipaq* nunaqa, Teyta Diostam alaban.+
32 Mana alli nunaqa, mana allikunata ruranqampitam imëka mana alliman chanqa,peru alli nunataqa, allikunata ruranqanmi imëka mana allipita tsapanqa.+
33 Teyta Dios yachaq kanqanta entiendeq nunaqa, imata entiendirpis manam alabakuntsu,+peru imatapis mana entiendeq nunaqa, ichik yachakurirmi pasëpa* parlëkachan.
34 Nunakuna allillata rurayaptinqa nacionnintam respetayan,+peru jutsata* rurayaptinqa llapantam penqapäyan.
35 Gobernantiqa alläpam kushikun sirweqnin imatapis alli pensëkur ruraptin,+peru imatapis llutanta ruraptinqa alläpam cölerakun.+
Nötakuna
^ Hebreu idiömachöqa “mantsaq” ninmi. Rikäri “Bibliachö palabrakunata entiendinapaq” neqta.
^ Hebreu idiömachöqa “törupa kallpanwanran” ninmi.
^ O capazchi “jukkunata engañan”.
^ Kënöpis niyanmi: pecäduta.
^ O “manam arreglëta munayantsu”.
^ O “carpa o toldu wayinqa”.
^ Kënöpis niyanmi: jankatmi.
^ O “cölerakunmi”.
^ Kënöpis niyanmi: ankupëkoq; kuyapëkoq.
^ Kënöpis niyanmi: pecädutam.
^ O “alläpam kuyayanqa”.
^ Hebreu idiömachöqa “mantsaq” ninmi. Rikäri “Bibliachö palabrakunata entiendinapaq” neqta.
^ Hebreu idiömachöqa “mantsarqa” ninmi. Rikäri “Bibliachö palabrakunata entiendinapaq” neqta.
^ Hebreu idiömachöqa “celösu kayanqanqa” ninmi.
^ O “mana pagaq”.
^ Kënöpis niyanmi: ankupaq; kuyapaq.
^ Kënöpis niyanmi: jankat.
^ Kënöpis niyanmi: pecäduta.
